مشكلة فى 128 وعايز اراء الخبراء ارجوكم اسمعونى
السلام عليكم
انا اشتريت عربية 128 من سنتين وكانت ماشيه معايا زى الفل هى موديل 85 طبعا كعادت المستعمل لازم اكون مصاحب ميكانيكى وكهربائى و بتاع عفشة الخ وطبعا عملت مشاكل مع صنيعية كتير المهم مش هطول عليكم فى موضوع مشاكلها القديمة لأنى الحمد لله عندى خبرة تكاد تكون بسيطة ولأنى لست جاهل ومن الناس اللى مش عارفه حتى فين الرداتير من الكاربيراتير وكان احلى حاجة عندى انى لما اطلع صانيعى انه مش فاهم وانه بيتكلم فى عيب تانى غير اللى فى العربية وافضل أئاوح معه وبعين اروح لميكانيكى تانى والاقيه بيأكد كلامى ويصلح العيب اللى انا كنت متأكد منه المهم اخر مشكلة هى ان العربية مكنتش بتسحب كويس وكانت بتمشى بالعافيه وخصوصاً فى مطالع الشوارع او فى طرق السفر بالعافية وخصوصاً لما أكون محمل ناس كتير المهم كنت غيرت الاسبراتير (استيراد) وايضا الكربيارتير (استيراد) وطقم ديسك واسطوان وبلية دبرياج (جديد) واستبدال رداتير حديد 2 ماسورة بأخر نحاس 3 ماسورة وجوان وش سلندر مرتين بسبب (غباء صنايعيه) عفشة متظبطه وطبعا كذا طقم بوجيهات وفلاتر وجوانات وكل اللى عايز تقوله قوله الحمد لله ايدى فى العربية علطول المهم اخر حاجة روحت للسمكرى عشان يلحم شويت حاجات فى الركب قالى لأ لازم يطلع الماتور ونشتغل صح لأن الربع الادمانى للعربية سايب المهم انا قلت بدل ميطلع الماتور على الفاضى ومصنعية قولت افك الماتور واعمل طقم شنمبر والذى منه عطلة بعطلة و مصنعية بمصنعية
المهم الميكانيكى فك الماتور ولقى ان الشمايز كويسة فقام بعمل الآتى:-
1- تغيير طقم الشنمبر
2-خراطة فى البلوك بس مش شمايز
3- تغيير جميع الجونات
4- تغيير الاولسيهات
5- الهلايل
6- توسيع مجرى البساتم للشمبر الجديد
وركبنا الماتور وبدأنا التليين على الواقف صفيحة ومن اول يوم فى التليين لقيت فى دخنة طلعة من الفايظ بسيطة اقول للمكانيكى يقولى ده بخر زيت مع انى عارف من خبرتى التى لاتذكر ومن المنتدى الجميل ومن اصدقائى اللى في واحد منهم تاجر سيارات ويعتبر ميكانيكى وبالاجماع ان كده الشنمبر وحش ومش مظبوط المهم قلت كمل تليين ويمكن يروح لأى سبب وابتديت الين ولكن بعد 600 كيلو روحت للميكانيكى للتربيط على الوش وتغيير الزيت وفلتر الزيت وقلتله ان الزيت نقص للنصف ما بين العلامتين قام معجبوش كلامى وقاللى ان ده زيت تليين ولازم ينقص وده برده مش صح (قال يعنى بعيب فى شغله) المهم قلت كمل كملت 1000 كيلو تليين وبعدين سفرت يوم الخميس بليل اسكندرية وقبل ما امشى كشفت على الزيت لقيته نقص شوية بعد حوالى 300 كيلو من تغيير الزيت والفلتر ولما وصلت وكشفت على الزيت بعد مالعربية هديت بساعة لقيت الزيت على minimum اتصلت بالميكانيكى واتخنقيت معاه وقلته ان ده تأكيد لكلامى ان الشنمبر مش معمول صح وانه كده يبقى ضحك عليا دلوقتى بقى بيقولى ان ده عيب طقم جلد صباب وده السبب وهنعمله والدنيا تتظبط مع انى مش مقتنع وقلتله ده ليه علاقة بالدخنة اللى خارجة من الفايظ قالى اه مع انى برده مش مقتنع
انا كنت ماشى فى السفر على 100 كم/ساعة ولما قلت للميكانيكى كده قالى انت كده قرصت عليها مع انى لينت 1000 كيلو ومتهيألى كده لو عربية زيرو كان كفايه عليها 1000 كيلو وانا كنت بمشى بالعربية كده قبل طقم الشمنبر وكانت بتنقص بالكتير نصف كيلو او كيلو بس فى 1500
وبعدين واحنا بنعمل الماتور قلتله عايزين نعمل روديه قاللى احنا اختبرناه ولقيناه مش محتاج والاختبار ده بيكون عن طريق انا احنا بنحط بنزين لو سيل يبقى محتاج لو مسيلش يبقى مش محتاج العجيب بقى فى الموضوع انه دلوقتى عايز يعمل كده (يعمل روديه)
