الحلم المصري

**ashour** · 10-06-2008 03:25 PM

انا مبسوط جدا من تصورات الاعضاء الاعزاء Ahmed Samy و AhmedAbdfat .

و فعلا هو ده اللى كان نفسى اقراه و منتظر حلم باقى الاعضاء

اما بالنسبه للى اتقال هل الحاجات ديه مستحيله التنفيذ؟؟؟ و لا صعبه بس؟؟

انا هاحاول ارد لكل رد على حده بطريقة الاقتباس.

**ashour** · 10-06-2008 03:37 PM

المشاركة الأصلية كتبت بواسطة Ahmed Samy

طب اسمع بقى
ولو ان اللي هاقولهولك ده بيقلب المواجع
وأأأأأأأأأأخر مرة فكرت فيه كان من زممااااااااااااااان قوي

نفسي مصر تكون بلد القوة
يبقى عندنا أقوى جيش ولينا نفوذ في المنطقة
و لينا سعر (يعني المصري ده يتشال على الراس)

و نفسي أمشى في البلد على رجلى أنا و مراتي و ماتخانقش مع عيل صايع

نفسي مايبقاش في عيال صيع كتييييير زي دلوقتي

نفسي ألبس تريننج و انزل أجري في الشارع أو أركب عجلة والف بيها البلد يوم الأجازة

نفسي اشتغل و أنا مبسوط و أجيب فلوس و اتمتع بيها بجد جوا بلدي كمان

نفسي ولادي ...........

ولادي !؟!؟!؟!؟!؟!؟!!؟

طب كفايه كده علشان الحلم هايبوظ بقى

أنا هاحلم للولاد كمان

بالنسبه لموضوع الجيش.. الحمدلله جيشنا يعتبر كويس بس اللى ينقصه الامكانيات مش الماديه لان حتى لو معانا فلوس مش هيدونا كل اللى نحتاجه لينا حد معين... موضوع السعر ده فى المقام الاول بيتوقف اولا علينا لان احنا اللى بنواجهه المشكله و من ثم بيتم تصعيدها الى مستوى الخارجيه.. نخلينا فى ما يخصنا للاسف ان رصيدنا الاحترام لينا عند الدول الاخرى قل بشكل حاد الا انه ممكن يزيد بس محتاج مننا تضحيات كتير... هل احنا قدها؟؟؟ و مستعدين نقوم بيها؟؟؟

بالنسبه لموضوع التمشيه و الجرى و العجله... فهى موجوده فى بعض الأحياء
انا معاك انها قليله بعض الشىء لكنها موجودة فعلا تبقى المشكله فى نسبتها قليله
و يمكن حلها فى المدن الجديده... لان فعلا القاهرة مبقاش ينفع يتعمل فيها الكلام ده.

فى انتظار المزيد من حضرتك.

**ashour** · 10-06-2008 04:12 PM

المشاركة الأصلية كتبت بواسطة AhmedAbdFat

بص يا سيدى

الحلم اللى باحلمه لمصر

التخلص من العصابة **** السارقة المحتكرة لمصر

تطبيق الشريعة الاسلامية و توحد كل الدول الاسلامية من المحيط للمحيط فى دولة الخلافة و عاصمتها مصر

استرجاع كل علماء مصر بالخارج و البدء فى نباء البنية التحتية و الاهتمام بالتعليم و البحث العلمى

نفسى التعليم كله يتعرب بدل ما كل حاجة بالانجليزى اوربا لم تتقدم الا بعد ما ترجمت من علوم المسلمين

نفسى المدارس والكليات تبقى مكيفة

نفسى يتغير السلوك العام للمواطن المصرى الذوق الاخلاق احترام الاخر تطبيق القانون حب العمل و اتقانه

نفسى المصالح الحكومية تتطور و تبقى منظمة و سهل التعامل معها و الموظف يضحك فى وش المواطن

نفسى الاعمال الفنية كلها تبقى هدفة و قريبة من نبض الشارع و مشاكله والافلام بتاعتنا التى تحمل فكرنا الاسلامى العربى تترجم للغات كتير و الناس تحاول تقلدنا بدل العكس

نفسى يسفلتوا الشوارع و السواقين يحترموا المرور و الناس كلها تمشى على الرصيف

نفسى ما يبقاش فى سواقين مشاريع (ميكروباصات)

و نسفى حد تانى ياخذ توكيل هيونداى غير مستر غبور :)

