تجربتى مع الفيرنا من الزيرو لـ 15500 كم
اشتريت فيرنا زيرو 1600 جميع الكماليات فتيس مانيوال العربية كويسة على الرغم من انى اخدت وقت كبير للتعود على دواسة الدبرياج !!! المهم العربية فى أول 5000 كم استهلاكها للبنزين غير طبيعى وخصوصا مع السرعات واللة على طريق مصر السويس ماشى 190 كنت شايف عداد البنزين وهوة بينزل المهم بعد كدة الاستهلاك اصبح طبيعى
بداية المشاكل : والعربية كانت عاملة 9000 كم ابتدى صوت دبة يظهر فى العربية من الجانب الشمال الخلفى ومع الوقت الصوت زاد لدرجة مقلقة !!! ( وللأسف مفيش وقت للتوكيل وللأشتغالات التوكيل ) رحت لميكانيكى بتعامل معاة فى مدينة نصر بس شاطر ركب معايا العربية ودخلنا منطقة جديدة والارض عبارة عن حصى فسمع الصوت قالى العربية لسة زيرو فممكن يكون جلدة الشكمان اتقطعت ورجعنا على الورشة كشف عليها لقاها سليمة فرفع العربية وابتدى يربط على العفشة وطلع وقالى فية مسمار فى المقص الخلفى مفكوك خالص وربط علية قلتلو خلاص يبقى ربط العفشة كلها وهنا كانت الصدمة الكبرى واللة العظيم مفيش مسمار فى عفشة العربية بالكامل موش مفكوك قلت ادى الشغل المصرى
والعربية عاملة 14000 كم ابتديت الاحظ أن العربية بتترج وهية على السلانسية وادائها عموما موش كويس والفرامل بقت زفت ضعيفة وكل مدوس جامد شوية العجل الامامى يزحف حاجة بصراحة تقرف قلت اعمل صيانة نزلت شارع دمشق واشتريت فلتر هواء , فلتر بنزين , بوجيهات ngk ورحت لنفس الميكانيكى عملى صيانة تمام وقلتول على مشكلة الفرامل فقلى أن المشكلة دى سببها تظبيط خلوص التيل الخلفى ( عيب تجميع ) وفعلا عملى الصيانة وظبط خلوص التيل الخلفى العربية اتغيرت تماما طبعا اداء الموتور رجع احسن وحسيت بفرق كبير فى الفرامل
معلش لو كنت طولت بس حبيت اشاركم التجربة ونصيحة اى حد يشترى فيرنا يروح يربط عفشة العربية بكل مسمار فيها حتى مسامير البطاحات هية رخمة ان الميكانيكى هيشيل الكنبة الخلفية بس انك تمشى على الطريق وانت مطمن اهم من اى حاجة
