واحد صاحبى مابيعرفنيش غير لما يعوز مصلحة اعمل معاه ايه

المشكلة ياجماعة انا عندى صديق من ايام الجامعة واشتغلنا مع بعض فى نفس المكان فترة من الوقت وبعد كده راح مكان افضل بس كل اللى بيربطنى بيه هو التليفون وبصراحة مبيتصلش بيا غير لما يبقى عايز حاجة يعنى عمره ما اتصل بيا فى العيد او رمضان او اى مناسبة غير لو عايز مصلحة والمشكلة الأكبر انه غاوى سلف يعنى كل فترة يطلب منى سلفة وبصراحة هو بيرجع الفلوس بس بعد فترة كبيرة ممكن توصل لسنة بس المشكلة انه دايما بيبقى متعشم فيا قوى انى اسلفه المشكلة انه بيستلف مش للضرورة لا ده عشان يسرع فى عمل حاجة يعنى مثلا بيوضب شقته يروح يستلف عشان يشطبها بسرعة وهكذا اللى مضايقنى انه مابيعرفنيش غير فى المصالح وبس وبصراحة حاسس انه بيستغلنى بالرغم ان شغله افضل من شغلى وهو دلوقتى طالب سلفة كالعادة هل اقطع معاه خالص ولا اعمل معاه ايه لانه مش حاسس انه بيعمل حاجة غلط وانا مش عايز اجرحه بكلامه رايكم ايه

خليك محافظ على العلاقه بس متكونش دايما سهل فى انك تسلفه ... يعنى مره اه و مره معلش فى ظروف .... كده يعنى

اعرفه برده لو ليك مصلحة
واللى مش بيحافظ على السلف او بيتاخر نفض
والاحسن متسلفش

اطلب من يكتب وصل امانة بالفلوس، دى الاصول و محدش يزعل منها، لو رفض يبقى قطعت الموضوع ده و لو وافق يبقى يتكتب تاريخ قريب فى الوصل علشان ما يطولش.

اكنك بتحكى عنى وعن واحد صاحبي برده بس موضوع سلف فلوس ده معملوش معايا فو زى ماحضرتك بتقول مابيتصلش الالما يكون عايز حاجة نصيحة منى اتصاحب معاه على كده بس من غير مايبقي فى اى تعاملات مادية بينكم يعني لما يطلب فلوس قول له عندى ظروف او مش معايا مثلا او انت عارف انا لو معايا مش هتاخر عليك كلام من ده

علي فكرة أظن ان هو كدا شايفك راجل وبتقف معاة في مشاكلة علشان كدا بيلجئلك انت وقت الازمة. خليك معاة كدا بس زي ما الاخوة قالوا مرة تسلفة والتانية قلة عندك ظروف وكدا يعني, أكيد ممكن تحتاجة في يوم من الايام واعتقد والله وأعلم انة مش هيتأخر عليك أبدا. علي فكرة انا من نيحيتي بكون مبسوط من حاجة زي كدا ان حد محتاجني وصدقني مبتأخرش علية ابد ولا بستني انة يردهالي او حتي يقولي شكرا بكون فرحان كدا لما افك زنقة انسان .

لو السلفه هتأثر عليك يبقى قوله بشياكه معلش مزنوق. لو مش هتأثر عليك يبقى سلفه بس لما تفرج عليه اختبره ولو نجح في الاختبار يبقى حافظ على العلاقه ولو فشل يبقى اعمل حد للعلاقه بينكم.

والله انا شايف بلاش تسلفه المره ديه ...وشوف رد فعله ايه ...

بص يا باشا انت شوف هو محتججها ف ايه الاول
لو حاجة ضرورى جدا ادهاله كانك بتعمل حاجة لله
لو نفس الكلام زى كل مرة اتحجج باى حجه ومتخسروش بردو
ممكن انت اللى تحتاجه ف يوم من الايام

مع إحترامي لكل الأخوة الكرام اللي جاوبوك لكن أنا شايف إن مبدأ "يمكن تحتاجله في يوم من الأيام" هو مبدأ نفعي لا يختلف عن مبدأ صاحبك بمعنى إن ما يجعلني أحتفظ بصديق من وجهة نظر المبدأ دة هو الحاجة و المصلحة، أنا بقى شايف إن دة مش صاحبك و بناقصه أحسن ، دة لو كان صاحبك كان سأل عليك في مناسبة حكالك عن مشكلة و طلب رأيك ، طلب يشوفك ، يعني تحس أنه بيحبك لكن كل إتصال بيكون لمصلحة دي حاجة عيب و أنا شخصيا لا أحتفظ بمثل تلك العلاقات أبدا.