عرض للطباعة
بليز يا جماعة عاوزة اروح يوم الجمعة دار المدفعية اللي في شارع الثورة في مصر الجديدة علشان معزومة على فرح هناك .. ياريت حد يوصف لي اروح ازاي لاني مش شاطرة في الطرق.. انا حاروح من بداية طريقي من عمارات الاغا خان على كورنيش النيل امام الهابي لاند .. يا ريت الوصف يكون بالتفصيل والعلامات ان امكن يعني وانا ماشية حاجد ايه في طريقي لاني خايفة اتوه ، وكمان ارجع ازاي ارجوكم
حضرتك تطلعى كوبرى اكتوبر اتجاه مصر الجديدة و المطار و تنزلى نزلة العروبة (صلاح سالم) تمشى صاح سالم هتعدى البانوراما و تكملى على طول تنزلى نفق العروبة هتطلعى قصر البارون هيبقى على يمينك بعد اما تخرجى من النفق.....تانى شارع يمين بعد سور القصر (دخلة شارع الثورة)
تكملى فى الشارع على طول هتلاقى دار الإشارة و بعدها دار المدفعية (بوابتها كبيرة)
ميرسي ليك كتير على ردك .. لكن عاوزة استفسر اكتر من حضرتك.. وانا فوق كوبري اكتوبر انزل منه على أي نزلة انا عارفة النازلة اللي بتوديني على مدينة نصر لان مكتوب ليافطة كبيرة موضحة بالاسهم ، فياترى فيه يافطة توضح النزول على مصر الجديدة وبالنسبة للنفق هل برضه في يافطة .. اسفة والله على الاسئلة الكتير لكن ده لاني مش عارفة الطرق كويس لاني لسة جايبة السيارة جديدة وكنت باركب قبل كدة تاكسيات ومش باعرف الطرق .
نزلة صلاح سالم هى أول نزلة بعد اما العباسية......بمعنى أول ما تشوفى جامع النور فى العباسية امسكى يمين الكوبرى و انزلى أول يمين يقابلك
و بالنسبة لنفق العروبة هو مفيش غيره فى الإتجاه اللى هتبقى ماشية فيه ......عدى البانوراما (على يمينك) و بعدها عمارات العبور على شمالك و كملى على طول لحد أما تلاقى النفق تنزليه تمشى حاجة بسيطة هتلاقى قصر البارون على يمينك ...ادخلى تانى يمين بعده هتلاقى عنده يافطة بتقول شارع الثورة
http://img201.imageshack.us/img201/9...ntation1fm.jpg
بعد أما تدخلى شارع الثورة امشى على طول هتعدى من تحت 2 كوبرى (الميرغنى و كوبرى النزهة) بعدهم هتمشى شوية هتلاقى دار الإشارة و بعدين دار المدفعية
و أى استفسار تانى مفيش مشكلة
السلام عليكم ورحمة الله وبركاته
مع كل الاحترام للوصفات السابقه
اسمحوا لى ان اسرد الطريق بعد اذنكم
طبعاً طالما حضرتك هتكونى على كوبرى اكتوبر يبقا حضرتك قطعتى شوط معقول فى المشوار
حضرتك لو نزلتى نزله مدنيه نصر هتكون بعديه شويه على حضرتك
فمن الافضل لحضرتك انك تنزلى نزله صلاح سالم يمين من كوبرى اكتوبر اتجاه المطار
والنزله دى قبل نزله مدنيه نصر ومعلومه بس خلى حضرتك فى اليمين وعلى مهلك فى نزولها لان لفتها صعبه شويه وخلى حضرتك ماشيه فى الطريق لحد متلاقى محطه بنزين التعاون كملى هيكون بعدها شارعين يمين اولهم شارع يوسف عباس على ناصيته جامع المصطفى والثانى شارع الطيران بعد متعدى حضرتك شارع الطيران خليكى فى اليمن منتزليش نفق العروبه وخلى حضرتك من فوق وخليكى مع الطريق يمين والطريق بيلف مع حضرتك هتلاقى مترو الميرغنى على شمال حضرتك الطريق ده اسمه طريق الميرغنى خلى حضرتك ماشيه فى الطريق على طول بس خليكى فى اليمين عشان هيقابل حضرتك كوبرى الثوره متطلعهوش وخليكى من تحت يمين دا اسمه شارع الثوره وهيبقا على بعد خطوات سنترال الماظه خليى حضرتك فى يمين الطريق على قد ماتقدرى وعلى بُعد حوالى 500 او 600 متر هتلاقى دار الأشاره وكمان فيه كافيه على اليمن جنبها بعدها على طول دار المدفعيه وامامها من الجانب الاخر شركه ايديال
تذكره دخول السياره(5) جنيهات
وكل فرد فى السياره (5) جنيهات دا للمدنين
طبعاً انا مبدفعش عشان معايا كارنيه دار المدفعيه ههههههه
على فكره انا باروح دار المدفعيه كل اسبوع
سواء كنت جاى من الزيتون او المعادى
وهيه ليها طرق كثيره للوصول بس انا حبيت اوصف الطريق من كوبرى اكتوبر طالما حضرتك مشيتى عليه
لان فى وصفه تانيه للطريق من عمارات اغاخان مقر السكن الى طريق السواح وكوبرى قصر الطاهره وقصر القبه بس محبتش اوصفها عشان فهمت ان حضرتك كان كل مشاويرك بالتاكسى
ومبروووووووك السياره
كل الود لحضرتك
وكل الاحترام لكل من سبقنى بوصف الطريق
لكم منى جميعا كل الاحترام
ميرسي ليكم والله .. متشكرة جداااااااااااااا