على بركة الله رايح اطلع الرخصة محتاج مساعدتكم + استفسار بخصوص اللوحات

بسم الله الرحمن الرحيم
السلام عليكم ورحمة الله وبركاته
---------------

اولاً انا الحمد لله بسوق بقالى فترة ومفيش اى مشكلة

لكن جه الوقت القانونى اللى اخيراً هطلع فيه رخصة والحمد لله ( 18 سنة )

كنت عاوز اعرف منكم ايه المطلوب بقى ؟

يعنى ايه الورق المطلوب بالظبط واجيبه منين والحجات دى كلها


تانى حاجة عاوز اسأل عنها هى هل ينفع ادخل الاختبار بعربيتى الشخصية ؟

مع العلم ان العربية متفيمة من كل حتة ,, يعنى عندى احتمال انها لو دخلت المرور مش هتطلع منه ههههههه

ولو افترضنا حتى انى جبت عربية واحد صاحبى المهم يعنى ينفع ادخل امتحن على اى عربية غير اللادا الله يحرقها بحاز ولا لازم عربية المرور ؟؟

--

فى استفسار عندى بقى خاص باللوحات

انا بفكر اغير شكلها بمعنى انى اغير شكل الصاجة بتاع اللوحة وبفكر اخليها نمر سمرة كمان هى لوحات قديمة مش جديد وبفكر اعملها نمر سوداء
هل دا يزعلنى فى حاجة فى المرور لو خليت اللوحات سوداء ؟

بالنسبة لتغيير شكل الصاج اللى اقصده انها بدل ما هى مربعة هعملها مستطيلة بشكل عريض شويتين كدا وبإرتفاع قليل يعنى متهيألى مفيهاش مشكلة انا سؤالى كله على النمر السمراء هل هتزعلنى فى حاجة؟؟

ومثلاً النمر مكتوبة كذا

ملاكى الغربية
12345


انا عاوز اعملها بالعرض بالشكل دا

ملاكى 12345 الغربية


يعنى هخليها بالعرض واخلى الارقام فى النص وشفتها على عربيات كتير زمان ايام النمر القديمة هل فى حاجة مخالفة فى كدا ؟




مشكورين مقدماً

ايه يارجالة خير ؟ انا كاتب الموضوع فى صحراء ولا ايه ؟

للرفع

حكاية تدخل المرور بعربيتك دي على حسب المرور لو كان بيسمح بكدا بس مظنش ينفع عشان بقو بيشدوا الايام دي تاني
و حكاية تدخل بالعربية دي كانت بتبقى في وحدة المرور اللي مش بيكون موجود فيها عربية

تغيير النمر دي تنفع و كل حاجة بس لو وقفت في لجنة و حب يغلس عليك هيغلس و يعمللك طمس لوحات

السلام عليكم

1- شهادات طبية باطنة و نظر بس لما تروح تطلع الباطنه والنظر خد معاك 2 صور علشان بيرفقهم مع الشهادات
2- فصيلة الدم لو عارف فصيله دمك ومتاكد منها اكتبها فى البينات اللى حتملاها لو مش عارفها حلل لانك حتاحتجاها وعلى ما اعتقد بردو عايزين صوره شخصيه علشان فصيله الدم والله اعلم يعنى اعمل حسابك
3- عدد 4 صور شخصية حديثه
4- ملف يشترى من داخل المرور
5- صوره البطاقه الشخصيه
6- ما يثبت انك طالب يعنى هات شهادت ابتدائى او اعدادى او ثانوى او اى شهاده تثبت انك متعلم
7- والباقى هما حيقلولك تجيبه من هناك يعنى لما تروح مش حتطلع بره كل حاجه زياده جوه

تغيير اللوحات عادي بس اي لجنه واقف فيها امين شرطه هيوقفك لان اول حاجه بيبص عليها اللوحات

ممكن تعمل ملاكي 12345 غربيه عادي بس لوحات بيضه والكتابه سوده والخط كبير

وممكن يرخم عليك برضه

بس خد بالك ان طمس اللوحات بتاخد عليه وقف للرخصه لمدة 6 شهور :))))

يانهار اسود 6 شهور ؟؟ لا بلاها طمس لوحات بس على فكرة انا عاوز اعملها فى اللوحات الخلفية بس مش الامامية كمان معتقدش الظابط هيلمح الخلفية غير لما امشى من الكمين


---

ياريت معلومات مؤكدة عن استخراج الرخصة

الاستاذ
monkmonkmonk


الف شكر حضرتك عملت الى عليك وزيادة والله بس واضح ان فى حجات كتير حضرتك مش متأكد منها وانا والله الايام دى بمر بوعكات صحية مش وعكة واحدة والحمد لله على كل حاجة ونفسى بصراحة المكان الى اروحه مرجعلوش تانى عشان فى حاجة ناقصة

فياريت من حضراتكم تقولوا لى المطلوب كاملاً بالظبط وابدء مشايرى فين يعنى اول حاجة هعملها هروح المرور ولا هطلع الاول اجيب الكشف بتاع الباطنة ولا ايه ترتيب الحجات بالظبط؟

مشكورين مقدماً

بص يا غالي لاني لسه مطلع الرخصة من 10 ايام فتقريبا فاكر

1-صورة البطاقة+4صور شخصية
2-شهادتين باطنة ونظر في صورتك ومختومة من الدكتور وامضاءه ورقمه في نقابة الاطباء والختم يكون علي الصور واخر الشهادة جنب توقيع الدكتور
3-اي شهادة تعليم عندك وياريت تكون اصل وصورة علشان يطلع علي الاصل وياخد الصورة
4-ملف في اوراق وده كله من داخل المرور انت بس قول انا عايز ملف رخصة قيادة خاصة

جمع الورق ده وروح المكتب اللي بيراجع الورق هياخده منك بعدالمراجعة ويقولك استنتي علشان امتحان الاشارات او العملي حسب المرور عندك

وان شاء الله تنجح ويقولك روح علشان تتصور وتستني تاخد الرخصة ان شاء الله

متحرمش منك ياباشا

يغلق للإنتهاء