ايه القرف اللي فى المطاعم دا

الواحد خلاص قرف من الاكل بره البيت

للمرة المليون حشرات وعدم نظافة فى اماكن الاكل والوجبات السريعة وايضا بعض المطاعم الشهيرة , واضح ان الموضوع عام .
اول حادثة كانت مع طبقين كشري من اشهر محل فى المكان اللي ساكن فيه ولقيت في واحد منهم صرصار في الكشري , قلت يمكن المطعم مستواه نزل , مع انك تدخل المطعم تلاقيه نضيف جدا والعمال ملابسهم نضيفه اوي .
الحادثة التانية : احد العاملين فى احد محلات الوجبات السريعة الشهيرة فى مول سان استيفانو عايش حياته بايده اللي بيتعامل بيها بكل حاجة سواء كان اكل ولا حتي كنس .

الحادثة الثالثة : احد مطاعم الوجبات السريعة فى كارفور اسكندرية صرصار يخرج من المطبخ ويبدو ان الوضع عادي جدا ويمشي بشكل مطمئن .

وغيرهم وغيره وغيره كتير , هو الوساخة وعدم النظافة بقت صفه اساسية فى المطاعم !!!

في انضف المطاعم تلاقي الاهتمام العالي بشكل المكان والديكور ومظهر العاملين ولكن تدخل المطبخ تلاقي العجب .
والادهي ان في ناس كتير من العاملين فى المجالات المتعلقة بالاكل والمشروبات مبيكلوش او يشربوا منها ولما تسألهم يقلك اصلك مش بتشفها بتتعمل ازاي .

ايه القرف اللي بقينا فيه دا !!!

كل ما بتزيد الصراصير في الاكل كل ما بتزيد البروتينات يعني كل و انت مطمن و الصراصير معقمه كويس

فى السعوديه على ما اذكر
تم الزام جميع مطاعم الوجبات السريعه بعمل حائط المطبخ الذى يفصل بينه و ين صالة الطعام
ان يكون من الزجاج بحيث تبقى سيادتك بتاكل و شايف كل عمليات تصنيع الطعام

و من يخالف
يتقفل المطعم فى ساعتها

اقتباس:

---

المشاركة الأصلية كتبت بواسطة screenplays

كل ما بتزيد الصراصير في الاكل كل ما بتزيد البروتينات يعني كل و انت مطمن و الصراصير معقمه كويس

---

يا راجل يا مفتري :)

اقتباس:

---

المشاركة الأصلية كتبت بواسطة mtak

فى السعوديه على ما اذكر
تم الزام جميع مطاعم الوجبات السريعه بعمل حائط المطبخ الذى يفصل بينه و ين صالة الطعام
ان يكون من الزجاج بحيث تبقى سيادتك بتاكل و شايف كل عمليات تصنيع الطعام

و من يخالف
يتقفل المطعم فى ساعتها

---

ياريت تتعمل عندنا الحكاية دي
بس انا ليه رأي انها حاجة شخصية , يعني المفروض ان قيمة النظافة دي تبقي عالية عند الناس دي , مش مجرد قوانين تجبرهم انهم يبقوا نضاف

أكلك في بيتك أكيد أنضف و أوفر

يا ريت اسامى المحلات لان دى حاجة مهمة جدا ان الناس تبقى عارفة مين اللى مش بيحافظ على النظافة ومبيتعملش معاهم

اكل الشارع دة زبالة و بواقي الناس بالذات السلطات و قطع الفراخ و القرف دة

انا بقيت اقرف من اكل بره دا
بس للاسف الواحد اوقات كتير بيبقى غصب عنه

انا اكره الاكل بره البيت

هو فى اجدع من البروطين الحشرى
سمى باسم الله و ارفع يا معلم

انا مش باكل عند اي حد برة غير المشهورين
كدا مش هاكل برة خالص :(

بصراحه الاكل بره بقرف
لسه واحد صحبي بيقولي دخل مطعم صيني و برده كان في صرصار في الشوربه

انا قلتله جايز ده عادي عند الصينيين هههههههههههههههههههههههه

أنا بصرااااااااحة مدمن جنك فود !