نفسى يبقى عندنا مفاعلات نووية علشان البترول كمان كام سنة هينضب

و ايضا اسلحه نووية (اشمعنا اسرائيل)

و نفسى يبقى عندنا شركة سيارات عملاقة قوية كلنا نشترى منها ونقفل بقا كل اقسام المنتدى و نخليه قسم واحد

نفسى الجملة دية تتقال هنا فى المنتدى

((( لأ بلاش العربيات اليابانى ده تعبانة قوى وعمرها الافتراضى قليل زود شوية فلوس وهات العربية المصرية انظف و تقفيلها احلى و محركها اقوى والغالى تمنه فيه والمصرى مصرى برضة )))

نفسى ناخد كاس العالم والدورى بتعنا يبقى انظف من الدورى الانجليزى و رونالدينو و ميسى و هنرى يجوا يحترفوا فى الزمالك (الاهلى لأ)

نفسى الناس فى اوربا كلها تحاول تيجى تهاجر لبلدنا حتى لو هجرة غير شرعية

هقول ايه ولا ايه ولا ايه ...........

الله المستعان

ايه رأيك بقى ان موضوع العصابه ديه امروه سهل بس احنا اللى مكسلين..
عارف ليه؟؟؟
لان من 56 سنه احنا شلنا نظام ملكى بحاله مبالك بحتت حزب!!!

بصراحه موضوع الخلافه ديه صعب شويتين لان كل الدول اللى كانت عبارة عن عده امم فى كيان واحد انشطرت و تفتت بشكل كارثى... مش بعيد نلاقى الولايات المتحدة هى كمان تنشطر كده... لولا توزيع السلطه المعقد اللى عندهم.

و تعريب التعليم... هى كانت زمان تعتبر سلطه من المستعمر اننا ندرس بلغته بس دلوقتى اصبحت ضرورة من ضروريات العولمه و على فكرة فى الجانب الاخر برضوه بيتم دراسه اللغه العربية و التاريخ الاسلامى و خلافه... بقى عيزهم هما يعرفوا عننا و احنا لا ده الشاطر اللى يعرف اكتر عن التانى.....
بس ممكن حضرتك تكون قاصد استخدام الانجليزى فى اللى ليه لزمه و اللى ملوش
انا بصراحه فى النقطه ديه عندى قناعه اللى بشوفه عمال يحشور الانجليزى فى كلامه ده بعرف انه بيخبى نقص فى شىء ما او بيتظاهر بشء اخر.

المكيفات ديه امرها مقدور عليه ممكن نلم من بعضنا :).
و إن شاء الله غبور يحصلوه ازمه ماليه و ربنا يكرمك و تاخد انت التوكيل... بس ابقى اتوصا بينا بقى .

موضوع السلوك ده بقى اصعب حاجه لان ده بيعتبر التاج اللى بيتوج انضباط و تقدم الدول... ممكن تبقى دول متقدمهو كلو تمام بس اخلاقها و سلوكيتها مش قد تقدمها.

بعد التاج بقى يجى الاعتماد على الطاقه النوويه و من ثم انتاج الاسلحه النوويه(انا شاكك ان اسرائيل عندها اسلحه نوويه و قصه ديدمونه ديه مقصود تصديرها بس ده ميمنعش التحضير لاى مفاجئه).

المصالح الحكوميه انا كمان نفسى كل حاجه تبقى الكترونى بدل شويه الناس اللى كارها نفسها اساسا.

انا كمان عندى حلم سيارة مصريه و مجهزلها لوجو بس لو على عايزها تبقى بالمواصفات اللى حضرنك قلت عليها بس بسعر كويس فى متناول الكل.

الدورى فعلا نفسى يبقى عندنا دربيات كتير و قاعده اوسع للانديه المنافسه على اللقاب.

فى انتظار المزيد من حضرتك.

