الموضوع: فوانيس شبورة للفيرنا

المشاركة الأصلية كتبت بواسطة m7mda7md

شهاده اعتز بيها با قبطاااااااان

عربيتي 2008 و فيها الحاجات دي...لو عاوز تتأكد افتح كبوت عربيتك ,,,وش حضرتك للكبوت هتلاقي علي اليمين ورا البطاريه علبه سوداء و عليها كتابه بالاخضر...دور علي كلمتي front fog و بعدين ارفع الغطا بتاع العلبه دي و شوف المكان المقابل للكلمتين فيه cut out ولا لأ...لو موجود و ده اغلب الظن ان شاء الله يبقي الدنيا تمام..لو مش موجود يبقي محتاج تعمل انت كل حاجه من الاول و ان شاء الله الاحتمال ده مش وارد.....و دور كمان علي الفيش زي ما وصفت مكانهم في الرد السابق....لما انزل النهارده هبقي اصورلكم الحاجات دي ان شاء الله :b4_611:

الاخ الغالى
اشكرك على الاهتمام ، بس انا احب اوضح حاجة ، انا فعلا مركب فوجيهات و بالمفتاح الاصلى و كنت مشتريه من شارع دمشق بس ركبتهم عند كهربائى جمب البيت و هو لقى فيش الفوانيس و ركبهم اما بالنسبة للمفتاح فقللى مالوش فيشة و ركبله اسلاك من عنده لكن النور اللى فى المفتاح مش شغال ( النور اللى بيشتغل مع نور الصالون والنور اللى بيشتغل لما افتح الفوجيهات) فانا مش عارف هو اشتغلنى و لا سرق الفيشة و لا مش عارف مكانها ، بس انا فرحت لما قرات الموضوع بتاعك و اتمنى انها تكون لسه موجوده
تقبل تحياتى

المشاركة الأصلية كتبت بواسطة m7mda7md

للأسف يا كينج انت أكلت المطبين ال انا اكلتهم......المطب الأول ان الفوانيس ساحت مع اني كنت جايبهم ديبو بس المشكله في اللمبات كان الوات بتاعها عالي و حاليا عندي فانوسين صيني مش فاكر جبتهم بكام بس صيني نضيف و ارخص من الديبو.......تاني مطب السلك و الكتاوت مع ان العربيه فيها كل حاجه و مش ناقصها غير الفوانيس بلمضهم و المفتاح و مش محتاجه كهربائي اساسا.....هتفك الكونسول و تحط الفيشه في المفتاح ال هتشتريه و تركب الكونسول تاني.....تنزل ع الفوانيس و تدور جمب البطاريه و عند قربه ميه الرادياتير هتلاقي الفيش بتاعه الفوانيس و افتح كمان علبه الفيوازات و الكتاوت ال في الكبوت هتلاقي الكتاوت بتاع الفوج موجود

بخصوص التجهيزة بتبقى موجودة بالكامل ما عدا الفوجات والزرار بتاعها ولو بصيت خلف الاكصدام من الجنبين هتلاقى الدفيرة بالفيشة بتاعة الفوجات وفى علبة الفيوزات الى بجوار بدال الدبرياج بالداخل ههتلاقى كتاوت اسبير تقريبا 3 اسفل بعض