اقتباس:

---

المشاركة الأصلية كتبت بواسطة mohamed_refaat

يا ريت اسامى المحلات لان دى حاجة مهمة جدا ان الناس تبقى عارفة مين اللى مش بيحافظ على النظافة ومبيتعملش معاهم

---

+1111111111

يا عزيزي .. إنت في بلد مفيهاش رقابة .. ولحد فترة قريبة كان فيها عقاب للي بيغلط
بس دلوقتي مبقاش في حتى عقاب.

ومن أمِن العقاب .. أساء الأدب

بس إنت مقولتلناش عملت إيه ؟؟؟؟؟

يعني ::: إتخانقت معاهم واسترديت فلوسك
ولا سيبت الأكل وحاسبت عليه ومشيت من سكات.
إ

اقتباس:

---

المشاركة الأصلية كتبت بواسطة mtak

فى السعوديه على ما اذكر
تم الزام جميع مطاعم الوجبات السريعه بعمل حائط المطبخ الذى يفصل بينه و ين صالة الطعام
ان يكون من الزجاج بحيث تبقى سيادتك بتاكل و شايف كل عمليات تصنيع الطعام

و من يخالف
يتقفل المطعم فى ساعتها

---

+1

وتم تفعيل الموضوع ده فعليا وحضرت وشفت

الطعام النيىء هو الحل

المشكلة ليست بالتلوث " باعتقادك " او القذارة بقدر ما هي حالة الشخص النفسية ومدى معرفته بثقافة الغذاء

فالصرصور مثلا قد لا ينقل بكتيريا ستافيلوكوكس التي قد تتواجد في الحليب والتي لا ينفع معها أغلب المضادات الحيوية او بكتيريا هيلكوباكتر المميتة الموجودة في اللحوم

وأقسم لك انه برىء براءة الذئب من دم يوسف عليه الصلاة والسلام


في حين أن المداومة على تناول مقدار من الزيوت الغير المشبعة او البسطرمة العصرية في أرقى وأفخم وأجمد مطاعم البلاد قد يذهب بك إلى أكبر وأجمد أطباء الجهاز الهضمي وبلا أمل يذكر


Raw food is the key

اقتباس:

---

المشاركة الأصلية كتبت بواسطة microbe

الطعام النيىء هو الحل

المشكلة ليست بالتلوث " باعتقادك " او القذارة بقدر ما هي حالة الشخص النفسية ومدى معرفته بثقافة الغذاء

فالصرصور مثلا قد لا ينقل بكتيريا ستافيلوكوكس التي قد تتواجد في الحليب والتي لا ينفع معها أغلب المضادات الحيوية او بكتيريا هيلكوباكتر المميتة الموجودة في اللحوم

وأقسم لك انه برىء براءة الذئب من دم يوسف عليه الصلاة والسلام


في حين أن المداومة على تناول مقدار من الزيوت الغير المشبعة او البسطرمة العصرية في أرقى وأفخم وأجمد مطاعم البلاد قد يذهب بك إلى أكبر وأجمد أطباء الجهاز الهضمي وبلا أمل يذكر


raw food is the key

---

ممكن تفاصيل اكتر
ناكل ايه يعني مادام اللبن و اللحم اوقات بيجيبوا للواحد السرطان

ماك مستوى النظافه فيه عاليه بس بلاش ماك الى فى المول -بيكون ضيق -والتهويه غير جيدة --والنظافه ليست مثل المحلات خارج المولات

اقتباس:

---

المشاركة الأصلية كتبت بواسطة lanos2004

ماك مستوى النظافه فيه عاليه بس بلاش ماك الى فى المول -بيكون ضيق -والتهويه غير جيدة --والنظافه ليست مثل المحلات خارج المولات

---

الرجل دة شغال فى ماك وبيعمل دعااااااااااايه
بهرج طبعا , بس الخلاصة تعمل زى
اكل فى البيت ديما ولما بكون جعان وانا برة البيت رغيفين وعلبة جبنه من اى سوير ماركت واديها تصبيرة
او تديها ربع كيلوا بقسماط