**hamedo0** · 10-06-2008 08:10 PM

يا جماعه بلبلدى كده احنا ميت فل و 14 بس يبعدو عننا ولاد الحرام
اما الحلم نفسي كل واحد غاوى حاجه يدرسها لانه اكيد حيبدع فيها مش واحدغاوى هندسه التنسيق يدخله زراعه وباحلم بـ اول سياره مصريه 100% والحلم ده مش صعب بس يبعدو عنا ولاد الحرام

**Ahmed Samy** · 10-06-2008 08:23 PM

المشاركة الأصلية كتبت بواسطة AhmedAbdFat

نفسى الجملة دية تتقال هنا فى المنتدى

((( لأ بلاش العربيات اليابانى ده تعبانة قوى وعمرها الافتراضى قليل زود شوية فلوس وهات العربية المصرية انظف و تقفيلها احلى و محركها اقوى والغالى تمنه فيه والمصرى مصرى برضة )))

الله المستعان

ياااااااااااااااااااااه
نفسي اشوف الجملة دي
لما قريتها حسيت بنشوة كده

**Goodle** · 10-06-2008 08:35 PM

إوعدنا يا رب

**tutankhamoun** · 10-06-2008 08:49 PM

حلم مواطن مصري
بالنظام ...................... النظام هو المفتاح للتقدم

و لكن أين يوجد النظام في نفوس المصريين ........... إنه صفر و صفر و صفر و صفر و تجمعهم و يف الأخر يطلعوا صفر

و دي بداية الحضارة

و كل الكلام اللي قيل لو بدأ بوجود نظام في كل شئ سيتم تحقيقه بسهولة

و البداية يجب أن تكون من الشعب أساسا
لأن الحكومة من الشعب
و مادام الشعب اي كلام ................ يبقى عايزين النظام الحكومي يبقى شكله أيه ؟؟؟؟؟

الشعب مش عايز يبقى منظم ........... مع إنه يتكلم كتير عن عدم وجود نظام
و نيجي للفعل .......... اول واحد يخالف النظام

و هو ده الحلم المصري لمواطن مصري ............ بيكره الفوضى للمواطنيين المصريين

**MoToRiZeR** · 10-06-2008 08:53 PM

الحلم المصري من الأحلام اللي تحلمها و اول ما تصحي و تفوق متفتكرهاش

**ashour** · 10-06-2008 09:01 PM

المشاركة الأصلية كتبت بواسطة tutankhamoun

حلم مواطن مصري
بالنظام ...................... النظام هو المفتاح للتقدم

و لكن أين يوجد النظام في نفوس المصريين ........... إنه صفر و صفر و صفر و صفر و تجمعهم و يف الأخر يطلعوا صفر

و دي بداية الحضارة

و كل الكلام اللي قيل لو بدأ بوجود نظام في كل شئ سيتم تحقيقه بسهولة

و البداية يجب أن تكون من الشعب أساسا
لأن الحكومة من الشعب
و مادام الشعب اي كلام ................ يبقى عايزين النظام الحكومي يبقى شكله أيه ؟؟؟؟؟

الشعب مش عايز يبقى منظم ........... مع إنه يتكلم كتير عن عدم وجود نظام
و نيجي للفعل .......... اول واحد يخالف النظام

و هو ده الحلم المصري لمواطن مصري ............ بيكره الفوضى للمواطنيين المصريين

شكرا يا توت على مشركتك معانا....
و اعتقد انك كده دلتنا على اول الطرق مهما كان اختيارنا فان النظام لازم يبقى اول وسيلة..
بس زى محضرتك قولت البدايه مننا احنا.

بس كان نفسنا نقرا حلمك الخاص؟؟؟
نفسك تلاقى مصر عامله ازاى ؟؟؟

**ashour** · 10-06-2008 09:11 PM

المشاركة الأصلية كتبت بواسطة MoToRiZeR

الحلم المصري من الأحلام اللي تحلمها و اول ما تصحي و تفوق متفتكرهاش

احنا عايزين الموضوع يبقى كله أمل.... و رافضين اليأس او التشائم
و ياخى الموضوع اسمه الحلم....

انت اكيد كان ليك حلم بس الفترات الصعبة اللى احنا مرنا بيها و مزلنا بنمر بيها
خليت الحلم ده يبعد عن بالك شويه... ايه رأيك تنشط الذاكرة و تكتبلنا حلمك عامل ازاى؟؟؟

الموضوع: الحلم المصري

LinkBack

أدوات الموضوع

عرض

-

-

-

-

-

المواضيع المتشابهه

اعلان جديد علي التلفزيون المصري لتوعية الشعب المصري الشقيق

الحلم

الدائري الحلم......

اخر اختراعات المواطن المصري المصري لحل مشكلة الركنة فيديو عالفيس بوك .... مفاجأة

الحلم الجميل

الكلمات الدلالية لهذا الموضوع

المفضلات

المفضلات

ضوابط المشاركة