الموضوع: قول ايه اكتر حاجه بتضايقك من اللى ماشى جمبك

1- اكــتر حاجة بتضايقنى من اللى جنبي انه يكسر عليا من غير ما يشغل اشارة وكأنى مش موجود ومش لاقى تفسير الا انى ممكن اكون فى النقطة العمياء فى مرايته
2- اكــتر حاجة بتضايقنى من اللى جنبي انه يا دوب اكصدامه يعدينى ويبتدى يكسر عليا عشان ييجى فى الحارة بتاعتى وكمان من غير اشارة (معظمهم تاكسيات بيضا او ميكروباصات) ولما ازود ومديلوش الفرصة كلاكسات كتيييييييييير وكأنى انا اللى كسرت عليه ومش لاقى تفسير
3- اكتر حاجة بتضايقني من اللى وراريا انه شايفنى مزنوق من التلات اتجاهات يمين وشمال وادام وهو ورايا وعمال كلاكسات ومش لاقى تفسير
4- اكتر حاجة بتضايقني من اللى قدامى انه من غير اي اسباب يمسك فرامــل مرة واحدة مع انه سايب مسافة بينه وبين اللى ادامه بس سرح شوية ومخدش باله ان العربيات اللى ادام رقفت فهو بيفرمل على اخر لحظة وانا أولع وراه وعيالى الاقيهم فى الدواسة الورانية او الاقيهم لازقين فى التابلوه ومفلوقين من العياط وبقهم جايب دم(حصلت فعلاً معايا وكان نفسي اجيبه واحطه تحت العجل) وهو عــادي جداً مفيش حتى كلمة معلش وتفسيرها الوحيد ان هو كان سرحــــان
5- اكتر حاجة بتضايقنى على الدائرى ان الميكروباصات تركن فى الحارة الاولى والتــانية كمان لان السواق عاوز ينزل الركاب ادام السلــم بالظبط مع انه لو طلع متر واحد بس ادام هيركن فى الحارة الاولى
6- اكتر حاجة بتضايقنى ان واحد يبقى ماسك الشمال وماشى على 60 كــم فييجى كمان واحد وماشى فى الحارة اللى جنبه على نفس السرعة ونديلهم كلاكسات ورعاش وهم لا حياة لمن تنادى
7- اكتر حاجة بتضايقى ان واحد ربنا انعم عليه بمرايتين فى اليمين والشمال وشغالين وهو أو هــي قافلهم مش عارف ليه ولما تيجي تعدي من جنبه ويحدف عليك فلا حــرج عليه!!!!

انا مجبتش سيرة المقطورة خالص و كتير من مواقف التاكسي والميكروباص لأن بأة عادي جداً اي حاجة غلط تطلع منهم (إلا ما رحــم ربـي)