الدخنه فى الفايظ موجوده علطول وبتزيد بسيط مع الكبس
مع العلم انى مرضتش اشتر طقم الشنمبر وخلته هو يشترى علشان الخلوص والكلام ده وعشان هو قال بلسانه ان ده هيبقى مسؤليتى لو كنت اشتريته ومسئوليته لو هو اشتراه
هل فعلا جلد الصباب ينقص كيلو وربع زيت فى حوالى 300 كيلو من غير دخنة من الشكمان؟
اه البوجيهات مبيجيش عليها زيت والمياه فى الرادتير نظيفة
انا اسف جداً جداً جداً للأطالة ولكن ده من غلبى ومصدقت اكلم ناس فاهمه
وشكراً مره اخرى لأحلى منتدى
والله انتوا ناس فعلاً محترمة
اولاً انا بشكرمك على كل اهتمامكم بالموضوع وبجد ربنا يبارك للعمل المنتدى وكل القائمين عليه
انا هرد الاول على الاستاذ yyy
المهم الميكانيكى فك الماتور ولقى ان الشمايز كويسة فقام بعمل الآتى:-
1- تغيير طقم الشنمبر
2-خراطة فى البلوك بس مش شمايز
خرط اية فى البلوك؟؟
ودينا البلوك للخراط علشان كان فى عامود صغير حوالى 20سم فى جنب البلوك انا فاكر انه عمود المناول او الكامه حاجة كده كان بيعمل صوت واضح والعربية دايرة زى تخبيط بسيط او تكتكه وخرط الجلبه بتاعته بس وكان حسابة 90 جنية وفعلاً بعد التركيب الصوت راح والميكانيكى كان عنده حق فى دى والميكانيكى حاول يعمل (صايع انا اسف فى الكلمة) بعد ما جينا نحط الماتور فى شنطة العربية اللى كانت معانا قال لواحد من الصنايعية ان الهلايل عايزة تتظبط عشان عمود الكرنك وعاملها واحنا واقفين واداله عشرة جنية ادى اللى حصل عند الخراط بس.
3- تغيير جميع الجونات
4- تغيير الاولسيهات
5- الهلايل
6- توسيع مجرى البساتم للشمبر الجديد
ازاى هايوسع وهو مركب شمبر بس؟؟؟
المقصود انه مش وسع فى الشمايز لأ المقصود مكان تركيب الشمبر فى البستم زى اللى فى الصورة المرفقة
الدخنه فى الفايظ موجوده علطول وبتزيد بسيط مع الكبس
اللى اعرفة ان الدخنة بتاعة الفايظ دى من الشمبر
وانا اؤيد هذا الرأى معاك بس هل ممكن يكون الدخنة دي ليها علاقة بجلد الصباب
ثانياً بالنسبة لرد الاستاذ gamalo
ياباشا انت دخلت نفسك في متاهات كتيرة اوي من الاول ان العربة لا تسحب دا عيب سير الكاتينة انا جربتها قبل كدة والعربية لحد الان بتسحب علي 120 مستريحة اوي لازم الميكانيكي يدخلك في متاهات علشان المصنعية منهم لله
طبعاً انا بشكر حضرتك جداً أنا فعلاً غيرت سير الكاتينة اكثر من مره وعلى ما اعتقد ان الموضوع ده ملوش علاقة وانا على فكرة انا اللى طلبت من الميكانيكى وده بسبب الشغل بتاع اللحام فى الربع الادمانى وده فعلا كان مؤثر لأن بعد تغيير طقم الشمبر فعلا سحب العربية اتغير بس برده ده ممكن يكون سبب بس من زاوية تانية وبعدين انا بشتكى من نقص الزيت الرهيب
فكرة ياريت اخد رأيكم فيها
اولاً شكرا على الاهتمام والمشاركة الجميلة منكم بجد انا بحس انا احنا كده بنقف جنب بعض ضد الصنايعية (المفروض يعنى يكونوا كده) المهم القليلون الخبرة او النصابين
ثانياً أنا روحت لميكانيكى تانى عندنا فى الشارع زى ماأشار عليا بعض الناس وطبعاً مقلتلوش على حاجة ولا طقم شمبر ولاالعيب كذا ولا كذا انا قلت اسمع منه
المهم فضل يبص على دخنة الشكمان وهى واقفة وبعدين فضل يزود جامد ويبص على الشكمان ويبص على الفايظ وبعدين قالى العربية محتاجة يتعملها قواعد ودلايل ونشوف اذا كانت الصبابات تنفع ولا لأ واذا كنت هغيرهم ولا هيتظبطوا ويشتغلوا وسألنى العربية بتستهلك معاك بنزين كتير قلتله يعنى مش قوى (ملاحظة لاحظتها ساعتها انى كنت ايام التليين لما بمشى على سرعات 60 - 70 كانت استهلاكها معقول ولكن مع السرعات العالية استهلاكها زايد عن المعقول) قالى لأ هي بتستهلك بنزين كتير عشان