خاطرة عن قصة سيدنا يوسف

**OlaOsman** · 09-06-2008 06:11 PM

دي خاطرة كنت كتبتها من شهور في مدونتي و حبيت أشرك فيها اخواتي في نايل موتورز :)

اللي يتأمل في سورة يوسف و قصة النبي العظيم ده يلاحظ انه بعد ما صمد امام إغراء امرأة العزيز و استغاث بربه انه ينجيه من فتنتها و ربنا استجاب له.. بعد ما عمل الطاعة الجامدة اوي دي و بعد نفسه عن الكبيرة دي.. حصل له ايه؟ تاني يوم مثلا لقى نفسه عزيز مصر؟ أو ملك مصر كرمه و ولاه منصب هام في الدولة؟.. طيب لقى بنت الحلال و تزوج بعدها على طول من امرأة حسناء؟ و لا رجع لأبوه و إخوته عرفوا خطأهم و أخدوا جزائهم؟.. طبعا معروف ان و لا حاجة من دي حصلت.. و اللي حصل برضه معروف و هو انه تعرض لفتنة أخرى من النساء اللاتي قطعن أيديهن و استغاث سيدنا يوسف بربه مرة أخرى ان يقيه فتنتهن و ألا يصب إليهن.. و بعدها على طول برضه حصل ايه؟ ببساطة إتــــســــجــــــن!

لما نيجي نقيس على نفسنا هنلاقي ان بعضنا لما بييجي على نفسه اوي و يبعد عن معصية او يعمل طاعة هو ما كانش قادر عليها، بيحط دي في باله اوي.. و يكون عاملها و هو متغصب على نفسه اوي.. و لما ينجح في انه يتجنب معصية ما مثلا بيقعد مستني الجزاء من ربنا.. هاه.. فين الجوايز اللي هاتنهال علية من السماء و فين الفتح و الرزق الوفير؟ عشان كده للأسف لما الصمود امام فتنة في حالة بعض منا بيعقبها إبتلاء بننقلب على أعقابنا و نتحول لناس آخرين غير اللي كانوا من شوية صامدين امام الفتن و جامدين اوي.

تعالوا برضه نتأمل سيدنا يوسف عمل ايه لما دخل السجن؟ هل قال في نفسه يعني لما أطعت ربنا و صمدت امام فتنة زي دي اتسجنت.. امال بأه لو كنت عصيته كان حصل فية ايه؟.. ده ممكن يكون رد فعل بعضنا.. انما سيدنا يوسف اللي عمله لما دخل السجن انه بدأ يشتغل.. ما ضيعش وقت في الحسرة و التفكير و ليه ربنا عمل فية كده؟.. انما بدأ يدعو رفقائه في السجن و كسب ثقتهم و لبث في السجن بضع سنين.. ياااااااااه.. بضع سنين؟ يعني بعد الفتنة و الانتصار عليها هي و فتنة أخرى من نفس النوع و ظهور الحق لعزيز مصر واضح امامه النتيجة كانت سجن؟ و سجن بضع سنين كمان؟ مش 6 أشهر مثلا او سنة؟ امال احنا مالنا هشين كده ليه؟ من أقل ابتلاء تلاقينا انهرنا و بدأنا ننعي حظنا؟ فين الثقة في حكمة الله في تدبير الأمور و انه هو يدبر الأمر؟

طبعا الكلام في الموضوع ده يطول بس حابة أركز على الخاطرة اللي كتير مننا مش واخد باله من ان ليس بالضرورة ان طاعة معينة او بعد عن معصية معينة يعقبه الجائزة الكبرى أو حدوث المعجزات.. ممكن برضه يعقبه ابتلاء أشد و ساعتها علينا الصبر و الاحتساب و اليقين في رحمة الله و عدله و حكمته.

**Chicco** · 09-06-2008 08:17 PM

جزاك الله خيرا يا علا ...هي ديه الطبيعة البشرية ...

