تحذير لكل الاخوة المقدمين علي شراء و ترخيص سيارات زيرو
السلام عليكم و رحمة الله و بركاته
اخواني و احبتي في الله
الموضوع بأختصار
من سيقدم منكم علي شراء سيارة جديدة لا يستلم السيارة الا بأستلام ( فاتورة شراء معتمدة مختومة بها ما يفيد سداد ضريبة مبيعات و يا حبذا لو شاري من الوكيل مباشرة او الموزع المعتمد )
المهم ان الفاتورة تكون مطابقة لمن عمل لك شهادة بيانات في المرور
ارجوكم بالله عليكم القرار اعتمد و لن يستطيع احد الترخيص الا بالفاتورة
كده خلص الموضوع لذا وجب التنبيه
.................................................. ..................................................
و لمن اراد ان يعيش جو الرعب اللي عشته يوم الخميس الماضي و لا يرضي بالاختصار و حابب الرغي الكتير و التفاصيل المملة فهيا بنا نربط الاحزمة و لنركب قطار الرعب و احذرو من المنحنيات
لقد من الله علي من كام يوم بشراء القشقااااااي بفضل من الله تعالي عقبال لما تركبو جميعا الافضل منها الف مرة
و لانها ليست اول مرة لي في شراء زيرو فلقد راجعت جيدا الاوراق قبل الذهاب للترخيص بنفسي حتي ابتعد عن الرشاوي و الكلام الفارغ ده حتي يباركها الله و يحفظها لي و لاسرتي
المهم و انا بدفع عربون حجز العربية اثناء و جودها في المعرض اكدت علي صاحب المعرض اني سوف استلم منه فاتورة ضريبية اثناء استلامه باقي الفلوس و عند استلامي للسيارة و الراجل وافق علي مضض
و لاننا كالمعتاد للاسف الشديد يوجد بيننا من لا يلتزم بكلمته فلقد اعطاني ايصال استلام نقدية و قال لي ان الفاتورة ان شاء الله تاني يوم
و ذهبت تاني يوم للترخيص بعد ان استلمت الفاتورة و سبحان الله كانت المفاجأة شديدة مدوية
( قرار جديد صادر من فترة بأنه يجب ان يكون ضمن اوراق الترخيص اصل فاتورة الشراء )
و هيا كانت تعليمات شفهية من كام شهر الا انه يوم 3-4-2012 نزل بها منشور علي كل ادارات التراخيص في الجمهورية
و طبعا الكلام في المنشور عاااااااااااااااااااااااا ااايم لدرجة تتوه
مكتوب نصا ( يتم الاطلاع علي اصل فاتورة الشراء علي ان تتضمن القيمة السعرية للسيارة و بيان سداد ضريبة المبيعات )
المهم بعد اخذ البصمة للسيارة و عرضها علي المهندس الفني ارسلنا ( للمراجع )
و انا كنت سمعت في الصباح ان الناس بترجع لانها لا تحمل فواتير شراء بل معهم ( قسيمة استلام فقط ) خصوصا ممن اشتري من معارض سيارات و تجار مثل حالتي و كنت فرحان اني تمسكت بالحصول علي حقي و الاحتفاظ بالفاتورة و قلت في نفسي الحمد لله اني صممت علشان لا يحدث معي مثل ما حدث مع الناس و ربنا معاهم
و حضرت الصورة مع الاوراق و اذا بالمراجع يرفض الملف و يكتب عليه احضار اصل الفاتورة فأخبرته انها معي و اخرجتها من الشنطة لكي يطلع عليها و وجدته ( زعلان انها معي ) المهم راجعها جيدا و اذا به ( يدبسها ) مع باقي الاوراق التي سوف توضع بالملف ( قلت مش مشكلة ) خير اهي محفوظة مع الحكومة مفيش ضرر
و اكملت باقي الاجراءات و دفعت الضريبة ثلاث سنوات علي الشباك و ارسلتني الموظفة للمراجع للاعتماد مرة اخري قبل دخول الملف ( للكمبيوتر لاستخراج الرخصة )
و اذا به ينظر للورق مرة اخري و يقول لي فين الفاتورة فقلت له الله يكرمك مهي امامك اهه
فقال لي لا لا لا
انا عاوز فاتورة الشراء اللي الوكيل بايع بيها للمعرض مش اللي انتي شاري بيها من المعرض
:44::44:
يعني
شركة نيسان استوردت السيارة و باعتها ( للموزع المعتمد لديها ) و هو بدوره اما باع للمشتري مباشرة و استخرج له شهادة بيانات
او الموزع باع لمعرض ثم قام المعرض بالبيع للمشتري
المهم الباشا عاوز المستحيل و خلاص
