طبق اليوم ...... متجدد دائما ان شاء الله
اولا السلام عليكم ورحمة الله وبركاته
انا من هواة المطبخ جدا وبحب اقعد افنن في الأكل جدا جدا
والحمد لله كل مرة بتيجي سليمة والأكل بيتاكل مش بيترمي
ودة شجعني اني اعمل الموضوع دة
وحابب تشاركوني بافكاركم وارائكم
وبمناسبة شم النسيم واعياد الربيع
اول مشاركة هتكون رنجة ان شاء الله
المكونات :
رنجة
طحينة
طماطم
بصل اخضر
زيت عباد شمس (او ذرة)
طريقة التحضير
1- هتمسك الرنجاية وتولع عين البوتاجاز الكبيرة
هتشمم الرنجاية النار
هتلاقيها بتنزل شوية زيوت (مش مشكلة)
وكمان هتلاحظ ان جلدها بدأ يفتح
2- هتقشرها من جلدها
3- تقطع الرنجة قطع صغيرة (بعد فتحها واخراج السلسلة)
4- تقطع الطماطم الي قطع صغيرة جدا
5- تقطع رأس البصلة الي قطع صغيرة جدا (الأحسن الراس فقط وليس الورق او الشراشيب)
6- تضاف الطحينة
7- يضاف قليل من الزيت
8- تقلب جيدا
الأضافات
ممكن تضيف علبة او اتنين تونة الي المكونات السابقة وسواء تونة مفتتة او قطع او قطعة واحدة مش هتفرق كتير ويمكن ماتحسش بطعمها وسط الرنجة
ممكن تعصر نص ليمونة
ممكن تستبدل البصل الأخضر ببصل احمر
وبالهنا والشفا