قولولى هو الجنان يوصل لكدة ؟

**CalvinKlein** · 17-04-2012 01:21 AM

المشاركة الأصلية كتبت بواسطة dolly13

النهاردة من شوية ماشية فى شارع الفردوس وقبل التقاطع مع صلاح سالم كدة الاقى ورايا تاكسى ابيض فى اسود بيعمل حركات غريبة شوية يعنى شمال فى يمين بطريقة تدل على جنان السائق المهم ماخدتش فى بالى طالما ورايا
قرصت شوية الحق الاشارة قبل ما العسكرى يقفل وفعلا عديت واللى بعدى وقفو
جيت بقى عند الشارع بتاع ترب الغفير اللى باخده عشان اطلع اتوستراد والاقى السواق ده جى زى الصاروخ من ورايا وعدى من شمالى وجه قدامى وقام معرض العربية ونازل يقولى ايه اللى انتى بتعمليه فى الشارع ده ؟
طبعا افتكرته على طول وقلتله انا عملت ايه ؟
قالى انتى كسرتى علية بالعربية يابنت ال .......
قلتله نعم ؟
قاللى مشكلتك انت ولية شر ......وقعد يخبط على البربريز والكبوت
قلتله اجرى يالة من هنا والشر... تبقى امك بدون انفعال ومش عارفة لسانى طاوعنى ازاى اقول كدة
جنبى ميكروباص بيساله هى الست عملت ايه قام قايله كسرت المرايا
مش عارفة ازاة اكسر المرايا وهو وارايا وماجاش جنبى اصلا
المهم ابص على المرايات يمكن انا مجنونة وعملت كدة فى لحظة غيبوبة الاقى المرايات سليمة ومفيهاش اى حاجة
وبعدها قام واخد بعضه وماشى
طلعنا على الاتوستراد لقيته بيزنق علية ومش عايز يعدينى قمت قارصة قام لامم نفسه على طول وماشفتوش بعد كدة
ده اسمه ايه وعمل كدة ليه ومعايا ولادى التلاتة وهو ده اللى خلانى رديت عليه لما شتم . ماحبتش ولادى يشوفو ان واحد ممكن يتبلى على امهم وهى تسكت وتبقى مغلوبة على امرها وخصوصا انى مش مغلوبة على امرى اصلا
لما حكيت لجوزى قالى تلاقيه كان عايز يقلبك فى عشرين جنيه والا حاجة
انا اتكلمت كتير والموضوع لسة طازة بس حبيت اعرف رايكو ايه فى حاجة زى كدة

شكلك كنتى هتلبسى فى واحد عربجى اصلا..بس انتى غلطانة انك رديتى عليه,بالنسبة لاولادك كنتى ممكن تقفلى الزجاج و تخليه هيضرب راسة فى اقرب حاجة ليه و مكنتشى تقفى من اساسه دى تخلية ينفجر غيظ بسكوتك.
على العموم عديت على خير

**dolly13** · 17-04-2012 02:24 AM

الحمد لله ان الموقف عدى خير ومتشكرة جدا لردودكم كلم

**ibn_seena** · 17-04-2012 03:26 AM

الحمد لله ان الموقف عدى والمنطقه دي منطقة وسخه اصلا والراجل ده غرضه كان اكتر من 20 جنيه بكتير
بعد كده تقومي قافله ازازك وتحطيه تحت عجل عربيتك

**Kareem Fawzy** · 17-04-2012 03:26 AM

الحمدلله انها جت على قد كدة
مدام رشا بعد كدة لما يتكرر موقف زى دى خديه على كبوت عربيتك ما تتفاهميش مع الاشكال دى بعد كدة

**Ashraf_Ibrahim** · 17-04-2012 03:40 AM

دولي
اولا الحمد لله على السلامة
ثانيا اللي زي دا متقفيش ليه خالص
انا صاحب مبدأ في الحجات دي
اي حد يحاول يوقفني او يبلطج عليا هشيله ايا ما كان واللي يحصل يحصل ولو حد وقف قدامي بعربية هشيل عربيته ما دام انا واثق انه هيبلطج
وحضرتك انثى ولوحدك وممعكيش غير اولادك ودي كانت مخاطرة انك تقفي
ما دام لقيتيه نازل واكيد باين عليه انه متنرفز كنتي خدتيه فسحة على الكبوت او دوقتيه طعم الكاوتش شكله ايه :d
عموما الحمد لله على السلامة
انا عارف ان احيانا بنتظطر اننا نقول ألفاظ سيئة بس ماحبش ان اولاد حضرتك يسمعوكي بتقولي الكلمات دي مش لشيء بس عشان ميقولوهاش هما كمان
احنا بنحاول نربي نشأ يكون متعلم ومتفتح ومؤدب في نفس الوقت ولا يرد السيئة بالسيئة !
ربنا يحفظك يا فندم

**dr.hazem** · 17-04-2012 06:33 AM

النهارده واحد جاي عكس في شارع سنان باشا في الزيتون بعربية تيريوس
المهم احنا ماشيين عادي لقينا ده في وشنا وقفل الشارع غير العطله
حاول يعديني انا كنت تالت عربيه
اول واحد عدى بصعوبه من جنبه
التاني كانت اسبرانزا 516 وهو بيعدي من جنبه الرفرف الشمال حك في الديفندر الخلفي للتيريوس يقوم اذكى اخواته يعمل ايه يقوم يزنق نفسه فيخبط رفرف العربية الراكنه على جنبه اليمين قدام وفنفس الوقت بالديفندر يفعص السبرانزا اكتر
سواق السبرانزا كسر يمين محاولا الابتعاد عنه
كلنا عارفين رفرق السبرانزا الخلفي بارز لبره
جيه يعدي ياح داخل في الرفرف بتاع التيريوس كل ده وانا واقف متنرفز ولو كان حصلي الموقف ده كان ممكن اعدم فيها بتاع التيريوس ده
المهم بتاع التيريوس فتح قزازه وبيقول للتاني انت عربجي

ففتحت قزازي بدوري وقلتله هو اللي عربجي يابلطجي انت عاكس الشارع وياريت متفتحش بقك كان بتاع الاسبرانزا عدى وركن على جنب يشوف خسايره وانا عديت بعده وآدي الاشكال اللي ملت البلد

عربجي بلطجي عاكس طريق واقف حال الشارع ومعطل الناس

بالخليجي بيقولو... شين وقوة عين!!!

**dolly13** · 17-04-2012 11:34 AM

المشاركة الأصلية كتبت بواسطة megamoudy

أيه قلة الادب دي

المفروض حضرتك تمشي باسبراي سلف دفنس ....... ورشي ف وشه لغاية مايتعمي

ربنا ياخد الاشكال الضاله دي

والله بعد الموقف ده فعلا بافكر فى اى وسيلة دفاع
شكرا على مرورك

-

-

الموضوع: قولولى هو الجنان يوصل لكدة ؟

LinkBack

أدوات الموضوع

عرض

-

-

-

-

-

المواضيع المتشابهه

الدائري و الجنان ..... ده سيرك مش طريق

صورة بدون تعليق :) - متروكة لكم ... بس هل ممكن توصل الشكوى بيك لكدة ؟

فعقولنا إن لم تبلغنا الجنان........فحياتنا ليست حياة بل ممات

اخيرا.. الجنان قارب على الانتهاء.. بس لسه شويه.. مساعده بقا منكو

الكلمات الدلالية لهذا الموضوع

المفضلات

المفضلات

ضوابط المشاركة