يعني عاوز اصل فاتورة شراء تلف مع السيارة من الشركة المستوردة الي الموزع المعتمد ثم الي المعرض ثم الي المشتري اذا لم يكون هناك وسيط كمان في المنتصف و الي ان تصل لان يحتفظ بها المرور و المفروض ان هذه الفواتير تحفظ حقوق كل كيان من هذه الكيانات حين يكون لديهم لجنة من الضرائب و تحفظ في ملفاتهم بشركاتهم
يعني اللي بيصدر القانون او المنشور لا علاقة له بأرض الواقع ( عمار يا مصر ) و حسبنا الله و نعم الوكيل في كل انسان يعرقل مصالح الناس
افهم الراجل يمين شمال مش عاوز يفهم و ارسلني للباشا اللي ماسك وحدة المرور
الباشا سمع مني و قال لي دي نشرة و قانون لازم نحترمه و اشار لي بالمنشور اسفل زجاج مكتبه اللي كان منور ايضا اسفل زجاج مكتب المراجع و فرحان اوي بيه
قلت له مكتوب انكم تطلعو علي اصل فاتورة الشراء و ان تكون بها سداد ضريبة المبيعات
و انا معي هذا الاصل و يحتوي علي سداد ضريبة المبيعات و انا بصفتي صاحب شركة اعرف ان من يسدد ضريبة المبيعات هو التاجر يعني كل ما السلعة بتتباع من التجار بيتم خصم ضريبة مبيعات و تسديدها لحين شراء العميل و انا كده معي اخر فاتورة خرجت من التاجر او المعرض لي يعني كله سليم يعني مش محتاجة تعقيد يا فنم
المهم الباشا لم يقتنع بكلامي
اتحايل ما اتحايل مفيش تفاهم المهم اتصلت بصاحب المعرض اللي انا جبت منه العربية و اخبرته بالموضوع الراجل قال لي انه اول مرة يسمع الكلام ده و انه مستحيل يحضر لي الفاتورة اللي انا عاوزها لانه عمل لي فاتورة منه هو و الفاتورة اللي هو شاري بيها بيحفظها عنده للضرايب لانها من المستورد و الاجراءات سليمة المهم اخبرته اني في ازمة و الطبيعي يحلها لاني مش هعرف امشي بالعربية من غير نمر و انا كده سوف اذهب بها للجراج و اروح له المعرض لكي يحل لي المشكلة او يأخذ سيارته و اخذ فلوسي او يبعت حد من عنده يرخصها لي المهم يحل الموضوع و طبعا هو قال لي اتفضل بس لا يوجد عندي حل بكل صراحة
المهم ربنا كرمني ببعض المعارف بسرعة حضرو لمقابلة الباشاااااااااااااااا
و هو اخبرهم انها تعليمات جديدة و هو لن يستطيع ان يكسر هذه التعليمات مع اني واثق اني لم اخالف نص التعليمات اللي هما عمالين يتكلمو عنها
المهم ربنا كرمني و ذهبت لادارة المرور في الدراسة علي الساعة 12 ظهرا و قابلت مدير الادارة بنفسه و شرحت له الحالة و ان الفاتورة اللي معايا تحقق نص التعليمات الجديدة ( فأقتنع الرجل بصراحة الله يكرمه ) و حاول الاتصال بالباشا بتاع المرور لكن الباشا تليفونه مشغول طبعا لاني نسيت اقول لكم ان كل ردوده علي الناس في المكتب بتكون بودن واحده لان التليفون علي الودن التانية المهم ربنا وقف معايا و هدي عليا مدير الادارة العامة للتراخيص و وجدته بيمضي لي علي اصل الفاتورة و يكتب ( تقبل ) و يختم فوق الامضاء ( بفضل الله تعالي ) جريت علي المرور تاني في المعادي و صلت هناك علي الساعة واحدة و ربع و دخلت مكتب الباشا و لزقت له الاوراق علي المكتب و قلت له خلصت ( بفضل الله )
فنظر لي شذرا و قال لي هوه معرفة و لا ايه
و الواجب ده للكل و لا ليك انت لوحدك
فقلت له و الله الراجل اقتنع بالاوراق و بالكلام و ان ما قدمته له لا يخالف التعليمات لذلك اعتمد الاوراق المهم اعمل ايه دلوقتي فأرسلني للمراجع مرة اخري و لما شاف الختم ( اتجنن ) بعيد عنكم و الله حسيت انه اتخنق وجدته و انا بستلم الرخصه اخر اليوم ماسك الملف بتاعي و بيقول للضابط شفت ابن الجنية خلصها منين
و الحمد لله خلصت علي خير
و ربنا مع الجميع اسف جدا للاطالة بس كان يوم صعب جدا و لا احب ان يمر علي اي احد من اخواني في المنتدي لذا وجب التحذير
م.حاتم السباعي