الموضوع: شرح طريقة اثبات لونين على الرخصة بطريقة قانونية !

السلام عليكم ورحمة الله وبركاته

الواحد اكيد من حقه انه يهتم بعربيته وشكلها ويخليها - في نظره - احلى عربية في الدنيا

لكن للاسف وبعد ماتعدل عربيتك وتظبطها تتمسك في كمين ! وتلاقي نفسك هووب في ثانية واحدة كل اللى عملته وتعبت فيه اتشال وكمان اتحولت العربية لفحص وغرامات ومشاكل وقرف المرور والفحص والطوابير

وكل ده عشان انت واحد حبيت تغير في شكل عربيتك ولو بالبسيط !

يعني ابسط حاجة مثلا لو واحد عربيته لونها ابيض ! وحب يعمل السقف والكبوت بالكاربون الاسود عشان يدي شكل جميل للعربية ! هتتمسك في كمين هتتعلق
طيب خلينا ناخد الموضوع من اوله كدة !

لما بتتمسك في كمين ايه المخالفة ؟ او ايه نوع مخالفة الملصقات عموما ؟ كواحد مثلا عامل السقف لون غير لون عربيته ! ؟ او عامل كاربون على الكبوت ! ؟ او حتى حاطط استيكر على الباب ؟

الظابط هيقولك انت عندك ملصقات ! ؟ لكن اللى هيتكتب بالظبط في الايصال "مخالفة تغيير لون السيارة "

لان الملصقات دي المقصود بيها الاستيكرات الصغيرة البسيطة ! ودي غالبا مابتعدي وماحدش بيعلق عليها

الظباط بيرخمو لو انت مغير لون سقف / كبوت / شنطة ! حاجة ملفتة ! ؟ وهنا بيخالفك مخالفة تغيير لون

وطبعا غير المخالفة ووجع القلب بتبقى حاجة تحزن لما تلاقي الشغل اللى انت عامله في عربيتك راح ؟ خاصا اني واحد من الناس اللى حصل معاها الموضوع ده !!

طيب دلوقتي ايه الحل عشان تبقى ماشي في السليم ولما تقف في كمين تحط صباعك في عين الظابط ؟

الحل انك تثبت لونين على الرخصة يعني بدل ماهو مكتوب في الرخصة عندك لون السيارة : ابيض

يبقى مكتوب لون السيارة : ابيض / اسود

سعتها تعمل كاربون اسود تعمل عفريت ازرق ! ان شاء الله العربية كلها تبقى سودا ومافيهاش غير خط واحد ابيض مش هيقدر يفتح بقه معاك

في قانون المرور المصري عشان تثبت لون على الرخصة لازم تكون راشش

يعني ماينفعش تدخل المرور بعربيتك وهي عليها الكاربون الاسود وتقوله اثبتلي ده على الرخصة

لازم تبقى راشش الكبوت / السقف او اي جزء من السيارة باللون اللى انت عايز تضيفه على الرخصة وطبعا لازم تبقى راشش جزء واضح وفي وش العربية عشان يتم اثباته يعني ماينفعش تبقى راشش الاكصدام الخلفي مثلا وتقوله اثبتلي ده على الرخصة ! فغالبا مطلوب منك انك ترش اما السقف او الكبوت عشان الموضوع يمشي

طيب دلوقتي مش منطقي برضوا ان الواحد يروح يرش عربيته ويقلل من تمنها ! خاصا لما ترش سقف او كبوت ! عشان تحط شوية استيكرات ؟ ؟ ماينفعش طبعا

ايه الحل ؟؟

الحل بسيط وسهل جدا وانا عملته والحمد لله مشي الحال وكل حاجة تمام

هتروح لاي واحد بتاع دوكو وتشتري منه علبة رش اسبراي باللون اللى انت عايزه وليكن فضي زي مانا اشتريت

العلبة دي تمنها بالظبط 8 جنيه

بعد كدة هنرش وليكن خط عريض في في نص الكبوت واخد الكبوت من اوله لاخره ! !

طبعا عشان ترش الخط ده هتجيب ورق جرايد وتعزل الكبوت بالكامل وتسيب بس مكان خط في نص الكبوت فاضي وهو ده اللى هتبدا الرش فيه

وحاول بقدر الامكان انك ترش اللون بحيث يكون خفيف يعني مش لازم تديله كذا طبقة <<< خد بالك اننا عايزين لما نخلص نشيله فلازم تبقى الرشة خفيفة عشان تطلع علطول وبدون ماتسيب اي اثر

وانا اخترت انك ترش خط عريض في النص وبالذات على الكبوت عشان يبقى واضح وانت داخل الفحص

هتخلص رش وتسيبه ينشف وتاني يوم مباشرة تتوجه للمرور

هتجيب نموذج فحص وتدخل الفحص عادي جدا اكنك بتجدد الرخصة هياخد منك رقم الشاسيه والماتور ويتاكد ان كل حاجة تمام

سعتها هتقول للمهندس انا بفحص تغيير لون وعايز اضيف اللون ده على الرخصة المهندس اول حاجة هيعملها هيحط ايده على الخط