فى دخنة سودا بتطلع من الشكمان وكمان فى دخنة بيضا مزرقة (ملحوظة ده لمل يزود جامد على الماتور لكن فى التسخين والسلانسية مفيش حاجة حتى لما أكون شادد الشفاط) وبعدين سألنى هو الميكانيكى اللى عمل شمبر عمل حاجة فى الصبابات والوش قلتله لأ قاللى يعنى عمل طقم شمبر وركب على طول قلتله اه وغير اولسيهات و معملش روديه ولا حاجة لأنه قاللى انه أختبره بطريقة البنزين ولقى انه مش محتاج قاللى بالنسبة بقى للدخنة اللى طالعه من الفايظ ممكن تروح وممكن لأ قلتله طب وازاى والدخنة دى طلعه من اول ساعة فى التليين قالى كده الشمبر وحش على العموم لما نفك نشوف وبعدين مش عايز ادخلك فى قصة شمبر قلتله ما احنا مدام فكين يا نعمل الحاجة صح يابلاش وقلتله كمان لما بفتح غطا الماتور بتاع التاكيهات بيطلع جزء من الدخنة بتاعت الفايظ من الغطا واتفقنا ان انشاء الله هنشتغل يوم الأثنين
المهم بقى ياجماعة من ساعتها وانا محتار اعمل موضوع الرودية والقواعد والدلايل والكاوتش فقط ولا اعمل كمان طقم الشمبر وبعدين فى تصور فى دماغى كده ياريت لو تشاركونى فيه وتقول اذا كان صح ولا غلط أنا كنت قريت فى موضوع باسم ماهو الروديه بيقول فى جزء منه
فعدم التطبيع الجيد للصبابات على رأس السلندر من أسفل
يجعل هناك بؤر لحدوث تنفيس لكبس المحرك لأعلى المكنه
أى لمنطقة المانيفولد أو فرن المكنه
وقد يؤدى هذا التفويت إلى هروب جزء من الكبس ( فى نهاية شوط الأنضغاط وبداية التمدد )
حيث أقصى ضغط للشحنه
إلى الهروب من خلال الخلوص بين دلائل الصبابات وسيقان الصبابات
وبالتالى حدوث نفخ فى منطقة التاكيهات نتيجه لزيادة الضغط بسبب هروب جزء من الشحنه لأعلى
أى إلى منطقة التاكيهات
....
المهم
أيه العائد على مالك السياره من ضمان تطبيع جيد للصبابات على الوش من تحت .........؟
إليكم الأجابه
1- ضمان حمل جيد للمكنه وبالتالى سحب جيد للسياره
2- عدم أنهاك المحرك بالضغط على دواسة البنزين للحصول على أحمال مطلوبه
وقت صعود الكبارى وأعمال التخطىء أثناء القياده
3- وفره فى أستخدام البنزين
4- الحفاظ على دورة تزييت نظيفه وعمر تشغيلى أطول لزيت التزييت
5- الحفاظ على حرارة المكنه فى الحدود المقبوله
طيب أنا فضلت افكر فى الموضوع هل ممكن يكون الشمبر فعلاً سليم و يكون الدلايل والقواعد واحكام الصباب مع الوش وبالمره كاوتش الصباب متبهدلين وبيسرب الكبس للجزء بتاع التاكيهات وبيسخن الزيت وبعدين السخونية بتاعت الزيت بما أنها كلها دورة تزييت واحدة بتنزل من المجارى المخصصة لرجوع الزيت الموجودة فى البلوك الى الكارتيرة علشان تعاد الدورة مرة اخرى للفلتر وهكذا بيؤدى الى سخونية الزيت عامةً فلا يوجد امامة مخرج سوى مخرج واحد وهو الفايظ فيطلع فى شكل بخر زيت واللى عمال يأكد الفكرة هى كلمة الميكانيكى الأخير ان ممكن بعد عمل الشغل فى الوش الدخنة اللى خارجة من الفايظ ممكن تروح او لأ فيكون ده تهريب كبس بس لفوق من منطقة التاكيهات انا فعلاً مش عارف لأن بجد أنا الخسران الوحيد
طب لو ظبطنا الجزء اللى فوق وحكمناه بس جربت على كده لو فضل الموضوع زى ماهو يبقى هاضطر افك الوش تاني ومصناعية وطقم شمبر تانى وجوانات وزيت وتليين ووقت
وفى نفس الوقت لوفكرتى دى صح بعد أرأكم الجميلة يبقى حرام الواحد يغيير طقم شمبر ولا أيه
مستى ردودكوم الجميلة
وبعدين ليا سؤال تانى هو الموضوع ده يتكلف كام بالتفصيل
قواعد الصباب =
دلايل الصباب =
كاوتش صباب =
طقم صباب لو محتاج تغيير وايهم افضل اغيرهم ولا=
رودية =
مصنعية خراط =
مصنعية ميكانيكى =
وأسف جداً على الأطالة بس اعذرونى انا زي اخوكم وشكراً لكل المشاركين وايضا المشاهدين فى الموضوع