الحلم المصري

**tutankhamoun** · 10-06-2008 10:15 PM

المشاركة الأصلية كتبت بواسطة ashour

شكرا يا توت على مشركتك معانا....
و اعتقد انك كده دلتنا على اول الطرق مهما كان اختيارنا فان النظام لازم يبقى اول وسيلة..
بس زى محضرتك قولت البدايه مننا احنا.

بس كان نفسنا نقرا حلمك الخاص؟؟؟
نفسك تلاقى مصر عامله ازاى ؟؟؟

نفسي يكون عندنا خطة قومية للنهوض بالبلد
نفسي أسوق العربية و محدش يكسر عليا ( و الله ده حلم قومي )
نفسي أقف في طابور و محدش ييجي من جنبي و يوقلي أصلي مستعجل
نفسي الناس مترميش زبالة في الشارع
نفسي الناس مترميش أكياس شيبسي و كانز من عربياتها
نفسي يكون في خطة قومية للبحث العلمي
نفسي يكون عندنا قطارات تغطي كل مصر و بجودة كويسة و يتم إلغاء الميكروباصات و البيجو
نفسي استصلاح أرض مصر واحدة واحدة
نفسي نبني طرق بضمير زي الطرق اللي بيبنيها الجيش
نفسي نصنع عربية مصرية 100 % و هاكون أول واحد يشتريها
نفسي الناس كلها تتعلم أسلوب الحضارة
نفسي سمعتنا تتحسن خارج مصر
و نفسي و نفسي و نفسي ............

و كل ده يبدأ لما يكون عندنا نظام ماشيين عليه و للآسف أنا شايف إنه صعب يتحقق لأننا بنفتقد للنظام داخلنا
بس ......... و أنا مش متشائم و لا حاجة .......... أنا شايف الواقع صح

و شكرا على الموضوع الجميل

**ashour** · 10-06-2008 10:54 PM

حلمك جميل جدا يا توت...
بس انا وقفت و تنحت عند جمله و كأنها صدى صوت داخلى
الا و هى استصلاح أرض مصر واحده واحده..
لان فعلا القاهرة اصبحت لا تتحمل اكثر من ذلك و بصراحه اللى بيحصل فيها و فى اللى عايشين فيها لا يجوز تسميته غير مهانه.
ليه ميبقاش على سبيل المثال الخطه القوميه اللى اشرت اليها هى زياده الهجرة الداخليه... و لو المواطنين بقوموا بالهجرة من المحافظات المختلفة للقاهرة عشان مميزات اكتر و حياة أفضل.... فالوضع الحالى بيقول ان العكس هو اللى فيه مميزات اكتر و حياة كريمه افضل.
و بدل ما كوبرى بيتعمل فى القاهرة بيتكلف الشىء الفيلانى... نطور بيه محافظه و ساعيتها هيبقى فى اقبال اكتر على الهجرة من القاهرة .

**tutankhamoun** · 11-06-2008 08:44 AM

المشاركة الأصلية كتبت بواسطة ashour

حلمك جميل جدا يا توت...
بس انا وقفت و تنحت عند جمله و كأنها صدى صوت داخلى
الا و هى استصلاح أرض مصر واحده واحده..
لان فعلا القاهرة اصبحت لا تتحمل اكثر من ذلك و بصراحه اللى بيحصل فيها و فى اللى عايشين فيها لا يجوز تسميته غير مهانه.
ليه ميبقاش على سبيل المثال الخطه القوميه اللى اشرت اليها هى زياده الهجرة الداخليه... و لو المواطنين بقوموا بالهجرة من المحافظات المختلفة للقاهرة عشان مميزات اكتر و حياة أفضل.... فالوضع الحالى بيقول ان العكس هو اللى فيه مميزات اكتر و حياة كريمه افضل.
و بدل ما كوبرى بيتعمل فى القاهرة بيتكلف الشىء الفيلانى... نطور بيه محافظه و ساعيتها هيبقى فى اقبال اكتر على الهجرة من القاهرة .

