تعالى اقولك تعمل ايه لو ... رميت على حد !!

**hosamsief** · 19-04-2012 04:30 PM

ازيكم ... عاملين ايه ....
ده موقف طبيعى جدا .. بيحصل لكل الناس ... للى محترف سواقه و اللى لسه يعنى مش اوي ... و حسب الحاله ... ممكن تكون رايح شغلك مستعجل الصبح او لسه نايم او بتعلب فى الكاسيت او بتولع سيجارة و غصب عنك ترمى على حد ... و يا سلام بقى لو كنت قافل الشباك جنبك ... لازم تنزل الازاز و تخرج دراعك منه و ترفعه لفوق قال يعنى بتعتذر له او تطلع تجرى بالعربية و تسيب اللى رميت عليه يضرب دماغه فى الاسفلت .... او يطلع يقعد على الكلاكس .. و كده كده هيجيبك فى اقرب اشارة ... و هيسمعك من المنقى يا خيار او فى ابسط الحالات هيبصلك بصه كانك يعنى كسرت عليه باب التواليت .......
و طبعا ... فى منهم اللى ممكن يسامح لو طلعتله دراعك ... و منهم اللى مش هتسلم منه حتى لو طلعتله رجليك الاتنين من الشباك ... و فى منهم سريع الطلقات ... اللى ممكن يسمعك كلمتين حلوين على الصبح .... و منهم اللى يطلع يجرى وراك علشان يشتمك او يبصلك بصه مالهاش لازمه ......
و يأما تفوت و تعدى .. او تنزل تطئش فيه .. طب و على ايه ده كله.. و ايه اللى يزنقك على كده ؟؟؟؟ ما الطيب احسن ...
و انت لو رميت على حد .. مبتعرفش اللى انت رميت عليه ده من انهى فصيله ... مستانس ... شرس .. سريع الانفعال .. عصبى .. كده يعنى ...
طب ايه اخرة الرغى ده كله ؟؟؟؟
تعالى بقى انا اقولك ... طريقه مالهاش حل .... انا جربتها مع كل الاصناف .... بعد ما اتهريت ... ... شتيمه بقى و خناقات و قله ادب .....
بكرر اهو تانى .... علشان لو حد فاكر انى بهذر ..... اعملها بس و هتدعيلى .... هو حل من اتنين
يأما الراجل اللى رميت عليه ده هيبعد عنك خالص ..... او يفطس على نفسه من الضحك .....و فى كلتا الحالتين انت كسبان كسبان ...

بص بقى يا سيدى ... بعد ما ترمى على حد على طول ... تبص فى المرايا عندك .... لو لاقيته جاى بيجرى وراك .... تجرى شوى
و متبصش عليه خالص و تفتح عينك على الاخر وتبص على طرطوفه مناخيرك و تدلدل لسانك لبرة و تهز دماغك كده زى المخرطه و تهز طارة الدريكسيون مع كل هزة من دماغك ... يعنى هزة خفيفه متحودش يعنى .... بس لازم تدلدل لسانك لبرة ... و اوعى تضحك ... لو ضحكت هتبقى بوظت الخطه .... و هتترن علقه سخنه ....انا بعمل الموضوع ده كتير .... و بينفع .... مرة رميت على واحد بسبب ميكروباص ... و الواحد ده كان ماشى على مهله ... و شكله خايف .. المهم ..طار ورايا ... و معاة عربية 120 سلندر ... كانى مثلا رزعته بالافا و جريت .... المهم لما جه جنبى .... و عمال يشوح و يبرطم ... و انا مش فاضى اتخانق .. فقولت هو ده الحل .... قمت عامل كده ... لاقيت الراجل عمال يكرع من كتر الضحك و يعملى باي باى و شويه شويه هيعزمنى على الغدا .. و مرة عملتها مع واحده ...... ريلت من كتر الضحك لدرجه انها ركنت على جنب لغايه ما خلصت ضحك و كملت .....
و مرة عملتها مع راجل وقور محترم ... سابلى الكوبرى كله و نزل من تحت الكوبرى ..... من غير شتيمه او زعيق او تشويح ....

كل واحد بقى منكم يعمل الموضوع ده و ييجى يحكيلى حصله ايه ......

**Screenplays** · 19-04-2012 04:47 PM

يعني اعمل مجنون من الاخر ؟

**dolly13** · 19-04-2012 04:57 PM

ههههههههههههههههههههه
انا متخيلة شكل حد بيعمل كدة اكيد هافطس من الضحك

**mohamed_e36** · 19-04-2012 05:11 PM

بجد تخيلت المنظر وفطست من الضحك ههههههههههههههه
بس انا عندي طريقه تانيه انك تكشر اوييييييييييييي وتخليك كانك متسربع وفي مصيبه وراك وبرضو متبصش ناحيه اللي انته رميت عليه
ساعات بتنفع الحركه دي

**أبو صلاح** · 19-04-2012 06:27 PM

يا عم والله انت مصيبة

انا عمال اتخيل الموقف ومش قادر امسك نفسي من الضحك

وقاعد لوحدي وحاولت اعمل اللي انت بتقول عليه معرفتش من الضحك

**ahmad--ezzat** · 19-04-2012 06:35 PM

اههه يه الهبل ده يعم الحج...لو رميت عليه وانا اللي غلطان هعتذرله مقبلش الاعتذار ف ستين داهيه.. . بس ايه 120 سليندر دي

**OMAR61995** · 19-04-2012 06:36 PM

أو تعمل أنك متوتر و معاكش فرامل
أو الدريكسيون مش بيوجه العربية
و تقول ااااااا شويه مؤثرات كده
و لو وقف جنبك فى الإشارة تقول له الحمد لله انكتبلى عمر جديد