{ وَإِذَا مَسَّ الإِنسَانَ الضُّرُّ دَعَانَا لِجَنبِهِ أَوْ قَاعِدًا أَوْ قَآئِمًا فَلَمَّا كَشَفْنَا عَنْهُ ضُرَّهُ مَرَّ كَأَن لَّمْ يَدْعُنَا إِلَى ضُرٍّ مَّسَّهُ كَذَلِكَ زُيِّنَ لِلْمُسْرِفِينَ مَا كَانُواْ يَعْمَلُونَ } [يونس: 12].

{ وَإِذَا أَنْعَمْنَا عَلَى الْإِنسَانِ أَعْرَضَ وَنَأى بِجَانِبِهِ وَإِذَا مَسَّهُ الشَّرُّ فَذُو دُعَاء عَرِيضٍ} [فصلت: 51].

**A7madfathy77** · 10-06-2008 10:04 PM

فعلا عندكو حق بس الانسان دايما بيطمع فى كرم ربنا سبحانه و بيحتاج انو يحس انه عمل حاجة صح فبيستنى مكافاته عليها

**OlaOsman** · 11-06-2008 08:07 AM

المشاركة الأصلية كتبت بواسطة Chicco

جزاك الله خيرا يا علا ...هي ديه الطبيعة البشرية ...

{ وَإِذَا مَسَّ الإِنسَانَ الضُّرُّ دَعَانَا لِجَنبِهِ أَوْ قَاعِدًا أَوْ قَآئِمًا فَلَمَّا كَشَفْنَا عَنْهُ ضُرَّهُ مَرَّ كَأَن لَّمْ يَدْعُنَا إِلَى ضُرٍّ مَّسَّهُ كَذَلِكَ زُيِّنَ لِلْمُسْرِفِينَ مَا كَانُواْ يَعْمَلُونَ } [يونس: 12].

{ وَإِذَا أَنْعَمْنَا عَلَى الْإِنسَانِ أَعْرَضَ وَنَأى بِجَانِبِهِ وَإِذَا مَسَّهُ الشَّرُّ فَذُو دُعَاء عَرِيضٍ} [فصلت: 51].

فعلا يا شيكو.. و يا رب نتعلم من قصص القرآن عشان القصص دي دروس لينا كلنا.

**hero** · 11-06-2008 11:06 AM

المشاركة الأصلية كتبت بواسطة OlaOsman

ان يقيه فتنتهن و ألا يصب إليهن.. و بعدها على طول برضه حصل ايه؟ ببساطة إتــــســــجــــــن!

بس خلي بالك يا علا .. سيدنا يوسف علية وعلي نبينا الصلاة والسلام ...هو ايلي اختار السجن...وربنا استجاب لية...

"

قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ وَإِلَّا تَصْرِفْ عَنِّي كَيْدَهُنَّ أَصْبُ إِلَيْهِنَّ وَأَكُنْ مِنَ الْجَاهِلِينَ"

وعلشان كدة الرسول علية الصلاة والسلام...أمرنا اننا ما نطلبش الفتنة...ولا نتمني لقاء العدو....يعني لو سألنا الله ....نسألة العفو والعافية...

وأسأل الله العفو والعافية ...وألا يجعلنا فتنة للقوم الظالمين...

**wawoo** · 11-06-2008 11:38 AM

قصة سيدنا يوسف دى من اعجب قصص القران , و من عجاب القصة ان حياتة كلها كانت رؤية شفها فى المنام , و اصبحت حياتة كلها هى تحقيق لهذة الرؤية ......سبحان الله
يمكن عشان كدة كان سيدنا يوسف من مفسرين الرؤى .... يعنى الكرامة من جنس الحالة .

التأمل فى هذة لقصة لا ينتهى , يعنى من بئر فى الصحراء لامين على خزائن مصر , ياة شوف ربنا ازى لما بيقدر لعبد من عبادة .