اقتباس:

---

المشاركة الأصلية كتبت بواسطة khaled_yassin

الرجل دة شغال فى ماك وبيعمل دعااااااااااايه
بهرج طبعا , بس الخلاصة تعمل زى
اكل فى البيت ديما ولما بكون جعان وانا برة البيت رغيفين وعلبة جبنه من اى سوير ماركت واديها تصبيرة
او تديها ربع كيلوا بقسماط

---

لا يا عم مش شغال فيه بس انا دخلت مطابخ ماك كلها واتحدك انك تمسك عليهم حاجه --بس الى فى المولات خاصه داندى مول --الى فوق مستوى النضافه مش ميه ميه
ماك انضف مطعم طعام سريع فى مصر وتحدى---

اقتباس:

---

المشاركة الأصلية كتبت بواسطة شريف

ممكن تفاصيل اكتر
ناكل ايه يعني مادام اللبن و اللحم اوقات بيجيبوا للواحد السرطان

---

أهلا أستاذ شريف

هناك ما يسمى بأهرام الغذاء ... food triangles
مختلفة في محتواها وملائمتها لكل شخص

http://1.bp.blogspot.com/_oSV0RPOC68...od-pyramid.jpg

ده أول واحد مثلا .. لطيف خالص حاطط كل حاجة ، قللك متحرمش نفسك من حاجة
لكن حددلك الهرم بقاعدته العريضة العيش ( وهو يقصد العيش الأسود اللي مليان ردة بتاع زمان ... ولا يقصد الوايت فلاور الدقيق الأبيض اللي بيتعمل منه دلوقتي الفينو - والفطير - وأغلب شغل محلات المخبوزات )
أو عيش الشوفان وده موجود في بلاد الشام
ودي فوائدها : احتوائها على نسب عالية من الألياف dietary fibers وهي مضادات أكسدة ومضادات سرطان

وقللك كل خضار وفواكة على قدر ما تقدر ... إما نيئة أو مخفوقة ( مضروبة بالخلاط )

عادات الشعوب العربية خصوصا الشعب المصري اللي بيموت في اللون الاحمر وبيعمل كل حاجة بالطماطم والصلصة والتسبيك جعلته يفسد طهي الخضراوات ويفقدها قيمتها .. وتحول الامر إلى انه حشر وملو بطن على الفاضي " ويقولك منا باكل خضار أهو "

الكثير أيضا يعتقدون ان أكل بعض الخضراوات نيئة يسبب وجع البطن والمغص وهذا تفكير خاطىء تماما

طبعا دي مش دعوة لاكل الفاصوليا مثلا او البسلة نيئة لأن الطعم هيكون غير مستساغ بالمرة (( عند اللي مش متعود )) ... لكن متحطهاش على النار ساعتين وتطلع عينها لحد ما تكسر كل فوائدها بحجة انها " مش مستوية لسه "

في اختراع الوقتي اسمه سوتيه ،، او شوربة خضار ، او انك تحطها كام دقيقة على نار هادية مع نقطة زيت زيتون او خل تفاح
__

بعد كدا دخل على البذوروالبقوليات والمسكرات .. دي كمان كل منها ما تشاء (( ده للشخص اللي مش بيعاني أمراض جهاز هضمي او قولونه عصبي وكدا ))

الفول الأخضر أحلى وأفيد من الناشف ، الناشف فيه نسب عالية من السيانيد وهي مادة سامة
طبعا الناس مش بتموت لكن بتحصلها حالات خمول ... يقولك " بطلوا أكل فول بقا "

المكسرات للأسف في مصر غالية بغباء .. كيلو اللوز مثلا ب 70 جنيه عند واحد مش حرامي نصاب

فوائد المسكرات احتوائها على زيوت غيييير ضارة بل مفيدة جدا + بعض المعادن + الطعم الحلو

وبعض منها بيحتوي على سكريات مفيدة ( الوايت شوجر السكر الأبيض من المحرمات زي الدقيق الأبيض برده )