الاخوة الاعزاء
باركولى ، انهاردة ضبط شوية حاجات كدة بسيطة على الماشى و حابب اقولكم عليها و بالتفصيل الممل بس محدش يزهق منى
الى التفاصيل
انهارده انا رحت شارع دمشق و اتجهت على طول على محل المدينة و سالتهم على لمبات الاوسرام نايت بريكر بلس قاللى طبعا موجود ، بكام اقاللى ب 125 جنيه ، طيب فيه فيليبس كريستال فيجين قاللى طبعا موجود ب 160 ، طيب ليه اغلى من الاوسرام مع انى اعرف انها ارخص قاللى لان الاوسرام لمبتين للفوانيس (طبعا انا بتكلم عن h4) اما الفيليبس فهى اربعة اثنين للفوانيس و اثنين صغيرين للمبات النور الصغير، طيب انهى احسن قاللى لو انت عايز اضاءة اعلى و تفرش معاك يبقى الاوسرام اما لو عايز شكل و منظر و اضاءة اقل يبقى الفيليبس و نور الاوسرام احمر مع نسبة ابيض (90% : 10%) اما الفيليبس فهى 100% ابيض
اشتريت الاوسرام و بعد ما مشيت من عند المحل ركنت فى جنب كده صف ثانى و رحت مركبهم و طبعا من شغفى جربتهم رغم ان الساعة كانت الواحدة ظهرا و رغم نور النهار الا انى شوفت قوة الاضاءة بتاعتهم و مش هاقلكم اضائتهم بالليل كانت ازاى تخيلوا انتم بقى
الحاجة الثانية رحت عند محل اكسسوارات فى كوبرى القبة اسمه حمدى الديب فيه شاب روش هناك اسمه وليد يساعدك جدا على انك تختار الاكسسوارات صح و بيركبهملك كمان من غير فلوس اشتريت من عنده ستائر الزجاج الامامى اللى بيقولوا عليها اكورديون او سسته هو فى نوعين نوع صينى ب 40 جنيه و نو ع تايونى ب 70 جنيه و ده عجبنى جدا لانه تقفيلته حلوه و حسيت انهم متان و ركبتهم و اشتريت كمان المساحات الجديدة المرنه دى قولتله انا عايز مقاس 18 قاللى موجودين ب 20 و 25 جنيه بس نصحنى بانى اركب اللى امام السواق مقاس 20 و الثانية مقاس 18 و فعلا لقيت كده افضل و ركبهمللى بنفس السعر، و بعدين ركبت كمان نور ابيض فى الصالون اسمها بلاطه فيه مقاس صغير و فيه مقاس كبير انا ركبت الكبير و بعدين قولتله انا عايز اظبط الصوت و المفاجاه ان اخوه اسمه عماد الديب فاتح فى الشارع اللى جمبه على طول هو بتاع كاسيت و اليكترونيات ، رحتله و كان معايا سمعتين بيونير 400 وات بيضاوى كنت واخدهم من اخويا و عايز اركبهم من فتره بس كنت خايف من موضوع القص فى الصاج و تشويه شغل الفابريقة، المهم رحتله و قلتله انا عايز اركبهم من غير تشويه الفابريقة و بالفعل خلع الفايبر اللى وره و شال السماعات المريضة بتاعت بهجت و بطريقة جميلة ركب السماعات البيضاويه مكان بتوع بهجت من غير ما يقص لا فى الفايبر و لا فى الصاج و رجع كل حاجة زى ما كانت ، يعنى اللى اتغير فقط هو انى شيلت المربع الفايبر اللى كان فوق السماعات و اصبح بدلهم السماعات البيضاوى بغطاهم و كمان ممكن ارجع كل حاجة زى ما كانت فى اى وقت ، و الصوت بقى جميل جدا
الجميل بقى فى الموضوع ان انا حبيت استغله و قلتله على موضوع الفيشة بتاعت مفتاح الشبورة و اللى عمله الكهربائى معايا فلقيته فك الكونسول و فضلنا انا و هو ندور على الفيشة و لم نجدها ابدا و راح هو مظبط السلوك اللى كان عاملها الكهربائى و شغللى الانوار بتاعت المفتاح اللى ما كانتش شغاله عمل الكلام ده فى حدود ثلاث ساعات و خد كام مصناعية 30جنيه.
مفتاح الشبورة الاصلى كنت اشتريته من شارع دمشق ب 40 جنيه من محل انا مش عارف اسمه بس هو على الناصية اللى بعد بنزينه شل وانت رايح على ميدان الجامع يعنى يبقى على يمينك
دى كانت رحلتى انهارده ، انا جاهز لاى استفسار

مبروك يا باشا