الموضوع: هفتح كار كير ومحتاج اخوانى يقفوا معايا

المشاركة الأصلية كتبت بواسطة zocor742

الله يخليك ويديك على قد نيتك واكيد لو احتجت اى حاجة هتابع مع حضرتك
متشرفتش بأسم حضرتك
اخوك سامح محمد
من الاسكندرية
واعمل حسابك معزوم على الافتتاح ان شاء الله

انا اللي خلاني اقفل خناقات مع صاحب المحل لانه كان موسوس وفاكر ان الميا هتوقع العماره وما صدق جاب واحد صحبه مهندس مجنون برضو وقاله اه الميا توقع العماره والهجص ده ودخلنا مع بعض في دوامه يقولي فور الارضيه وحط عازل الي هو الاوتوميل وبعد كده سيراميك لا فور الحيطان لا اعمل مش عارف ايه لحد ما كرهني في ام عيشتي كلها واخدت منه كل مليم دفعته في المحل وسبته


الارضيه السيراميك مفيهاش مشاكل بس لو في نزله او طلعه في اول المحل خليها احسنت الخلطه الي بتبقى اسمنت على رمل على زلط بيسموها صبه تقريبا


هي دي العده الي حضرتك شوفتها الخراطيم دي من ناحيه فيها مسدسات ومن الناحيه التانيه فيها انابيب فيها الحاجات بتاعه الكار كير وانت ومزاجك

يعني ممكن تخليهم 3 او 5 او 7 براحتك ممكن ال 3 يبقى منظف داخلي وواحد هوا والتالت مثلا منظف متور


انا شايف انها مالهاش لازمه اوي بس منظر لان كده كده دي مش بتدي كفاءه في الاداء زياده اوي

انا اللي كنت جايبه حاجه كده اسمها الزراعي زي جركن بيتملي عادي وبيتكبس هوا وبعد كده تستخدمه

بس في عالم تنحه تقولك فين العده هو انت شغال بلدي دول طبعا بالكلام بيتثبتوا لان الشعب ده طبعا فتاي


التنظيف الكيماوي الداخلي الى حد كبير عليه طلب وهتلاقي عربيات تدخلك مطحوووونه اوي

حاول تجيب نمره سونكس من الدليل لانها ضايعه من عندي لو معرفتش يومين وانا هتصرفلك فيها


الحيطان في المحل انا كنت عاملها كلها استيكرات وكانت غاليه بصراحه بس جميله شوف انت امكانياتك ايه مش هتفرق كتير

يوم الافتتاح عملته مجانا بصراحه الناس معظمها كانت زوق ودفعوا تبس كتير اوي للعمال اتزبطوا بيه

قصه العمال دي قصه تانيه خالص لازم تبقى مصاحبه لدرجه معينه ميبقاش قرفان منك وميبقاش متعود عليك لانه في كلا الحالتين هيسيب المكان لو قرفان منك ولو متعود عليك هيستهبل وهتمشيه ومتخليش حد في العمال الريس بتاعهم عشان مينفسنوش من بعض كلهم سواسيه وعندك دفتر حسابات تسجل العربيه نوعها ورقمها والوقت والشغل الي اتعمل فيها وياريت لو نمره الزبون كمان عشان تطمن عليه بعد كده

بس طبعا انت لما تفتح هيبدا ناس تبقى عايزه تجليك تشتغلك عندك لما المكان تلاقي عليه رجل ف ساعتها العمال بيتخرسوا

او يا اما تعمل الغيسل مثلا متضمن تبس العمال يعني لو برا وجوه ب 20 تخليه 25 وتعمل مثلا ياطفه مممنوع الاكراميات وهكذا

انا انصحك متبعدش عن سونكس في حوار المنظف الداخلي ده ملووووووووش حل فعلا وبيتخفف 1/10 يعني لو هتحطه في جركن 4 لتر مثلا هتحط نسبه 1/10 وهو ممتاز جدا جدا جدا وريحته كويسه سعرها غالي شويه مش فاكر كام بس بالنسبه للكفاءه وانه بيتخفف بيقعد كتير جدا وجميل اوي


بص الفروقات بين المغاسل مش كتير اوي بس في دقات معينه بتجنن الزبون اوي مش بياخد باله منها الصنايعي لانه فاكر نفسه جرندايزر ولو الزبون شايف وساخه في العربيه هو فاكر انه ممكن يقنعه انها شوكلاته جالاكسي كمان

ف القصه كلها تعامل تعامل تعامل احنا وصحابي كنا شباب محترم وواخدين بالنا من المحل ف كان معظم الزباين بتحب تيجي تاني لانهم شايفين ولاد ناس مش نصابين وبتبقى القعده كلها رغي في العربيات الجري العربيات الجديده وياسلام بقى لو حسسته باهميته تعمله كبايه شاي حاجه ساقعه مش مشكله تجيب سخان ميا الي هو بويلر وتخليه عندك للزبيان والصنايعيه ولو مش جنبك سوبر ماركت هات صندوق حاجه ساقعه صاروخ مش مشكله.... هي اهم حاجه معامله الزباين احنا كنا 3 شركاء والله زي ما بقولك كل واحد فينا له زباينه الي بيحبوه كان في ناس كتير اوي تحب تجيلي مخصوص عشان تقعد معايا بجانب الغسيل لو مش موجود ممكن يكبروا دماغهم ويجيوا بعدين وبرضو صحابي كان ليهم زباينهم يسالوا عليهم او عليا هو الموضوع ده ماشي كده اهم حاجه متزعلش الزبون في حاجه مش معنى كده انه يركب ويدلدل بس انت تديله حقه


وميزه مراكز الكار كير عموما بيهتم بالعربيه يعني انت الغسله العاديه عندك تنضيف ارضيات من الوساخه ومسح البيبان والفرش من التراب وتلميع التبلوه بالاضافه الى انك تبقى برنس لو رشتله معطر
برضو الخامات باكد عليك تاني المنظف الداخلي لاااااازم سونكس لو جربتوا مش هتفكر تجيب منظف داخلي تاني خالص

الملمعات هتلاقي كتير في السوق هات ملمع غالي للكار كير وملمع عادي للغسيل العادي
وسونكس برضو عندهم كزا نوع ملمع في منهم نوع مط مش بيدي لمعه بيتحط في العربيات النضيفه جيتا اوكتافيا الحاجات دي


لو في حاجه تانيه قولي ومتتكسفش

وان شاء الله ربنا يرزقك خير الرزق في المحل ان شاء الله

ربنا يوفقك