بالنسبة لخاطرك يا علا , انا اعرف ان الابتلاء بيكون على قدر الايمان و اشد الناس ابتلاء الانبياء ثم الصالحون و هكذا , و على الفكرة الابتلاء مش بالمصائب بس , دة ساعات الابتلاء بالنعم بيكون اكبر , يعنى ممكن واحد يبتلى بمال كتير , او اولاد كتير او نعم كتير , دة ابتلاء زية زى المصائب بالضبط ,
عشان كدة الواحد لازم يكون واعى و يحمد للة على كل حال مهما كان , لانة لا يعمل اين الابتلاء ,

الجائزة الحقيقية هى دخول الجنة , مافيش جوائز حقيقية فى الدنيا, الدنيا دى كلها ابتلاء سواء بالنعم او بالمصائب . ربنا يرحمنا و يسترها معانا .

**bee** · 11-06-2008 12:18 PM

معاكي حق يا علا فعلا
واحب أضيف .. إن مش المفروض الواحد يقارن بينه وبين سيدنا يوسف
لان مهما كان الواحد جميل هييجي ايه جمب نبي ربنا منحه من الجمال الكثير .. :)
وهو اختار بردو ميغضبش ربنا .. بالرغم من المغريات .. الا انه مؤمن (((صادق)))
يا رب يكون لنا كلنا قدوه ..
شكرا على موضوعك
تحياتي

**aif** · 13-06-2008 03:53 PM

استكمالا للعبر الموجودة بالسورة الكريمة ....
دائما المشهور عن يوسف عليه السلام هو جماله .... لكن لو نظرنا للقصة سنجد جمال آخر ... اكثر جمالا من جمال الشكل ... جمال الخلق بضم الخاء واللام (الأخلاق )...
لما إمرأة العزيز اتهمته بهذه التهمة الباطلة ....وطالبت بسجنه وتعذيبه ... وهو بريء ....لم يقل إلا كلمات معدودة .... هي راودتني عن نفسى .....لم يشهر بها ويذكر ما فعلته وما كانت تحاول فعله منذ وقت طويل ... لم يذكر اي تفاصيل برغم انها يمكن ان تكون دليلا على براءته ......
موقف آخر ...إخوته ... ضربوه وعذبوه وكادو يقتلوه .. والقوه في البئر ... عاريا ...وسط الافاعي والحشرات ....وبعد ان مكنه الله منهم و دبر الحيلة ليأخذ اخاه معه بعد ما اصبح هو العزيز ....كان رد فعلهم ينم علي انهم مازالو يكرهونه ويحقدون عليه برغم مرور تلك السنوات الطويلة ( قالوا إن يسرق فقد سرق أخ له من قبل )....
برغم ذلك بمجرد ان اعترفو بخطأهم.... قالوا تالله لقد آثرك الله علينا وإن كنا لخاطئين ْ91ْ قال لا تثريب عليكم اليوم يغفر الله لكم وهو أرحم الراحمين ْ92ْ
لم ينتقم منهم ...لم يوبخهم ... لم يحاسبهم علي ما فعلوه
وعندما ذكر ما حدث لأبيه لم يبدأ بخطأهم .... بل قال ان الشيطان قد نزغ بينه و بينهم .... قدم نفسه في نزغ الشيطان .....
وعندما ذكر نعمة الله عليه لم يذكر ان الله انقذه من الجب .... حرصا علي عدم إيذاء مشاعر اخوته التائبين وتذكيرهم بفعلتهم بل قال ....وقد أحسن بى إذ أخرجنى من السجن وجاء بكم من البدو من بعد أن نزغ الشيطان بينى وبين إخوتى..
فعلا أخلاق نبوه ...كما قال عنه الرسول عليه الصلاة والسلام ...
الكريم ابن الكريم ابن الكريم ابن الكريم ....يوسف بن يعقوب بن إسحاق بن إيراهيم
عليهم وعلى نبينا الصلاة والسلام