الكباري و الأنفاق اللي بيبنوها و بتتكلف الملايين ملهاش لازمة
لأنهم لو بنوا مدن جديدة ووفروا فيها عمل و مرافق
مش هاتحتاج تبني كوبري و نفق

يا راجل ده القاهرة أصبحت من أقبح مدن العالم
أنا فاكر في لندن و باريس ............ الكباري نادرة الوجود
بيستخدموها في التقاطعات الخطيرة فقط أو على الطرق السريعة لإنسياب المرور

طيب أنا هاقولك على حاجة
مصر دلوقتي 80 مليون بني آدم
و بنستورد أكل من كل حتة في الدنيا
و شوف عندنا كام واحد عاطل عن العمل .........
لو بنوا لكل شاب مسكن بسيط و بدأوا بعمل تجمعات عمرانية زراعية في الصحراء و إمدادها بالمرافق الأساسية
يبقى أتخلصت من مشكلة البطالة و الزحام
و كمان زودت الإنتاج الزراعي
و بثمن الكوبري أو النفق اللي بيبنوه في القاهرة
تشغل ناس كتير و من أساسه مش هاييجوا القاهرة علشان البحث عن فرصة عمل
بس مين اللي يسمع ............ مين اللي ينفذ

( توفير المسكن و الأرض مش ببلاش و يجب أن يتم دفع مبلغ مقابل ذلك لتوفير المرافق و الخدمات الأساسية .......... علشان لا يُساء فهم مداخلتي )
يعني لو كل شاب دفع مثلا تحويشة عمره و يحصل على قطعة أرض بشرط ........ عدم تجزيئ الأرض للبيع في أي وقت من الأوقات حتى في حالة الميراث حتى لا يحصل ما حصل بعد الثورة بتاعة عبد الناصر )

**m_aash** · 11-06-2008 10:42 AM

يا جماعه كل الردود اللى قريتها جميلة و ممتازة وزى الفل بس رأيى الشخصى إن كل أحلامنا الجميلة ها تتحقق فى يوم ما, بس الحلم اللى لازم يكون فى المقدمة و نحاول جاهدين إننا نحققه هو أن نملك قرارنا و مصيرنا و ده مش هايتحقق إللا لما "نأكل مما نزرع و نستخدم ما نصنع " طول ما إحنا بنستورد الأكل والشرب و كل حاجة , قرارنا مش فى إيدينا و ما فيش حلم من أحلامنا هايتحقق و هانفضل فى دائرة مغلقة.
الحلم ده مش صعب بس محتاج وقت ومحتاج مننا كلنا نرجع لقيمنا و عقيدتنا السمحة مسلمين و مسيحيين , نخاف على بعض ,و نبقى متأكدين إننا فى مركب واحدة,و لو لم نكن إيد واحدة ,هانغرق كلنا.
يارب أنا أو أولادى من بعدى يشوفوا اليوم ده و الحلم ده بيتحقق.

**ashour** · 11-06-2008 12:27 PM

ا/توت
الظاهرة بيتاعت عبدالناصر مسمينها التفتيت الزراعى...
انا فعلا موافق من حيث المبداء فى شرط ان الارض ماتتبعش... بس حاسس ان المصرين هيلاقو طريقه يتحايله بيها على الشرط ده.. فبقترح على ان كل ما ينجب طفل نديله ارض زياده بمقابل و تسهيلات كويسة.

م/محمد
عجبنى الشعار اللى حضرتك قايله (نأكل مما نزرع و نستخدم ما نصنع)
لانه لايجوز ان يكون شهار للهتافات و الكلام الفاضى... لابد للعمل و بذل المجهود لتحقيقه.
و انا بحاول انى امشى على المبداء ده.... قد تكون فى امور بسيطه لكن اهو تدريب على الاقل و غالبا ما بتنحصر فى محلات الاكل جودته اقل شويه بس بيقدى نفس الغرض.

