الموضوع: نصائح لتوفير الوقود

تحية طيبة وبعد،

بمناسبة طبعا ان البنزين قليل جدا والأزمة بدأت تتفاقم وبعد ماكنت مش حاسس بيها في الهرم بدأت اعاني منها وتقريبا اصبح مفيش بنزين
فقولت اقولكم بعض النصائح ودي عن تجربة شخصية ومنها طبعا الي عرفته من هنا في المنتدي

1- موور قدر المستطاع

علي قد ماتقدر تمور العربية وتسيبها تمشي بقصورها الذاتي دة هيوفر معاك البنزين بشكل ملاحظ

• يعني لو انت داخل علي اشارة وشايفها قافلة مور قبلها بفترة كافية لأنك كدة كدة هتوقف
• لو عارف ان في مطب في المكان الفلاني مور قبله بفترة كافية وليكن 500 متر وسيب العربية ماشية براحتها
• لو الطريق منحدر وانت مش مستعجل اوي مور وسيب العربية تمشي بقصورها الذاتي

2- ريح العربية في الغيارات

• حاول ماتحرقش علي الغيار وانقل علي الغيار الأعلي بحد اقصي علي 2.5 rpm ولو عايز تريحها خالص يستحسن تنقل علي 2 rpm وانا شخصيا بنقل علي 2 ولو بحرق بوصل 2.5 بحد اقصي

3- اغلق زجاج جميع الأبواب

• حاول تقفل جميع شبابيك العربية وانت ماشي ودة هيقلل بدوره مقاومة العربية للهواء وهيوفر معاك في البنزين علي المدي الطويل لو بتسافر او بتمشي مسافات طويلة علي الدائري

4- قلل المسافات قدر المستطاع

• حاول تقلل المسافات المقطوعة بالعربية قدر المستطاع ، يعني لو بأمكانك تمشي في شارع موازي للشارع الي انت رايحه وتدخل في شارع مقابل لليو ترن عشان تقلل المسافات الي هتهدرها في الرايح والجاي يكون دة افضل

مثال : لو انت عايز تروح مكان محدد في شارع الطيران وانت ماشي في شارع يوسف عباس حاول تدخل في الشارع الصح الي مقابل لليو ترن عشان ماتمشيش مسافة مالهاش لازمة وهترجعها تاني لما تلف

5- تجنب المطالع

• لو المكان الي انت رايحه عارف ان الطريق بتاعه فيه مطالع حاول تمشي في طريق تاني معتدل

مثال : انا شخصيا لو رايح 6 اكتوبر بروح من طريق الواحات لأن الطريق معتدل نوعا ما لكن لو روحت عن طريق مصر - اسكندرية الصحراوي تقريبا همشي المسافة كلها مطالع

6- بنفس المنطق دور علي المنازل

• بنفس المنطق السابق حاول تختار طريق انت عارف انه منزل او منحدر

مثال : لو انت راجع من اكتوبر ورايح الهرم حاول تمشي طريق المحور ثم مصر - اسكندرية الصحراوي لأن تقريبا هتستهلك ربع البنزين فقط لو طبقت النصيحة الأولي وهي انك بتمور العربية وتسيبها علي الله يعني انا شخصيا بمور من اول اشارة جهينة لحد هايبر وبسيب العربية تمشي براحتها

7- بطل في الأشارات



العربية بتستهلك بنزين كتير جدا في الأشارات

• لو انت اغلب مشيك جوة البلد اصبح معظم الأشارات دلوقتي الكترونية وفيها عداد بيقولك هتفتح امتي ودة هيديلك وقت مناسب جدا انك تبطل العربية وترجع تدورها قبل الأشارة ماتفتح ودة هيوفر معاك بنزين لو بتمشي جوة البلد كتير

8- خفض السرعات



تقريبا معظم العربيات سواء كربراتير او انجيكشن بتستهلك مرة ونص لما بتتخطي سرعة 96 كم/ ساعة

• فحاول علي قد ما تقدر ماتمشيش بسرعة اعلي من 90 منها عشان الرادار ومنها هتوفر في البنزين كتير

9- خفف من وزن العربية

لو قدرت تفضي شنطة العربية من الأشياء عديمة القيمة في الوقت الحالي هتوفر كتير من بنزين العربية لأن عزم الطلعة من اكتر الأوقات الي العربية بتستهلك فيها بنزين عن غيره من الأوقات

10 - سخن العربية كويس قبل ما تطلع

العربية وهي باردة بتستهلك بنزين اكتر من وهي سخنة

11- مون بليل وانت اولي بالفرق

معروف ان الحرارة بتمدد الغازات ودة بيخلي الطرمبة بتاعة المحطة معيارها يختلف عن البنزين الحقيقي الي بينزل
يعني لو مونت بليل 20 لتر يمكن فعلا تحط في العربية 20 لتر
لكن لو مونت الصبح 20 لتر يمكن فعلا يتحط في العربية 19 لتر

12 - اضبط الموتور وغير البوجيهات ونظف الكربراتير او البوابة والرشاشات

لو ضبطت موتورك وعملت السيرفيس بتاع عربيتك يمكن يكلفك اقل من تكلفة البنزين الي مش موجود اصلا

13- اضبط ضغط الأطارات

الكاوتش لو مريح شوية بيزيد من احتكاكه بالأسفلت وبالتالي بيزود استهلاك البنزين

14- قلل من استخدامك للعربية قدر المستطاع

لو هتنزل تشتري حاجة ينفع تشيلها علي ايدك فمفيش داعي من استخدام العربية
منها تمشي رجلك شوية ومنها ماتسخنش وتستهلك ومنها ماتمشيش بيها وتستهلك
ولو تقدر تروح شغلك مواصلات (دة لو لقيت مواصلات - انا النهاردة فضلت واقف نص ساعة مالقتش حاجة اركبها وجميع الميكروباصات ماشية فاضية ومش بتحمل وغالبا بيدورا علي جاز)


اتمني ان النصايح دي تكون وافية ولو حد عنده افكار اخري لتقليل استهلاك العربية في البنزين ياريت يقولنا عليها ونستفاد بيها كلنا

والله المستعان
،
،