بسم الله الرحمن الرحيم


اخوانى واخواتى فى قسم هيونداى واحشنى جدااا وميرسى لكل اللى اطمنو عليا بعد اللى حصلى ....

وبشكر جدا قسم هيونداى بعد التغيرات الجديده اللى حصلت فيه فى الاونة الاخيره انى استفدت جداا

فى الفترة الاخيره دى وجيه اليوم اللى استخرج فيه مهارات اعضاء القسم فى الفترة الاخيره كنت لما

بغير حاجه فى العربيه بروح اشترى مثلا عاوز تيل بروح للراجل عاوز تيل فرامى امامى اكسيل بكام

ياباشا ب 50 جنيه اتفضل المهم قررت انى مركبش فى عربيتى الا الحاجه الاصليه والنوعيات النضيفه

زى ما اتعلمت من قسمنا الجميل .......

فكرة شراء قطع الغيار دى بعد اللى العربيه عملتو معايا وانا شرحتو فى الموضوع ده ......

http://www.nilemotors.net/Nile/283309-a.html

بعديها على طول روحت البيت وكتبت الموضوع وقمت فاتح الفهرس وطلعت موضوع مهاب ده .....

http://www.nilemotors.net/Nile/27953...ts-mobies.html

لانى كنت متيقن انى هغير التيل طلعت ورقة وقلم وكتبت اسم التيل وقريت قبل كدا فى موضوع هنا ان

ابراهيم البنا بيبيع قطع الغيار الاصليه وهلاقى عندو التيل ده ....

المهم قفلت المنتدى ودخلت نمت على انى اصحى فى الصباح الباكر اروح للاسطى نبيل الميكانيكى

وحضرت لبس الشغل لانى بشتغل معاه فى عربيتى وهو اصلا معهوش صنايعيه والراجل ده بقدرو جدا

وبحترمو لان كل فترة شغلو فى الميكانيكا كانت بره مصر اساسا وفاتح الورشه علشان بس ميقعدش

فى البيت وميشتغلش هواية يعنى وبيقعد يشرحلى كل جزء بنفكو وممكن بقفل الحاجه وافكها تانى

وهو يركبها كا تجربة يعنى بجرب نفسى المهم صحيت الصبح واخدت العربيه

وطلعت قدام الورشه وفكيت العجله الشمال اللى العيب منها وكان هو لسه مجاش الورشه مسحت

العربيه ومسحت الموتور ولمعت العربيه من جوه وروقت الشنطه كان هو جيه كانت الساعه 12.5 الضهر

فكيت العجله زى ماواضح فى الصوره ....



وبعدين الاسطى نبيل ابتدى يشيل التيل ويفك بقيت الحاجات كما فى الصوره ....



وبعدين طلع الجنشه بالطنابير بالصرة بكلو بره بقا المنظر كدا .....




والمفاجأه بقا يارجالة مش زى ماكنت متوقع العيب من الكوبلن العييييييييب طلع من اييييه بقا من البليه

فركت مكانها وادشدشت مليييييييون حته وكتر خيرها انها جابتنى من مدينة نصر لحد البيت والحمد لله

انى ماكنتش بجرررى .....

ودى البلية مدشدشه مكانها .....



المهم بعد مباحثات ومشاورات مع الاسطى قالى اجهز يابطل الطنابير زى مانت شايف عالى وواطى

وحالتها حال وصرة العجل وهو بيطلع البليه منها لقاها صغيره البليه بتدخل وتطلع فيها قالى هنغير الصرة

وهنجيب بلللللى جديد واولسيهات والمشتريات فى المشاركه الجايه .....

المشتريات :-


1:- طنابير المانى امامى سعرهم 180 جنية من ابراهيم البنا



2:- صرة العجل اللى فيها المسامير اللى بيتربط فيها الكاوتش سعر الواحده 110 جنيه من محل قطع

غيار فى الكيت كات وصناعتها كورى اشتريت 2



3:- تيل فرامل Hyundai Genuine السعر 140 جنيه بالسوست بتاعتها الاصليه بتاعت العربيه من ابراهيم البنا



4:- بلى العجل السعر 110 جنيه 4 بليات 2 بلية فى كل عجلة من ابراهيم البنا



5:- 4 اولسيهات للبلى علشان البلى لما يتشحم تتركب الاولسيهات فيه علشان تحمى الشحم السعر 20 جنية من ابراهيم البنا



ـــــــــــــــــــــــــ ـــــــــــــــــــــــــ ــــــــ

المهم بعد ما اشتريت الحاجه طلعت من الاكياس بتاعتها وكلو اتغسل بالبنزين والجاز وبدأ التشحيم كما

فى الصور

الجنشه اثناء التشحيم



بعدين الطنابير والصرة بعد ما اتغسلو بالبنزين والجاز



بعدين تم التركيب بنجاح الحمد لله وكانت الصوره كالتالى



ـــــــــــــــــــــــــ ـــــــــــــــــــــــــ

مقارنات بسيطه بين قطع الغيار القديمه والجديدة


التيل الجديد والقديم والتيل القديم طالع كويس مش متاكل اوى وخليتو معايا احتياطى يمكن احتاجو لان كل قطع الغيار باخدها اشيلها عندى يمكن احتاجها بعد كدا




الصرة القديمه والجديده والحوار كلو كان فى الزور ده لانو مبوش البلية بتدخل بالايد العاديه بس اساسا هى بتدخل كبس




الاولسى الجديد والقديم




البلى الجديد والقديم مدشدش مليون حته





الطنابير الجديده والقديمه والقديمه زى ما واضح فيها عالى وواطى وحالتها حااااال



ـــــــــــــــــــــــــ ـــــــــــــــــــــ

فى النهاية بعد يوم متعب جدااا وماشوير رايح جاى لاكن المعلومات اللى الواحد طلع بيها قيمة جدااا جدااا ......

تقييمى بقا بعد التركيبات دى العربيه بقت ناااااااااااعمه لابعد الحدود ولا فى صوت خروشه ولا ونة

وحسيت العربيه ماسكه نفسها لا وكمان لسه لما التيل يطبع والطنابير تاخد وضعها هتبقا الدنيا تمام

التمام والفرامل اختلفت تماما تماما ......

المهم التكلفه النهائيه بعد الحوارات دى كلها 860 جنيه بالمصنعيات بمسامير وورد وشوية حاجات كدا

بس فعلا الفرق يستاهل ونص .....

اخدت بقا العربيه النهارده الصبح كنت رايح درس وبعدين طلعت غسلتها وغسلت الموتور وبقت فله



وده كان تقريرى المتواضع عن عربيتى الاكسيل مستنى تقييمكم يانجوووم