شد الفيشه بتاعت دماغك ..... و تعالى معايا ...
ازيكم يا اخوانى .... فى الصراع الانسانى ... بين الاشجار و المبانى ... و قنوات الاغانى ..
و انا بتمشى كده فى اروقه المنتدى ... شوفت شويه مواضيع ... انما ايه عنب ... حاجه تفرح القلب الحزين ..... يا سلام
سيبك انت بقى من الكلام ده كله ... و انفد بجلدك ده العلاج ببلاش ......
و انا نازل امبارح من الشركة ..... ركبت العربية .. و بفتح الكونتاكت .. لاقيت حاجه سوده طارت من جنب العربيه ... طلعت يمامه ...
افتكرت موقف حصلى لما كنت فى السعودية . بسبب موضوع اليمامه ده ..
كان رايح اصلى الظهر و معايا عامل بوفيه هندى ... و ماشين فى عز الحر ناحية الجامع ... و طبعا احنا البنى ادمين مدروخين من الحر ده و لمحت يمامه وقفه على الارض و عماله تاكل فى الرمل .. لاحظت الراجل الهندى ده عمال يبصلها بأعجاب و فخر .. و عمال يهز دماغه زى المخرطه ... و عمال يقول ( هاموراااانا ) ........كانه شاف غاندى ....ولا اميتاباتشان..
فأستغربت ....و قولت الراجل شكله جاله ضربة شمس ولا مخه اتشوى ...و قولتله ايه يا عم ؟؟؟ انت بتحب اليمام ولا ايه ...؟؟؟
طبعا الراجل ده العربى بتاعه مكسر و الانجليزى مدغدغ .. فحاول يفهمنى وقالى ...
مستر هسام : هذا طائر .. يشفى جميع امراض ... معلوم ... انت تعمل مريض .... دكتور كتير ايجى اكشف ... مافى علاج ... انت تاكل هاموررانا ...
انت .... مافى مرض ... انت اجرى زى حصان ...
انا : طبعا فهمت اللى هو عاوز يقوله ... قولتله يا عم انت مرضتنى بالكلام ده ... هامورانا ايه بس و بتاع ايه بس فى الحر ده ......
هو : مستر هسام ... جرب هدا ... امسك واحد هومورانا ... شوف نتيجه ....
ادى يا عم الهنود ... اللى احنا فاكرينهم متخلفين ... شوفت اد ايه هما متقدمين فى الطب .... لا حقن و لا كورتيزون ولا ميكروكروم
انا خايف بقى اخش على قناه الافلام الهندى ... الاقى اعلان بيقول ...
اذا كنت تعانى من جميع الامراض المستعصيه ... و جربت كل انواع العلاج الطبيعى و الصناعى و الاشعاعى و الكيماوى ... فاليك الحل الهندى ..
الهامورااااااااااااانا .... اطلبها الان .... مسلوقه .. او مشويه .. او صينيه ... او حتى بريشها ...
اضحك بقى على حساب المساطيل ده ........
ليا ناس قرايبى من بعيد ..عندهم قهوة فى شارع الازهر .... القهوة ده بتشغل 24 ساعه فى اليوم .. متقفلش خالص ... و طبعا هى بتاعت ورثه .. و طبعا هما ممكن يطبقوا باليومين و التلاته .......
و كنت قاعد معاهم مرة و هما بيتحاسبوا ؟؟ و ده بقى كانت عينه من الحوار اللى دار بينهم .... و انا قاعد بشرب فنجان قهو و عمال ابتسم
الاول : حضرت يا عم المونه ... على فكرة انا مش هستلم الا لما تكون المونه كامله ... مش عاوز اقف على حاجه ... و الفحم و الدنيا ده .. و تخلى العيال عندك يسيخوا الشيش كويس ... الناس بيقطع نفسها و هى بتسحب النفس .....
التانى : يا عم متشغلش بالك خالص ....الدنيا حلوة ... المونه موجوده... و الدنيا سالكه و تمام التمام ....
الاول : اه بالمناسبه .... فين يابنى الحساب بتاع الاسبوع اللى فات ... انت بتستقرضنى يا عم انت ولا ايه ؟؟؟؟
التانى : احنا هنستهبل ما انت واخد الحساب ... انا مديلك الحساب ده ... بطل شغل الحوارات ده ....
الاول : حساب مين يا عم ... يا عم انت انا مخدش منك مليم ... و صوته على شويه ... متحضرنا يا عم حسام ... طب اديتهولى امتى ؟؟؟
التانى : بأنفعال واضح ... يا سيدى ... انت واخد الفلوس ده يوم الخميس ... و على الترابيزة ده ... وقام رازع على الرخامه بتاعت الترابيزة ...
الاول : خميس مين يا عم انت ...انت عبيط ... اذا كنت انا نايم الاربع .. صاحى الجمعه بعد الصلاة ... يبقى اخدته امتى بقى !!!!!!!!!!!!!!
و هنا بقى انا كنت لسه بشفط اخر شفطه من فنجان القهوة و مقدرتش امسك نفسى و قمت باخخ شفطه القهوة باللبن فى وشه من كتر الضحك ..
ناقص انا .... حلوة ده .... قال نايم الاربع .. صاحى الجمعه ...
و بعد ما هديت ... قولتلهم ... انتم مين اصلا ... و انا ايه اللى جبنى هنا ....و ايه الهباب اللى انا بشربة ده ... و شكيت انى مش هعرف عنوان بيتنا ..
هو الزهايمر ده بالوراثه ؟؟؟؟؟؟؟؟؟؟؟؟؟
