عايز عربية تريحك من17ل25 الف.ماتركب لادا سمارا.ولا انت غاوى تتعب نفسك.
بسم الله الرحمن الرحيم...
الموضوع دة عن تجربة ليا ...المبلغ المذكور اعلاه...للاسف مش هايركبك حاجة عدلة
هاتبقي اختياراتك محصورة مابين ال128...ودي مشاكلها الشاسية اللى بيفتح و قطع الغيار المضروبة..
هاتقول 131..عربية جميلة بس عجوووووزة قوى وهاتكون مستهلكة..وقطع غيارها الاستيراد اصبحت غالية جدا...ودة بسبب الشاهين والدوجان...لانهم ال3 زى بعض..
هاتقولى 132..بردوا عجوزة وزيها زى حال ال131..بالاضافة انها بتاكل عفشة كتيييييير.
يبقي ريجاتا...امممم...الريجاتا حلوة بس بردوا قطع غيارها غالية شوية وخاصة الحاجات الخارجية...ومعظمها مليان بارومة...واقل عربية سعرها 18 الف وبتبقي محتاجة شغل....وبتوصل ل27 الف لو حالة كويسة...
هاتقولى ماروتى...خفييييييييفة جدا..وضيقة وموتورها ضعيف
..يبقي بولونيز....نفس قصة ال132...ونفس قصة العافشة...مع الشكل الغير عاطفي تماما...
هانروح بقي لكام عربية صغيرة في السعر دة...دايهاتسو ميرا...صغيرة وضيقة...وضعيفة...سيتروين AX..مش اى ميكانيكى بيشتغل فيها..وموتورها نفس ال205...والاسعار غالية بس معمرة ..وبردوا خفيفة ...
............................
...........................
يبقي احنا محتاجين عربية تجمع مابين القوة...والنعومة..والوسع الداخلي ...وقطع الغيار المعمرة...والرخيصة...والثباا اااااااات...وتوفير البنزين...
العربية دي يا جماعة لادا سماراااااااااا....
ايوة لادا سمارا....العربية دى تستحق الاهتمام والاقتناء...
هاتبقي راكب عربية اتحاد مابين شركة فولكس فاجن وبورش لصالح لادا..
السمارا عربية معمولة بالكاااااااااااامل علي شاسية الجولف 2...
وموتور الجولف 2 بيركب عليها بنفس القواعد..
هاتقولي اللادا خشنة...لااااا مش خشنة...دي ناعمة جداااااا....ودريكسونها علي اسكاترا..
والعربية على كبالن..
كفاية انك هاتريح دماغك من قصة الابلاتين والكوندينسر..
...العربية شاسيه صلب....مش شاسية علب...زى ال128 والريجاتا...صعب جدا جدا جدا...ان العربيية تقف بيك او تعطل منك...الا لو كنت مهمل جدا في صيانتها...السمارا...اى قطعة غيار فيها..هاتلاقيها المانى ...وغالبا بتكون ماركة بوش...
مثلا..عربيتى السمارا موديل 1988...كل حاجة فيها فابريكة...حتى مشط الاسبراتير...اصلي..حتى الشاكوش ماتغيرش ولا الاسبراتير...سالت الراجل بتاع قطع الغيار...انا عايز اغيروش الاسبراتير..والشاكوش...خرج بص عليهم...قالى ماهم زى الفل...والاصليين!!..قولتلة يعني بدل ماتبوظ فجاءة...قالى يابيه انا بقالى سنة مابعتش شاكوش سمارا...قالى اكل علي الله انت معاك عربية مابتعطلش...هههههههه...رحت لبتاع العفشة...قولتلة عايز اغير المساعدين...بص عليهم...قالى تغير ايييييييه!!!!...قالى ماهم زى الفل اهم...قولتلة ابدا...اصلهم من سنة 88 ماتغيروش!!!...قالى ياعم والله العظيم شغالين زى الفل...وجداااااد....خلاصة الكلام....ريح دماغك وهات عربية تصونك وتريحك...وشوف الادا سمارا...
وللعلم الفضل كل الفضل...يرجع للقرصان بتاعنا...محمد شنوري...هو اللى خلانى اشترى اللادا سمارا...واقنعني بيها..والحمد لله...بقالها معايا 5 شهور...زى الفل...ثبات وشد وجرى...وماعملتش معايا اى حاجة...والحمد لله...واقسم جالى 3 الاف جنيه فوق سعرها...ومارضيتش ابيعها....واكتر من واحد شبطان فيها...لان ببساطة هابيعها واشترى ايه انا!..
دة رابط لاسعار قطع الغيار..
http://www.nilemotors.net/Nile/27875-a.html
