السلام عليكم و رحمة الله و بركاته
كنت كتبت من كام يوم موضوع " مشوار الفحص "
http://www.nilemotors.net/Nile/281281-a.html
يوم الجمعه نزلت بعد الصلاة غسلت العربية بالكامل في بنزينة مصر للبترول في العجمي
زي ما الزميل العزيز engaass نصحني بغسيل الموتور و بعد كده غيرت الزيت و بعدها طقم البوجيهات و ضبطت العربية و فعلا لقيت الدخنة اختفت و العربية فاقت
النهاردة الصبح نزلت بدري و روحت مرور العجمي و صورت البطاقة و الرخصة 3 نسخ
و جبت ورق الفحص و دخلت علي المهندس يدوب الراجل قالي افتح الكبوت و بص علي رقم الشاسيه
و قالي اقفل و خلاص علي كده قولت يا مسهل بعدها ملي ورق الفحص و خلاني جبت مثلث عاكس + شنطة اسعافات ب 71 جنيه قولت مفيش مشاكل
المهم دفعت الضريبة 632 جنيه + التامين الاجباري ي310 في خمس دقايق و الساعة لسه 10
روحت اشوف المخالفات قالولي من مبني المديرية القديمة في محطة مصر
روحت بسرعة علي مرور المديرية القديمة و هنا بدات المعاناة
اولا طلبوا استعلام حاسب الي عشان يتاكدوا ان الرخصة مش مضروبة و يجيبوا الرقم القديم لاني لما اشتريتها مستعملة في نوفمبر2009 كان فيها ارقام قديمة و بعد ما رخصتها باسمي ركبت الارقام الجديدة الحروف..... جبت الاستعلام و كتبوا فيه الارقام القديمة
قالولي علي الشباك لازم تجيب مخالصة مخالفات للارقام القديمة الاول قولتلهم طب وانا مالي انا لما رخصتها في 2009 باسمي كنت جايب شهادة مخالفات ان العربية لايوجد عليها اي مخالفات
طبعا مفيش رد ولازم تنفذ اللي بيقولوه..... روحت اشوفهم قالولي لأ لازم تجيب لنا اسم المالك القديم كمان!!!! و لولا ستر ربنا ان العربية كانت اساسا تبع نفس المرور ( المديرية القديمة) كنت هضطر اروح ابيس او محرم بك مثلا .... رجعت جبت اسم المالك القديم و طلعوا الملف و سبحان الله مرور المديرية القديمة الوحيد اللي متحرقش ايام الثورة ...طلعت الموظفة الملف و قالتلي عليك 3000 جنيه مخالفات طبعا قلبي وقع في رجلي قولتلهم ليه يعني دول موش باسمي اساسا قالولي بس العربية معاك انت دلوقتي .... المهم كان فيه عسكري واقف اخد الملف و دخل بيه لوكيل النيابة و خفض المبلغ ل 1150 جنيه و قالي بعد كده مش هينزل جنيه قولتله طب انا عاوز ادخله قالي براحتك
دخلت و شرحت ليه القصة فرد علي ان المخالفة ام 1000 جنيه دي كانت عكس اتجاه في اغسطس 2009 و التانية ام 150 دي كانت وقوف بالممنوع و المخالفتين منزلوش في الكمبيوتر لما انت اشتريت العربية و مينفعش ينزلوا عن كده قولتله طب انا عاوز اعمل معارضة قالي مش من حقك لازم تجيب المالك اللي الرخصة كانت باسمه
حسيت ساعتها اني لبست 1150 جنيه اونطة....
قمت جايب الورق اللي كنت شاري بيه العربية و كنت بالصدفة واخده معايا احتياطي و جبت برده شهادة المخالفات القديمة و اتصلت بالراجل اللي كنت شاري العربية منه و رقمه لقيته بالصدفة علي الموبايل كلمته و شرحتله الوضع و قولتله انا مش عاوز منك فلوس انا عاوزك تيجي تعمل المعارضة بس و انا هدفع الراجل رد علي انه كان شاري العربية بتوكيل وان الرخصة كانت باسم واحد سوري الجنسية و الراجل ده سافر
حسيت ان الدنيا قفلت قمت دخلت تاني لوكيل النيابة و معايا الاوراق كلها و قولتله ينفع الشخص اللي كان شاري العربية بتوكيل من المالك الاول هو اللي يقدم المعارضة لان المالك الاصلي اجنبي و مسافر
وكيل النيابة بص في التوكيل و قاللي لأ مينفعش لان ده توكيل ادارة و بيع و المعارضة تحتاج توكيل قضائي فقولتله طب انا اعمل ايه و ايه الحل قام قاللي طب انتظر بره شوية
طلعت بره مكتبه و شوية و نادوا علي لقيت راح مأشر علي المخالفة ام 1000 جنيه و لاغيها و اصبح المبلغ كله 150 جنيه دفعتهم هوا و بعد كده ابتديت اشوف مخالفاتي و الحمد لله مرور العجمي اتحرق في الثورة و مطلعش علي حاجة
نسيت اقولكم بعد ما خلصت المخالفة القديمة قالولي روح تنفيذ الاحكام و اكشف علي اسم المالك الاول و هنا انفجرت فيهم يعني لو الراجل ده عامل مصيبة انا مالي بيه طبعا محدش بيقنعك بحاجة
قومت رايح تنفيذ الاحكام و اديتهم بطاقتي انا مع ان الايصال بتاع المخالفة كان باسم المالك الاول بس الحمد لله العسكري مخدش باله و استعلم عني انا و ملقاش حاجة
و طبعا بعد كده استعلمت مرة تانية عن ايصال مخالفاتي انا ببطاقتي برضه طبعا
خلصت و ختمت و ان شاء الله بكره هروح مرور العجمي تاني اقدم الاوراق كلها و ربنا يستر ميطلعليش عفريت جديد ..... ايه رايكم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟!!!!!
طبعا الحمد لله و وكيل النيابة ده طلع راجل محترم جدا