الموضوع: فيات 132

ايه يا اشرف بيه الي رماك ع القديم ؟

ال 132 عربيه لزيزه و واسعه و فيها شويه اوبشنز
بس لو لقيت حاله نضيفه !

هي موديلاتها من 72 ل 80 و بعدين نزلت الارجنتا التعديل بتاعها من 81 ل 84
طبعا الارجنتا تفرق كتير اوي عن ال 132 ف الفخامه و الشياكه

طبعا الصالون واسع جدا و العربيه كبيره و لو جبتها اقل من 2000cc مش هاتعجبك
و طبعا فيها باور و تاكيف و ازاز كهربا
عيبها بتشرب بنزين لو مش مظبوطه ,لكن لو مظبوطه هايبقى استهلاكها معقول اوي

طبعا انت بتتكلم ف ماتور 2 كامه ساعه ما كان اختراع :D ف العربيه دي لو مظبوطه بتشد و تجري و بتقفل العداد

الفرامل علي سكاكين ورا و قدام

الماتور ال 2000 هو الي بينزل بتاكيف و باور


هاقولك ايه تاني غير دور علي حاله نضيفه اوي و متحافظ عليها
دور علي حاله نادره
اقعد دور و دعبس كدا لحد ما تقع قدامك واحده نضيفه ,بس ماتتوقعش انك هتاخدها تجري بيها! لا لازم هاتصرف شويه ف الاول و بعدين تبقى صيانه دوريه فقط لا غير

اسعارها من اول 8000 لحد 22000 علي ما اتذكر
موديلات ال 132 بتفرق اسعارها عشان الماتور و الحاله و ف المتوسط هاتبقى ب 15-17 الف
لكن الارجنتا ممكن تعلى شويه تبقى في حدود 20000 و علي حسب الحاله

بص ال 132 نزلت بالماتور ال 2000 كاساسي
المواتير التانيه بتبقى ضعيفه ع العربيه, العربيه دي عايزه ماتور عفي عشان تحس بالراحه و ماتحسش انها ناقصه حاجه

المهم, الماتور ال 2000 ف الفل اوبشنز كان نازل بباور و تاكيف
بس مع عوامل الزمن و عدم اهتمام معظم الي معاهم العربيه دي بالتاكيف بيبوظ طبعا بعد 30 سنه
لكن يركبلها تكيف عادي بس المهم يكون الضفيره بتاعته موجوده عشان مايبقاش فيه لعب كتير

طبعا ف السفر ماقولكش هاتبقى مريحه جدا
و اهم حاجه ترموستات الكوع عشان الماتور مايهلكش من السفر
العربيات دي لما بتبقى مظبوطه بتبقى هاديه اوي حتى ف الشد و الجري
مع العوازل الحراره و الصوت بيبقى الماتور صوته يكاد يكون مسموع

طبعا يفضل تدور علي الارجنتا لانها احدث طبعا و يمكن شكلها احلى شويه


انا دلوقتي يمكن قدامي شاهين ,لكن 132 صعب
لكن لو لقيت حاله كويسه او لو لقيت حاجه قريبه منها حالتها كويسه اكيد هاقولك