من فضلك ابعد عن البروفة!

**azmeralda** · 19-04-2012 03:19 PM

ابعد عن البروفة من فضلك!

طبعا انا مقدرة جدا ان زوج يتحمل لف مع مراته على شرا اللبس وده شىء لطيف

واحيانا بشوفه فى العربية والدخان طالع من راسه من كتر الأنتظار

طب واللى بيدخل معاها المحل عشان يقول رأيه

هل يصح انه يقف فى وسط منطقة البروفات واللى بيبقى احيانا ستاير مش ابواب !!

مش ممكن المدام لما تقيس تروح بعيد شوية تورى له اللبس

المفروض اننا مجتمع شرقى محافظ فيه الحياء وغض البصر

واحيانا بقى لما المدام تتاخر يمل هو فيسلى نفسه بالفرجة على البنات اللى خارجة تبص فى المراية مثلا لأن البروفة ضيقة او كده

وبدل ما ياخد باله من العفريت الصغير اللى معاه قصدى الطفل البرىء اللى معاه!!! سايبه يجرى يفتح الأبواب والستاير على الناس

والغريبة الواد الصغير مش بينشن ابدا على بروفة مامته

ايه التهريج ده

والأسوأ البنت اللى فى المحل لما يكون فى زحمة تهجم فجأة عالبروفة وتفتحها قال يعنى بتستعجل اللى جوه!!!!

معتقدش ان حل المشكلة نقلد السعودية ونشترى من غير قياس لأن التعامل هنا بدون ذوق ولا ضمير

يعنى مرة اشترينا بلوذة وطلعت شايطة من التخزين وفيها قطع دوبان ورغم ان البنت اعترفت انها كانت عرفة العيب رفض صاحب المحل يرجعها ولازم تشتروا بدلها ومكانش فى حاجة ينفع تتشرى

كمان المقاسات بتختلف من تركى لصينى لمصرى
واحيانا شكل اللبس يبقى حلو وفى اللبس يبقى وحش

انا بحاول انزل فى عز الحر اوقات تكون المحلات فاضية

لكن شيفة ان من الذوق والأخلاق برضه ان الرجال تبعد تماما عن منطقة البروفات ومشفتش غير محل واحد كاتب يافطة بكده ___________ولا ايه؟؟

**Screenplays** · 19-04-2012 03:24 PM

الواحد بيتخنق من شرا الهدوم لنفسه هينزل مع مراته ؟ انا بنزل علي محل واحد صاحبي و اشتري اللي موجود و خلاص هي ناقصه تضيع وقت

**M.Elgergawy** · 19-04-2012 03:36 PM

انا لما بكون مع المدام وهي بشتري ملابس بسيبها تدخل تقيس في البروفة وانا بكون بعيد جدا وبعد كدا تطلعلي توريني اللبس وفعلا الاسبوع اللى فات كنا في محل في شبرا ولقيت اليافطة دي بس الفرق اني معايا 3 عفاريت صغيرين هههههههه مش واحد

**osama.m** · 19-04-2012 03:41 PM

عندنا محلات كتير مينفعش الرجالة تقف قدام بروفة الحريم والعكس بس معظمهم محلات كبيرة

**azmeralda** · 19-04-2012 03:45 PM

الملاحظة دى انا شفتها فى المنصورة والقاهرة والأسكندرية

يعنى الموضوع منتشر

فقلت الفت الأنتباه بقى: )

**azmeralda** · 19-04-2012 03:46 PM

طب يا استاذ محمد مبتسيبش العفاريت الحلوين مع مامتك او حماتك ليه حتى يبقى اسهل ؟ :)

**أبو صلاح** · 19-04-2012 04:18 PM

معتقدش ان حل المشكلة نقلد السعودية ونشترى من غير قياس لأن التعامل هنا بدون ذوق ولا ضمير

حبيت بس اعلق على الجزء ده

في المولات بيعملوا حاجة جميلة جدااا

في كل منطقة في مكان للقياس خاص بالحريم ليه مدخل خاص ومن جوه مجموعة غرف
حضرتك بتاخدي اللي انتي عايزاه من المحل وتروحي تقيسي براحتك وترجعي تاني
هي عيبها لو مرافق ليكي الزوج ما يقدرش يشوفك بس هي فكرة حلوة عجبتني جدا