السلام عليكم ورحمة الله وبركاته

النهاردة والحمد لله عملت صيانة ال 20,000 كم فى عربيتى ال m11 فى المركز الرئيسى بأبو رواش وحبيت انقل ليكم تقرير مختصر عن ماتم عمله فى الصيانة وتكلفتها:

قراءة العداد: 11,100 كم

بنود الصيانة
1. تشيك اب على العربية وتربيط العفشة
2. تغيير فلتر بنزين وفلتر هواء وبوجيهات
3. لم يتم تغيير الزيت لأنى مغيره فى صيانة ال 15,000

بنود اضافية (شكاوى شخصية)
1. نور الفرامل الخلفى شمال (ال ستوب الشمال) فاصل: تم تغيير اللمبة لانها كانت محروقة
2. غربلة بسيطة مع الفرامل على السرعات العالية: نصحونى استنى شوية كمان 10,000 كم ولا حاجة لانها بسيطة ومش مستاهلة ادفع 200 جنيه خراطة طنابير (تنظيف) وطقم تيل خصوصا ان طقم التيل لسه بخيره

تكلفة الصيانة (مصنعيات + خامات): 411 جم

الوقت المستغرق فى الصيانة: 4 ساعات ونص تقريبا (سلمت العربية8:30 ص واستملت 1:00 ظهرا)

ملاحظات اخرى
المرة دى حسيت بفرق وان فيه تنظيم اكتر من قبل كده فى نظامهم وده لقيته من اول مادخلت على البوابة .. واليكم بعض التغييرات اللى لاحظتها:

1. كل الموظفين داخل التوكيل بقوا معلقين ID فى رقبتهم وده فيه ايحاء ببعض التنظيم
2. اول ماتدخل الاستقبال بقى فيه مكتب قبل ماتدخل على المهندس بياخد بياناتك وبيعملك اذن الدخول ورقم الحجز ويقولك انت مع اى مهندس وهكذا
3. غيروا فى شكل مكتب الاستقبال من جوة وبقى فيه مكان مخصص لخدمة العملاء الحاجزين عن طريق التليفون ومكان لغير الحاجزين ومكان لاستقبال السمكرة والدهان وكل حاجة من دول ليها مهندس معين
4. وانت بتسلم العربية بيديلك ورقة استقصاء على مستوى الخدمة بتملاه بعد ما تستلم العربية وتحطه فى صندوق
5. بصفة عامة حسيت ببعض النظام النهاردة ومفيش الهرجلة اللى حسيتها قبل كده اكتر من مرة

تحياتى لكم واتمنى اكون قدرت افيدكم بالتقرير القصير