اعتقاد خاطىء آخر : انها بتتخن وتسمن X محصلش

__

ابتدي الهرم يضيق ويوصل لقمته وتتحط الحدود عنده ، الحلويات والبيض ومنتجات الألبان والسمك خد منها بشكل أسبوعي بس متغرفش


إلى ان وصل لذورته في التقليل وهي اللحوم الحمراء ( كميات قليلة شهريا )

ملاحظات : لحوم الإبل وألبانها مستثناه من هذا كله .. لكنها في بلد زي مصر وأغلب بلاد العالم مش متوفرة .. والموجود منها هزيل ضعيف وسلالاته غير جيدة
والكيلو منها حاليا ب 40 جنيه ( جمال صغيرة وحديثة السن يعني وحشة ) بعكس الأبقار مثلا المتعارف عليه انه اللحم صغير السن أفضل إلا الإبل خمس سنين فما فوق : حلو

يمكن دي الحكمة اللي الدين خلا زكاة الأبل تبدأ من عمر خمس سنوات للناقة .. يعني لو زكيت بجمل اقل من خمسة مينفعش اصلا


طبعا الزيت الرسمي : زيت الزيتون ، وزيوت اخرى زي زيت اللوز المر
لكن لا زيوت مهدرجة تنفع ولا سمن ينفع ( بلدي مش بلدي كلو مضر )

تبقي جدلية واحدة بتقول : على كدا احنا معظم اكلنا غلط بس صحتنا ماشية وزي الفل ... الرد هو ان ربنا عظيم ادالنا مصانع شغالة كويس وأجهزة detoxification لا تتعب .. لكن لكل ماكينة طاقة وعمر افتراضي وجينات مختلفة هي اللي بتحرك دا كله It's all about your genome

بس بجد لو أكلت أكل صحي هتوصل لسن متقدمة وهتعرف السبب وقتها وهتحس ده في بدنك .


انتهى الكلام
______________________________________________

توجد مثلثات أخرى أكثر تشددا وتطرفا ... تلاقيها بتمنعك عن حاجات كتير وتلاقيك بتقضي يومك كله خضار وفاكهة وبس ((( ولازم تكون فريش ، فريش فريش وأورجانيك كمان ))
not genetically modified مش معدلة وراثيا في المركز القومي للبحوث

في خضر وفاكهة مبتنزلش مصر ولا عمرها هتنزل واتضح ان منطقتنا فقيرة جدا بانواع النباتات

ودي بيمثلها الهرم ده

المحصلة : لن تلمس معدتك النار مطلقا .

http://perfecthealth101.org/wp-conte...od-Pyramid.jpg

وده مثلث شارح المثلث
http://paleozonenutrition.com/wp-con...amid.gif?w=300

عامل غلط على كل حاجة
وقللك خد مكملات من الصيدلية " فيتامينات وخلافه "
هنا في مصر متقدرش تاخد مكملات من الصيدلية لان الشركات كلها نصابة ولانهم بيبعولك الهوا في ادوية الحديد والفيتامينات وخلافة ((( تاخد عشر زجاجات حديد شراب يعادلوا قرص واحد فقط من الحديد مصنع في بلد زي سوريا - حلب .. مش هقلك بريطانيا ولا ألمانيا ))


كل ما تطرّف المثلث كل ما ضمن الإنسان طعام صحي ومعدة غير مضطربة وجلد وبشرة زاهية ونقية


الرأي الذي ترتاح اليه النفوس : هو في المثلث الاول انك تاكل كل حاجة .. تكتر خضار وفاكهة وألياف ................ وتقلل الجبن والحليب واللحوم والسكريات والمخبوزات اللي بدقيق مش بلدي .. وتعتدل في الأسماك الطازة او المعلبة زي التونة بس متكونش من مياة عذبة وخلاص

وتمتنع عن الطعمية " الفلافل " وتاكل الباذنجان أسود نىء .. وتكفي تومه وبصله في الأسبوع تؤكل بشكل مباشر intact

اما الملل فكسره بالتنويع والتجديد في شكل الطبق " افتكس "

والإعتدال في كل حاجة حتى المفيدة

سلام