الجزء الثاني من سلسلة سلوكيات القيادة - الحلقة الثالثة (افساح الطريق لسيارة الأسعاف)
السلام عليكم ورحمة الله وبركاته
اخواني واخواتي اعضاء نايل موتورز
اتوجه بالشكر لكل عضو فعال هنا في المنتدي كتب موضوع واستفاد به باقي اعضاء المنتدي
ومن هذا المنطلق - اطلقت سلسلة من 12 موضوع تتناول سلوكيات القيادة
واليكم رابط هذه السلسلة لكي يتثني للجميع مراجعة موضوعاتها
سلسلة سلوكيات القيادة
بداخل هذا الموضوع روابط لكل حلقة من حلقات السلسلة المكونة من 12 حلقة
والأن اقدم اليكم الجزء الثاني من السلسلة
تحت مسمي سلسلة سلوكيات القيادة الأمنة
وايضا سوف اتناول في هذه السلسلة موضوعات تتعلق بسلوكيات القيادة وموضوعات اخري تتعلق بالقيادة الأمنة
وبالفعل قد اطلقت موضوعين يتناولان هذا الفرع من السلسلة وهو القيادة الأمنة
الموضوع الأول بعنوان بتمسك الدريكسيون ازاي ؟؟؟
أضغط علي الرابط لمشاهدة الموضوع - بتمسك الدريكسيون ازاي ؟؟؟
الموضوع الثاني بعنوان بتسيب مسافة قد ايه بينك وبين الي قدامك ؟؟؟
أضغط علي الرابط لمشاهدة الموضوع - بتسيب مسافة قد ايه بينك وبين الي قدامك ؟؟؟
سلسلة سلوكيات القيادة 2 - الحلقة الثالثة (افساح الطريق لسيارة الأسعاف)
اليوم سوف اتناول معكم موضوع جديد بالغ في الأهمية والخطورة
بعنوان افساح الطريق لسيارات الأسعاف
الشركة الي انا شغال فيها ليها فرع في شارع مراد بالظبط قدام مجلس الدولة
وما ادراك شارع مراد علي العصرية كدة - ابتداء من الساعة 3 تقريبا لحد المغرب يعني علي الساعة 6 كدة
مش قادر اوصفلكم حالة الشارع عاملة ازاي
تقريبا متوقف تماما
وانا واقف في البلكونة المطلة علي شارع مراد بحس اني ببص علي جراج كبير حبتين
كل العربيات واقفة لازقة في بعض دون حراك
ووسط هذا السكون سمعت صفارة تدوي
ببص علي شمالي ، واذا بها سيارة اسعاف تستغيث
وقائد السيارة يناشد جميع السيارات بافساح الطريق له لوجود حالة حرجة معه
ولكن في ظل هذه الزحمة لا استجابه لندائه
نفس المشهد يتكرر في شارع التحرير
هذا الشارع ابتداء من مركز البحوث وحتي الكوبري الخشب ايضا مزدحم جدا ومكتظ بالسيارات
ويتكرر المشهد كثيرا علي اختلاف الشوارع
كوبري اكتوبر
شارع الجلاء
جسر السويس
المدهش في الموضوع
تلاقي حد فتح الطريق واول لما العربية تعدي
تلاقي تصارع وتكالب علي الفوز بالمركز الأول عشان ابقي اول عربية في ظهر الأسعاف
وغالبا الصراع بيفوز بيه سواق تاكسي فيرنا أبيض مجنط ومفيم الفوانيس الخلفية احمر
وكأن مثلا الي هيمشي ورا العربية هيفوز فعلا بسباق وياخد في نهاية التراك - قصدي الشارع جايزة او وسام او كاس ذهب
ومرة تانية كنت راكب ميكروباص تويوتا
كنت شغال في جامعة حلوان - كلية التربية
وعلي طريق الأوتوستراد عربية اسعاف تطلق الصفارة الشهيرة
واذ بسائق الميكروباص العند يركبه مش هعدي الأسعاف
وفجأة يتحول وكأن ركبه عفريت وهاتك يا غرز قدام الأسعاف وبيتسابق مع الأسعاف
وبعقليته المريضة يقفل الطريق علي الأسعاف ويقول بنبرة ساخرة ممزوجة بالهبل "وريني بقي هتعدي ازاي؟"
نفس الكلام ينطبق علي سيارة المطافي
بعد كل المقدمة الطويلة دي
عايز اقولكم الرسالة
المفترض بمجرد سماع السرينة بتاعة الأسعاف او المطافي
يجب فورا التزام يمين الطريق - او يساره علي حسب الحالة
وافساح الطريق لهذه السيارة
المشكلة بقي هنا في حاجة تانية
تركيب معظم الشباب لسرينة الشرطة المتشابهة جدا في صوتها مع سرينة الأسعاف والمطافي
ودي نتيجتها ايه ؟
الناس ألفت علي سماعها وبالتالي التباطؤ او التخاذل عند سماعها من سيارة الأسعاف
Best Practice
1- رجاء خاص بعدم تركيب او استخدام سرينة الأسعاف او المطافي
2- بمجرد سماع السرينة - النظر في المرآة الجانبية او الصالون لتحديد موقع السيارة وبالتالي التزام الجانب الأخر من الطريق
3- حث باقي قائدي السيارات علي افساح الطريق عن طريق الأشارات الضوئية او استخدام الكلاكس ان لزم الأمر
4- استخدام فلاشر الأنتظار وتهدئة السيارة حتي تعبر سيارة الأسعاف والتزام حارتك المرورية وعدم التهافت علي اتباع سيارة الأسعاف
واخيرا
عفانا الله واياكم ولكن لو كل منا وضع نفسه مكان اخ او اب او ابن لمريض تسبب زحام الطريق في تأخر وصول المريض للمستشفي لكان اولي به عند رؤيته لسيارة الأسعاف ان يقفز بسيارته فوق الرصيف لأفساح الطريق لسيارة الأسعاف
كفانا الله واياكم شر المرض
بنفس المنطق سيارة المطافي والتي لا تقل اهمية عن سيارة الأسعاف
والله لقد رأيتها بعيني
سيارة مطافي تقفز من فوق الحاجز بين فواصل الطريق لتمشي عكس اتجاه السير وبسرعة جنونية حتي تستطيع اللحاق بمكان البلاغ وكان الدافع وراء ذلك - ازدحام الطريق
والله المستعان
،
،
أقرأ ايضاً
http://www.nilemotors.net/Nile/250792-a.html#post3873863212
http://www.nilemotors.net/Nile/263490-a.html#post3874012575
