ازيك يا عمرو واسمحلي ارفع الالقاب بعد اذنك مؤقتاً حتى عشان اكون حر في المداخله وفاتح قلبي لئن كل اللي قلته في موضوعك باعاني منه واعتقد كتير اوي بيعاني منه .
في رأيي انا غالباً الدنيا كلها بقت كده وده لأسباب كتير اهمها السربعه اللي بقينا فيها والتوتر الدائم واللي ناتج عن ضغط عمل وضغط شارع وضغك في كل مكان المشاعر الرقيقه والود والرحمه والحب والاحترام كل الحاجات دي مشاعر طاهره ورقيقه وجميله ماينفعش ابداً تبان وسط دخان وتلوث وقرف احنا عايشين فيه يومياً طبعاً التلوث لا اقصد بيه الدخان انا اقصد تلوث اخلاقي وتلوث ديني وانحراف وحاجات كتير سيئه والمشكله اللي احنا مش عاوزين نصدقها هو ان احنا اللي عاملين كده في نفسنا والله تعلم اننا لو فكرنا لحظه واحده في حياتنا ليه ملخبطه كده ومتوتره هنلاقينا كلنا مسؤولين وفقط مافيش قوه خفيه ولا حاجه يعني.
الأخلاق ليه انهارت والناس بقت عصبيه وكارهه بعضها ؟ عشان بعدنا عن حاجات كتير حلوه اهمها ربنا سبحانه وتعالى والقرب من ربنا مش بس صلاه وصوم وخلاص القرب منه سبحانه وتعالى ان كل حاجه تعملها تكون لوجه الله ورغبة في طاعته سبحانه وتعالى وخوفاً من غضبه لو المعادله دي اتحلت كل حاجه هاتمشي طبيعي والله تعالى نعمل سلسله كده مع بعض ونشوف يمكن نفهم حاجه !
انسان عارف ربنا حق قدره تعالى وواثق من الله ~~~ هاتقابله مشاكل يوميه زي هناكل منين ونشرب منين وهانعيش ازاي ~~~ لازم اشتغل وانزل الشارع واتعب واجتهد ~~~ هنا بقى الحلقه الضعيفه في السلسله دي وهي ( انا فعلاً واثق من ربنا ومؤمن بجد !) النتيجه هاعامل الناس كويس وبما يرضي الله سبحانه وتعالى ومش هازم حد ولا هازعل حد مني وهاحترم الجميع .....العكس بقى وده اللي حاصل دلوقتي ( انا مش مؤمن بجد وضعيف الإيمان ) لعدم الثقه انا نازل الشارع متصور ان كل الناس اللي فيه هاتنهش في وتسرق اللي في جيبي وبالتالي يستحيل ابتسم في وش حد انا هاطلع اجري لغاية ما اوصل للجهة اللي رايح ليها ~~~ هادخل الشغل عندي اااااه الراجل ده زميلي في الشغل بس لعدم ثقتي برضه هاتصور ان الراجل ده هياخد فلوسي او نصيبي لئنه لو اجتهد وعمل شغل اكتر مني هو هياخد وانا لأ ~~~ ده ينتج عنه على طول جميع اساليب الأسفنه والضرب تحت الحزام اللي موجود دلوقتي برضه كتير اوي اوي اوي وهو ان الطريق انك توصل لفوق وتعلى هو انك تدوس على كل اللي حواليك وترميهم في اقرب صندوق قمامه مجاور لك ! ~~~ راجعين بقى من الشغل .....واحد كان في حرب نفسيه طول يومه ومتخيل ان كل اللي حواليه عملاء وخونه وعلى اتم استعداد انهم ينقضوا عليه ويقطعوه متخيل هايكون راجع عامل ازاي ! ماشي بعربيته بيدوس كل اللي حواليه ده غير ان في دماغه 100000000 حاجه معظمها للأسف ضرر اكتر الا وهي اني لازم اوصل بسرعه عشان الحق ارجع تاني بكره قبل ما الزميل الفلاني يرجع قبلي ويمضي قبلي او يضرب الكارت قبلي وحاجات من دي .~~~ رجع البيت بالسلامه هايكون همه لو متزوج البيت والزوجه والعيال وكل ما لذ وطاب لكن برضه بعصبيه وعدم ثقه في الله هايكون ماشي غلط وعمال ينعي نفسه وحظه وليه انا اشتغل وآخد 10 والتاني ده يشتغل وياخد 20 وليه وليه وليه وفي النهايه ينتهي اليوم بالنوم على الكنبه في الصاله بره حتى ما أخدش فرصه لنفسه انه يرتاح طبيعي وينام طبيعي .
