تقرير تركيب فوج لايت للنيو أكسنت
السلام عليكم
مساء الفن على كل نجوم هيونداي ...أنا بعمل الموضوع ده لان تركيب فوجات النيو اكسنت سهل جدا بس عشان المعلومات متنطوره يمين وشمال ومش واضحه فالموضوع باين انه صعب
أولا بحب اشكر الاخ el_nahal2004 على مساعدته وتعبه معايا ... شكرا يا سحس :)
ثانيا: عشان تركب فوجات بديهي محتاج الاتي (مفتاح في الطبلوه - الفوجات - شبكه مفرغه لمكان الفوجات - الضفيره)
دي أنضف وأحسن طريقه من وجهة نظري لتركيب الفوجات .... في ناس بتسضعيض عن المفتاح وتوصله على النور الصغير وخلاص
بالنسبه للمفتاح موجود في التوكيل ب 105 ج ممكن تجيبه من التوكيل مباشره أو مركز بيع للتوكيل
أنا بالنسبالي كان الاخ ايمن أحمد اشتراه وبعدين كسل او حاجه زي كد وعرضه للبيع على المنتدى وانا استغليت لحظة ضعفه واشتريته منه :F_eyeb1[1]:
نزلت الحرفيين عشان بقيت الحاجه ... لقيت واحد عارض الفانوسين تيواني ب 450 وكنت هشتريهم لولا ستر ربنا وقلت في نفسي اسأل صحابي في المنتدى الاول
سألت عليهم في التوكيل لقيت الفانوس الواحد ب 450 ج :argue2: كنت عاوز اتلفظ بس قولت بلاش حرقت دم
بعد لف وحورات الناس دلوني على واحد في الحرفيين هو المستور الاساسي لكل قطع غيار هيونداي والباقي بيشتروا منه واسعاره كويسه جدا اسمه العشري
للأسف نسيت اخد الكرت بتاعه مع اني حريص على الموضوع ده .... على العموم انزل انت بس الحرفيين وسأل عن شارع سميرعلي ومليون واحد هيدلك وبعدين انزل الشارع واسئل عن العشري لقطع غيار هيونداي ومليون تانيين هيدلوك برضوا :)
هناك لقيت الفوجات الصيني ب 170 للفنوسيين مع بعض و التيواني ب 240 او 280 مش فاكر قوي سئلت عن الفرق في ايه ... اتقالي انو الصيني "الباغه" اللي بره بتصفر مع الوقت ولو حبيت تركب زينون بعد كده فيه الفانوس هيسيح .... يانهار هيسيح :toothgrin:
اشتريتها وهي على فكره من غير لمض ... هتشتري لمض ايطالي رقمها 881 للفوجات في محل جنب العشري علطول مش فاكر اسمه ...العشري اللي دلني عليه ب 70 ج
قلتله ماشي حتلي التيواني ....ملحوظه صغيره ان علبه الفوجات التيواني لقتها علبة كرتون بيج ممسوح وملزوق عليها استيكر الاستيراد وعليها صنع في تيوان وجواها الفوج لايت ملفوف بسفنج ضد الكسر يعني تحس انها فعلا قطعة غيار أصليه مش تجاريه ... أما الصيني مرسوم على الكرتونه العربيه وصور هنا وهناك وكلام كبير وضغير
سألت على الشبكه او الستاره المفرغه في التوكيل اتقلي 250 ج ....لقتها عند العشري ب 120 ج :biggrin2:
اتفضل الضفيره ... العشري قلي الفوجات مستوردها من غير الضفيره بتاعتها.... بصراحه أحبطني وخرجت من عنده لفيت الحرفيين حاره حاره ومن محكمه لمحكمه ومن قاضي لقاضي ومحدش عندوا حاجه زي كده لحد اما اتصلت بالاخ النحال وقلي ان فوجات النيو أكسنت بالذات ملهاش ضفيره ... ليه مش عارف ودلني على عشم نواره اروح أركب عنده والتوكيل اكدلي ده برضو ان الفوجات اللى عنده برضوا من غير ضفيره
خت الحجات من عند العشري وانطلقت على شارع دمشق مصر الجديده ومليون واحد هناك هيدللك على عشم نواره
أم حاجه تروحلوا ومعاك الستاره المفرغه بيستمخ أوي من الحركه دي :) ..... الفني هناك كان فاهم جدا وعارف هو بيعمل ايه وبيحاسب جدا في شغله ....الموضوع مفروض ما يخدش نص ساعه لو اشتغل كروته بس قعد عليها حوالي ساعه ونص بدون مبالغه وجاب سلوك وعمل الضفيره يدوي ...التركيب اتكلف 100 ج
يعني الموضوع كله اتكلف حوالي 650 ج في حين كانت هتتكلف في التوكيل مش ققل من 1500 ج .... ممكن تقلل التكلفه لو جبت الفوجات صيني وتوصل على دراع النور الصغير من غير المفتاح
الموضوع ده عملته في ست ساعات تقريبا عشان كنت بسأل وتايه ...بس لو انت مشيت على المعلومات اللي فوق هتاخد معاك بالكتير 3 ساعات
بعد التركيب الفوجات بتفرش حوالي متر او متر ونص قدامك .... بتفدني جدا في الطرق اللي رايح جي ... دا غير شكل العربيه بأ أحلى بكتير لدرجه انني حاسس ان جبت عربيه جديده لدرجة انني بحب ابص للعربيه من قدام :E_braces[1]:
يا رب أكون افدت اللي محتار لسه :) ... أي سؤال انا في الخدمه
http://img534.imageshack.us/img534/5...uaccent.th.jpg
http://img607.imageshack.us/img607/1...hyundai.th.jpg
http://img825.imageshack.us/img825/3...cent007.th.jpg