بتعرف تستفيد من عروض الهايبر ماركت ولا بيتضحك عليك
السلام عليكم يا شعب
لاحظت ان في ناس بتدخل الهايبر ماركتس وعلى سبيل المثال كارفور
وتشتري اي عروض محطوطة وفاكرة ان دي اسعارها جنان وحلوة وتستاهل
وخاصة بقي لو عليها هدية
وعشان انا مابحبش يتضحك عليا وبحب افهم ايه يساوي ايه في العرض وبكام ودخ بياخد مني شوية وقت في الماركت
الاسعار المضروب بيها الامثلة تقريبية
مثلا لقيت عرض من مناديل فاين باكيدج 3 علب 550 ب 21 جنيه تقريبا
وعليهم سكينة مائدة هدية يعني ولا ليها لازمة
لو خطفت رجلك لغاية الرف هاتلاقي علبة المناديل لوحدها ب 6.5
يعني اجمالي التلاتة 19.5 واخد منك حق السكينة
وخلاك تشتري 3 علب مع بعض
في حين انك ممكن ماتكونش بتستعمل فاين وبتستعمل زينه واشتريت عشان العرض
ده كدة عرض مضروب ومالوش لازمة
كمان في شركات كتير لما بتعمل عروض بتخفض الوزن او الكمية
تلقي زجاجة اللبن في العرض 900 مللي مش ليتر
مثلا كان في عرض في كارفور باكدج عصير جهينة 4 علب الواحدة ليتر ب 20 جنيه
في حين ان سعرها الطبيعي 5.5 مش 6.5 لانك لما تروح هاتلقي العرض على جوافة وتفاح بس مافيش كوكتيل ولا مانجو لا شيري وبينا كولادا
وكمان مهم جدا جدا تاخد بالك من تاريخ الصلاحية لن في عروض كتير بتتعمل خاصة على المنتجات المستوردة لما يكون تاريخها قرب
واوعي تشتري لو شكل العبوة مبهدل بتكون اتبهدلت في التخزين
ويا ريت ناخد بالنا من تاريخ صاحية المواد الغازية والبيبسي في ناس كتير مش بتبص وتقولك هو البيبسي ليه تاريخ صلاحية
انا اشتريت مرة كان بيبسي من كشك وفتح وبشرب حسيت طعمة مش طبيعي بصيت تحت لقيته منتهي
طبعا مش هارجعلة اقوله ده منتهي هايقولي هاتها مقفولة فيا ريت ناخد بالنا
مثلا كان في عرض على عبوات رز الكيلو ب 4 جنيه مع ان سعر اقل عبوة 5 كيلو نضيفة ب 25 جنيه
ده اكيد عرض كويس وبنظرة على سعر البوات على الرف تعرف ان سعرها كان 6.5 وفي العرض ب 4
عشان كدة يا ريت ناخد بالنا من شوية النقط دي واحنا بنشتري العروض
كميه او وزن - تاريخ صلاحية - هدية خايبة- سعر المنتج من غير العرض