السلام عليكم
انا من اسكندرية وعايزه اروح سيتي ستارز اللي في مدينة نصر من غير مادخل القاهرة (المحور - الدائري)
فامشي بالعربية ازاي من بعد البوابات بتاعه القاهرة عند داندي مول ؟؟
وكمان عايزه اعرف اروح ازاي من سيتي ستارز الي مدينة الرحاب
وشكرا جزيلا
عرض للطباعة
السلام عليكم
انا من اسكندرية وعايزه اروح سيتي ستارز اللي في مدينة نصر من غير مادخل القاهرة (المحور - الدائري)
فامشي بالعربية ازاي من بعد البوابات بتاعه القاهرة عند داندي مول ؟؟
وكمان عايزه اعرف اروح ازاي من سيتي ستارز الي مدينة الرحاب
وشكرا جزيلا
بص ... انا من اسكندرية برضه و مش عارف طرق القاهرة اوي (جوه البلد تقريبا معرفش حاجة)
انا لما بعدي البوابات بمشي طوالي و اعدي المطلع بتاع المحور و تخش المطلع بتاع الدائري (حتلاقي يفط قبل المحور و قبل الدائري) و امشي عليه لحد ما الاقي نزلة مدينة نصر انزل منها و بعدين اسأل ...
مدينة الرحاب معرفش ازاي ...
شكرا جزيلاااااا
اولا: اهلاً بحضرتك فى القاهره
ثانيا : الطريق الى سيتى ستاز بمدنيه نصر
الوصفه هتبقا طويله شويه بس بعيده عند الدخول فى شوارع القاهره
حضرتك بعد ماتعدى البوابات هتكملى فى الطريق لحد حضرتك متلاقى كوبرى المحور هتعدى حضرت من تحتيه وتخلى حضرتك فى اليمين وهتكملى لغايه متلاقى يافطه مكتوب عليها
(اتجاه المعادى / القاهره الجديده)
تطلعى من هذا المطلع وتكملى فيه وتخلى حضرتك فى اليمين وهتلاقى فتحه اولى
( مكتوب عليها اتجاه فيصل والهرم) عديها وهدى على الاخر لان فتحه المعادى بعدها على طول بكام متر يعلوها كوبرى محور المريوطيه هتطلعيها حضرتك
( دا محور المريوطيه)
خليكى مع الطريق على طول لغايه ميظهر لحضرتك النيل من اسفل الكوبرى سياتك هتكملى فى الطريق دون توقف الى ان تنزلى نفق القاهره الجديده الاول والثانى وبعد حضرتك ماتطلعى من الثانى لاحظى اليفط اللى مكتوبه على الطريق وعينك على الطريق وخليكى يمين اول متلاقى اتجاه السويس هدى من سرعتك اوى عشان هتنزلى نزله الماظه وتكملى مع النزله وتخليكى فى الطريق وهيقابلك كوبرى الجيش فى الكيلو 4.5 من طريق السويس إطلعيه وبعد ماتطلعيه فى نزولك خليكى فى الشمال عشان هتلفى من اول يوترن وهيكون فى مترو على شمالك بعد ماتلفى هتبقا دار المدفعيه على يمينك وكافى شوب وحلوانى روكت وهتبقا شركه ايدال على شمالك وبعد حضرتك ماتلفى شمال خليكى فى اليمين عشان هتاخدى اول يمين بعد دار المدفعيه
( دا طريق الاتوستراد) خليكى ماشيه فيه وهتعدى اول يوترن يقابلك من امام النادى الاهلى تلف من اليوترن اللى بعده عشان تدخلى اول مكرم عبيد يمين وهتعدي الناحيه التانيه من شارع مكرم عبيد هتلاقى سيتي ستارز يادوبك 100 متر من اول الشارع
انا اسف على الاطاله فى الوصفه بس انا حاولت ان حضرتلك متلفيش كتير فى الشوارع وسيتى ستار له دخلات كثيره واللى يعرفها اغلب اللى عايش فى القاهره
ولو حضرتك عايزه تروحى الرحاب بعد كده هتخرجى من سيتى ستار يمين اتجاه الاتوستراد وتكملى هيكون النادى الاهلى على يمينك متطلعيش الكوبرى اللى هيقابلك وخليكى فى اليمين ومع اول يمين هو دا طريق السويس الصحراوى مدينه الرحاب على بعد (10) دقائق من هذا الطريق وطبعا هيقابلك كوبرى الجيش تطلعيه وتخليكى فى الشمال عشان مطلع الكوبرى
اكرر اعتذارى عشان المشوار هيبقى طويل بالنسبه للغريب عن القاهره
بس الواحد يفضل يمشى كتير فى طريق مفتوح ووقت اقل احسن مايمشى مسافه قصيره فى وقت طويل
وانا تحت امر حضرتك
كل الود لحضرتك
شكراااااااااااااااااااااا ااااااااااااا جداااااااااااااااااااااا جدااااااااااااااااااااااا
:d
يا باشا حضرتك كده وصفت ليها سيتى سنتر وهى عايزة تروح سيتى ستارز
هي المسافة دي تقريبا كم كيلو متر ؟؟؟
وهل يوجد طريق اخر يدخلني علي الماظه علطول من ناحية المطار مش من طريق الاوتوستراد ومكرم عبيد ؟؟؟
وشكرا جزيلااااااااااااا
حضرتك مش محتاجة تدخلى الاوتوستراد او مكرم عبيد
نفس وصف الزميل الفاضل لكن لما تنزلى من كوبرى الجيش وتعدى من تحت كوبرى الكيلو ٤ ونص من طريق السويس وتمشى مع الترام وتاخدى تانى يوتيرن وليس اول يوتيرن، بعد ثانى يوتيرن ارجعى وامسكى اليمين واول ما تلاقى دار المدفعية خدى يمين قبليها على طول وامشى فى الشارع ده بتاع ٥٠٠ متر هاتلاقى سيتى ستارز على ايدك اليمين.
الرحاب بدل ما تنزلى من الدائرى اتجاه الماظة انزلى اتجاه السويس وكملى بتاع ٥ كيلو ها تلاقى مدخل الرحاب على ايديكى اليمين بعد المدرسة البريطانية.
او لو عايزة تروحى الرحاب بعد سيتى ستارز، خدى نفس الشارع اللى انت دخلتيه قبل دار المدفعية اللى دخلك على سيتى ستارز، خديه واخره خدى يمين ها تلاقى نفسك رايحة على الكيلو ٤،٥ كملى ها توصلى للدائرى عديه مش تطلعى عليه وكملى ٥ كيلو لحد مدخل الرحاب على ايدك اليمين.
الطريق من اول المحور لحد سيتى ستارز اتوقع ليه حوالى ٤٥ كيلو
شكرا للاخ هيما
تعديله بسيطه لسهولة الوصول لسيتى ستارز
وهيقابلك كوبرى الجيش فى الكيلو 4.5 من طريق السويس إطلعيه وبعد ماتطلعيه فى نزلك كملى علطول سيبى اول يوترن وكملى علطول هناخد تانى يوترن هتلاقى دار الاشارة على ناصيته شارع هندخل فى الشارع دا فيه سيتى ستارز