ياريت أعرف ازاى اقدر اوصل لمجمع مصانع توشيبا العربى بقويسنا من خلال الطريق الدائرى ومن خلال مترو الأنفاق ... ونشكركم على حسن تعاونكم معنا .
عرض للطباعة
ياريت أعرف ازاى اقدر اوصل لمجمع مصانع توشيبا العربى بقويسنا من خلال الطريق الدائرى ومن خلال مترو الأنفاق ... ونشكركم على حسن تعاونكم معنا .
السلام عليكم و رحمة الله و بركاته
اللى أنا أعرفه, أن مصانع العربى دى عالطريق الزرعى مباشرة و أنا كنت بشوفها و أنا مسافر من المنصورة الى القاهرة, بتبقى على يمينى, الا اذا كان فيه مصانع تانية للعربى أنت تقصدها, يبقى ده أمر تانى بأه.
أما ازاى تروحها من الدائرى, أنا متهيألى , أنك تركب أى حاجة رايحة قويسنا من موقف العاشر اللى تحت الدائرى, لو بمترو الأنفاق, ممكن تنزل رمسيس و تركب لعبود و من هناك تركب أى حاجة رايحة أو بتعدى على قويسنا أو من ميدان رمسيس نفسه, فيه عربيات بتحمل, اركب أى حاجة رايحة قويسنا أو هتعدى على قويسنا و ممكن تنزل عالطريق الزراعى نفسه أودام المصانع, ده اذا كانت هيا دى المصانع اللى أنت تقصدها, بس خد بالك أوى و أنت بتعدى الطريق السريع, لأن العربية هتنزلك على الناحية المقابلة, لو معاك عربيتك الخاصة بأه, يبقى اركب الدائرى و انزل النزلة بتاع طريق القاهرة الاسكندرية الزراعى و خليك ماااااااااااشى لحاد قويسنا و هتلاقى المصانع على شمالك و أنت رايح.
الأخوة هنا فى المنتدى أكيد هيفيدوك ان شاء الله أفضل منى.
بالتوفيق ان شاء الله.
مصانع توشيبا العربى اللى على الزراعى مباشرة دى مش فى قويسنا ، دى قبل بنها وانت جاى من القاهرة فى المقابل.
لكن المصانع اللى فى قويسنا ، فدى فى حتة اسمها المنطقة الصناعية فى قويسنا.
لو هتيجى مواصلات ، تركب من عبود (موقف قويسنا) ، ولما تنزل فى قويسنا تاخد تاكسى للمنطقة الصناعية. أو تركب أى حاجة بتعدى على قويسنا (شبين الكوم مثلاً) وتقول له نزلنى قويسنا.
لو جاى بعربيتك ، تاخد الطريق الزراعى طوالى بعد ما تعدى بنها بحوالى 10 كيلو هتلاقى كوبرى خارج من الطريق الزراعى يمين ، تركب الكوبرى ده ، وتخليك عليه طوالى هيوديك المنطقة الصناعية ومصانع العربى ، وخللى بالك لأن فى أول الكوبرى فيه خرجة منه شمال تقطع الزراعى وتوديك شبين الكوم دى تسيبها وتخليك طوالى.
انت بس بعد بنها خللى بالك من اليفط على يمين الطريق وهتلاقى يافطة كبيرة قبل الكوبرى ده (شبين الكوم والمنطقة الصناعية).