كل الحاجات دي يا عمرو خلت الناس تعبانه مش هانقول وحشين لئن الأصل في الانسان الخير مش الشر والعلاقات الانسانيه والاخلاق الحميده دي كلها خير وهي اقرب للقلب الطبيعي قبل اصابته بالتلوث ده مش هاعيد السلسله اللي كتبتها فوق دي لكن هاقول ملخصها اقلبوا كل اللي قلته فوق وطبقوه على واحد واثق في ربنا سبحانه وتعالى ومتأكد 100% ان رزقه ده بإسمه كده كده ومجهوده مش هايضيع سدى ابداً وجزاءه محفوط عند الله واللي جانبه ده مش هياخد اكله ولا هيشرب شربه انت ليك اكلك وهو ليه اكله انت ليك نصيبك وهو ليه نصيبه اعمل اللي عليك بس وارتااااااااح سيب الباقي على ربنا لئنك يا ابن آدم اضعف بكتير من الحسابات دي انت تعرف منين ! نصيبك هتاخده هتاخده صحيح لا اقصد ابداً التكاسل لكن برضه لا اقصد الصرع اللي صايب الناس لئن النتيجه واحده والله ..ماحدش هاياخد اكتر من نصيبه مهما عمل ولا حد هياخد اقل من نصيبه على فكره والأصل ان الانسان اوقات كتير بيكون حواليه نعم لا حصر لها لكن مش شايفها ولا حاسسها نتيجة الغضب اللي مالي صدره وبالتالي متصور انه مظلوم ومغبون وجاي الدنيا غلط والكلام ده.
آخر حاجه وهامشي عشان عارف زهقتوا مني .......اذا كل واحد عمل كل اللي يقدر عليه لوجه الله سبحانه وتعالى هيرتاح جداً عارف يا عمرو ان انا لوحدي او س من الناس هيعامل الناس من قلبه ولوجه الله لكن برضه ايه النتيجه انا باقولك يا رامي الناس هي اللي بقت وحشه مش انا وبالتالي لازم هم يتغيروا ......هاقول هيتغيروا والله بس نصبر ونحاول نحافظ على الشويه اللي فاضله معانا لغاية مانرجع تاني نكتر زي زمان والثقه في الله ترجع والثقه في النفس ترجع وان شاء الله بكره احسن كتير .
معلش آخر جزئيه ها قولها وتقبلوا مني الاطاله انا آسف...كنت امبارح في عزاء احد اقاربي الله يرحمه ويسكنه فسيح جناته اللهم آمين.الراجل ده كان غاية في الأدب والاحترام والذوق والرحمه الطيبه وحب الناس وحب الخير كان دائم السؤال على الناس وكان دايما الناس بتتهمه بالعبط والهبل انه بيود الناس اوي كده وبياخد على دماغه في الآخر- عذراً في التعبير الغير مهذب - ورغم كل الهجوم ده كان بيقول ( كلها حسنات بتتحط عند ربنا سبحانه وتعالى وليها عوزه وقتها ) الراجل الطيب ده مرض بالسرطان فجأه وليس كبير السن لم يتجاوز الأربعين من عمره وفي أسبوع توفى رحمه الله دون أي ألم أول امس.......من 12 الظهر والله يا جماعه لي 12 باليل في العزاء المكان ممتلئ بطريقه رهيبه مافيش مكان نقف فيه حتى لكثرة الناس وماحدش عاوز يمشي فا انا قلت يااااااااااه سبحان الله كان عندك حق يا عم محمد كلها حسنات بتتحط عند ربنا سبحانه وتعالى وليها عوزه واهو وقتها جه !
رحمك الله يا عم محمد وأسكنك فسيح جناتك وتغمدك برحمته الواسعه اللتي وسعت كل شيء آمين يا رب العالمين.
انا آسف مره تانيه للجزء الأخير عارف ان مكانه مش هنا بس كان خير برهان ان اللي هايعمل خير ويحب الناس هايكون نهايته كده ان شاء الله .
المفضلات