هيلاقيه رش هيقولك ماشي وهيمضيلك على الورق ويكتبلك فيها اللون الجديد

لو لقيته بيقولك لاء او بيحور ! اعرف تماما انه عايز يشرب شاي ومش هيخلصلك حاجة الا لما تديله 15 جنيه في ايده

طبعا للاسف ده حال البلد << مع انك ماشي قانوني عشان محدش يدخل يرد يقول اني بحرض على الرشاوي والكلام ده

انت ماشي في القانون رشيت الكبوت ومن حقك انك تثبت اللون التاني على الرخصة لكن للاسف هنقول ايه فيه ناس فعلا مش بتخلص حاجة الا لما تشربها شاي

بعد كدة هتاخد الورقة الجديدة اللى مكتوب فيها اللون الجديد وهتطلع على الشباك هتسلمهم الرخصة القديمة والورق وتنتظر لحد مايدولك رخصتك الجديدة مكتوب فيها اللون الجديد ومبروك عليك يا معلم

بعدها هتطلع على اي بنزينة ! وتديله ازازة فاضية وتقوله حطلي هنا شوية بنزين !

ادي العامل في ايده 2 جنيه وهو هيحطلك حبة بنزين

هتروح البيت وتبل الفوطة بنزين وتمسح على الخط اللى انت رشيته هتلاقيه راااح ورجعت العربية كما كانت بدون مايسيب اي اثر نهائيا <<< محدش يقلق ده عن تجربة مش بيسيب اثار على بوية العربية نهائيا

بعد كدة مبروك عليك عربيتك رجعت كما كانت + رخصتك بقت لونين

اطلع على اي محل استيكرات وعيش حياتك ومحدش بعد كدة هيقولك تلت التلاتة كام ! !

الحمد لله بعد ماعملت الموضوع ده وقفت مرتين في كمين شارع المرغني واكيد كلكم عارفين مدى غلاسة الكمين ده

وكنت مبهدل العربية استيكرات ومقدرش يتكلم ولا حتى يقولي اي حاجة !!

انا وقفت في الكمين ده و تلت ظباط شافو الرخصة بتاعتي والحمد لله ماحدش قدر يتكلم !

الاول عسكري وقفني شاف الرخص كلو تمام وقالي امشي

بعدها لسه هخرج من الكمين ! راح ظابط كان موقف عربية نص نقل اول ماشافني راح قالوه امشي امشي وراح جي نحيتي !!

بيقولي رخصك قلتله ماهو لسه شايفها ! ؟ قالي لاء انا كمان عايز اشوفها عشان نشوف بس الشغل اللى انت عامله في عربيتك ده ايه

طلعلته الرخص راح قالي عندك فاميه ومخالفة ملصقات اركنلي على جمب

قلتله فاميه ؟ فين الفاميه ده ؟ <<< الازجاج اللى ورا كان سعتها مشبر فقلتله ده الازجاج مشبر يا باشا راح بص عليه كدة

قالي اه بس انت عندك مخالفة ملصقات

قلتله فين الملصقات ؟ قالي امال الخط اللى انت عامله من اول العربية لاخره ده ايه ؟ قلتله حضرتك مش واخد بالك ان الرخصة لونين ؟ قالي اه سعتها راح مشي وادى الرخصة لظابط تاني

لقيت ظابط تاني جاي نحيتي

بيقولي انت عندك مخالفة ملصقات وراح مدخل راسه جوة العربية قالي وكمان عندك فاميه في الازجاج الخلفي "الشنطة" اركنلي على جمب

قلتله يا باشا مافيش ملصقات الرخصة لونين ! قالي ماشي بس فيه فاميه اركنلي على جمب

ههههههههه هو حالف يخالفني

قلتله ماشي ركنت على جمب قالي هتشيل الفاميه ولا اسحب الرخص ؟ قلتله يا باشا ده فاميه على الازجاج بتاع الشنطة عشان السماعات بتبوظ من الشمس وانا لو عايز افيم كنت فيمت العربية كلها

قالي خلاص يبقى اسحب الرخص وتقولهم الكلام ده في الفحص ! قلتله لا على ايه ورحت شايل الفاميه وواخد الرخص وماشي

طبعا مش مهم موضوع فاميه الضهر ده بسيطة وتاني يوم رحت فيمته تاني

الاهم ان الاستيكرات والشغل اللى عامله في العربية متكلمش عليه وده الاهم ! وان موضوع الرخصة اللونين نجح والحمد لله

انا قلت اكتبلكو الموضوع ويارب تكون الطريقة واضحة لان فيه ناس كتير سالتني عملت الرخصة لونين ازاي

فقلت افيدكم في الموضوع ده

خاصا ان الواحد يعمل حاجة بسيطة زي دي ويبقى ماشي قانوني ومرتاح احسن بكتير من لما يبقى مظبط عربيته وخايف يقف في اي كمين ويتبهدل ! !

واللى عنده اي استفسار انا تحت امره