**ashour** · 12-06-2008 12:26 AM

محدش تانى هيطلق العنان للخيال....

وعايز ازود حاجه نفسى فيها...
نفسى نبقى رقم واحد فى اى منتج حتى لو كان هايف
و عابز يبقى عندنا اقليم مختلفه فى طبيعتها
اقليم بحرى.. و اقليم زراعى .. و اقليم صناعى
و اقليم اقتصادى .. و اقليم ثقافى
و ميبقاش فى فرق بينهم و بين العاصمة بل بالعكس يبقوى احسن
و تظل العاصمه ليها طابع تراثى فى ذهننا (طبعا ده لان الاقاليم الحديثه متقدمه اكتر)

و عايز يبقى عندنا حلبه فورميلا 1 تبقى مثلا فى سيناء
و تراك رالى فى الواحات او الوادى الجديد
و مجمع ملاعب تنس و اسكواش فى الغردقه او شرم

و عايز كمان ميناء دمياط او بورسعيد او اسكندريه يبقى احسن من هونج كونج
و يبقى فى ما بينهم ربط عن طريق قناه توصل من نقطه قناه السويس او البحر الاحمر و النيل.

الفكرة فى الحاجات ده ان احنا نعملها من غير و لا مليم... زى ما عملنا مترو الانفاق.

**Mido80** · 12-06-2008 12:39 PM

حلمك لوحدة مش كفاية...شارك ولو بجنية عشان ترفع راية البلد

**shikkobikko** · 13-06-2008 07:41 PM

الحلم المصرى متهيالى هو حاجتين ممكن يكونوا البداية لاصلاح حاجات كتير اولا العدل. ثانيا المحافظة على كرامة المواطن المصرى جوه بلده
لان العدل و تطبيق القانون على الجميع ( و بما اننا فى منتدى سيارات ) فمثلا اذا تم تطبيق القانون على كل الناس بالعدل افتكر كتير من مشاكل المرور حتتحل

**ashour** · 14-06-2008 12:28 PM

المشاركة الأصلية كتبت بواسطة shikkobikko

الحلم المصرى متهيالى هو حاجتين ممكن يكونوا البداية لاصلاح حاجات كتير اولا العدل. ثانيا المحافظة على كرامة المواطن المصرى جوه بلده
لان العدل و تطبيق القانون على الجميع ( و بما اننا فى منتدى سيارات ) فمثلا اذا تم تطبيق القانون على كل الناس بالعدل افتكر كتير من مشاكل المرور حتتحل

الاصلاح ده امر لابد منه...
و العدل و تطبيق القانون عايزه مجاهده للنفس يمكن منكونش قده
لان على سبيل المثال لو انا على غرامه(فى بعض الغرامات فبركه و بتيجى بالغلط) و عندى وسطه مش هتخلينى ادفع
هل هقول لنفسى لا طبق القانون؟؟؟؟ اكبر سبب يخلى الايجابه لا
ان حتى لو انا دفعت غيرى اللى مش محترم القانون و لا مطباقوا مش هيدفع برده

**Fouad Ezz** · 14-06-2008 08:19 PM

نفسي مصر تتقدم وتبقي زي مصر سنة 1950
شوارع نظيفة ... محمد أفندي راح يزور دولت هانم وركب الترام ... الراجل لابس بدلة والمعلم لابس جلباب وقفطان وعمة (اللي همه الزي الوطني المصري) ... اللي بيعمل غلط يكون واحد مكسوف والناس كلها إيجابية وبتهزأه ...
مصر الجديدة فاضييييييييييييييييييييه ... ومدينة نصر صحراء ...
مش عايز البلد ترجع للوراء ... لأ ... عايزها تتقدم وتبقي زي ماكانت
أقصد أن في بلاد كتير جدا تقدمت للأمام
وبلاد واقفه محلك سر
لكن إحنا ... واحسرتاه ... رجعنا ورا قوي ... لأيام المماليك والجباية والعسس والتتار هجموا ولا لسه؟