عيوب الزيرو الجديد...(عندك اى عيب لاحظتة أرجوك بلغنا بية هنا )

**Scent7104** · 10-07-2008 11:24 PM

انا لسه ما جبتش عربية زيرو... بس لاقيت الآتي مع ناس أصحابي:

اسكودا ِA5 full option, automatic
مع واحدة صحبتي موديل 2005، فجأة التكييف فصل و بقي شغال مروحة و لما راحت التوكيل قالولها انه عيب معروف في اسكودا A5 ان ال compressor بتاع التكييف بيبوظ و لازم يتغير بعد سنتين على الأكثر و ان حظها حلو انه قعد اكترمن كده!!! و غيروه في الضمان بس اضطرت تستنى اكتر من اسبوع.

التويوتا ياريس 1300 مانيوال base مش كاملة موديل 2008 مع واحدة صحبتي برده لاحظت فيها الآتي:
السحب بتاعها بيقل جدا" مع تشغيل التكييف (ده انا ماجربتهاش)
و التكييف بتاعها مش قوي ، انا نصحتها انها تروح للتوكيل عشان الياباني معروف تكييفه حلو قوي فممكن يكون في حاجة عندها في العربية!!!

الكيا سيراتو موديل 2006 full option, automatic أنا جربتها بنفسي من احد اقاربي و لاحظت الآتي:
العربية خفيفة قوي و مش ثابتة ( كنت مقلقة منها على سرعة 80كم)
الباور بتاعها كان تقيل قوي يعني عايزة اقول لكم ان الاوكتافيا A5 كان الدريكدسيون اخف بكتير.

الانسر الجديده 2008 Half sport: جميلة و كويسة بس الكنبة ورا ضيقة شوية و العربية حسيت انها خفيفة شوية عن الشكل القديم.

هيونداي اكسنت موديل 2006 فحدث و لا حرج لدرجة ان صاحبتها اضطرت تبيعها بعد 25000 كم عشان الأصوات الغريبة الي كانت بتسمعها من الموتور و العفشة و التوكيل ما عملهاش حاجة ... و النكتة كانت في الميكانيكي اللي قالها " أصل العربية هتبتدي تفتح بقها"!!!!

**sherif_84** · 11-07-2008 12:30 AM

نصر شاهين 2003 :
الشماسات كان نوعها ردىء ومش بتلزق عالسقف كانت بتبقى مايلة لتحت واتغيرت فالتوكيل
الكاسيت طبعا تعبااااان جدا وغيرته بكاسيت سونى اكسبلوود وطبعا السماعات برضو رديئة وغيرتها
جلدة الفتيس كانت مقطوعة وغيرتها بواحدة جديدة
الكاوتشات النسر طبعا غيرتها وجبت هانكوك كورى

دايو نوبيرا 2006 :
درج التابلوه بيقفل لما ترزعه جامد فى مكانه لكن لو قفلت ببطء مش هيقفل
اضاءة الكشافات الأمامية ضعيفة غير اضاءة الشاهين خالص اللى بتخلى الشارع ظهر

**ashraflotfy1** · 29-10-2008 01:11 PM

السيارة الهيونداى اكسيل كانت معى موديل 94 الكورى 1300 و المصرى 1500 الحقيقة مش زيرو لكن الاثنين عيبهم الرئيسى العفشة نص نص و الأدهى هو الصاج بتاعها أسوأ صاج فى العالم عدا ذلك فهى سيارة ممتازة فى استهلاك البنزين و الصيانة سهلة جدا جدا و المواتير 10/10 و الصوت هادئ و التكييف حلو أوى و قطع الغيار أرخص من ال128 و هى سيارة مناسبة لأسرة أو شاب أو فتاه و بيبان عليها الترويش جدا

كان معى أيضا دايو اسبيرو 1995 أوتوماتيك هايلة فى كل شئ عدا ان الفتيس ضعيف فى العزم بتاعه على السرعات المنخفضة و خاصة مع التكييف لكن أعتقد ان ده طبيعى للأوتوماتيك خاصة انها موديل 95 لكن عربية هايلة كقوة صاج ليس لها مثيل و ككماليات ممتازة و فخمة و ناعمة و واسعة جدا من الداخل يعيبها فقط سعر اعادة البيع مش حلو أوى لكن قطع الغيار هى النوبيرا عدا بعض الاختلافات البسيطة و القطع غيار المستعملة موجودة فى الحرفيين و الهرم

**Mystique** · 29-10-2008 02:34 PM

شكرا ليك يا Seatlover على الموضوع المفيد جدا ده..جعله الله في ميزان حسناتك

أنا مجربتش غير ال 206 وعيوبها فردية عشان أنا معرفش ناس كتير حواليا جايباها:

*الدركسيون والكلاكس تقال مووووووووووت..كأن الدركسيون مش باور خالص
*عداد ال Rpm وقع بعد حوالي 7 شهور استعمال و 5000 كم وقالولي ف التوكيل لازم تغيير لوحة العدادات ب 1500 وأنا طبعا نفضت
*ضمان العربية 6 شهور بس ومعظم مشاكلها بتظهر بعد كدة وصاحب العربية مسؤول عنها بعد كدة يا يصلح بره وزي ما تيجي..يا يروح التوكيل ويدفع المعلوم
*سحب العربية بيقل جدا بالتكييف
*صوت التكييف على 4 عالي جدا جدا ومزعج
*العربية على التاني بتكركب وبتسقف..لازم الأول يكون واخد حقه تالت ومتلت وال Rpm عالي وصوت العربية مزعج لولا ما تدي التاني ويستجيب معاك
*البابين اللي قدام بعد استعمال خمس سنين بيعملوا طقطقة لما يتفتحوا..بدون ما تكون العربية مخبوطة أو حاجة..صوت بيشتغل فترة وبيمشي فجأة ويظهر تاني وهكذا
*مشاكل عدم توفر قطع الغيار بالإضافة للتكنولوجيا المتقدمة اللي يكاد يكون محدش بيفهم فيها إلا التوكيل

أما اللانسر 2003،2008 الشكل القديم 1300cc
*العربية على السرعات العالية مش ثابتة قوي..والدركسيون بيبقى صعب التحكم فيه
*سحب العربية أقل من ال 206 بتاعتي..معرفش ده بسبب الفرق بين نظام سواقتي أنا وسواقة والدي ولا ايه بالظبط
*صاجها حسيته أخف من ال 206 وأقل خبطة بتعلم فيه وتسيب أثر واضح

دول اللي انا ركبتهم..
بس كنت عايزة أعرف لو حد معاه سيات ليون..بفكر جديا اشتريها ف الفترة القريبة دي..ومقلقة من ان الحلو اكيد لازم ما يكملش..فياترى عيوبها ايه عشان احدد هل من النوع اللي هتغاضى عنه ولا هتفرق معايا..ارجو ان حد يكتب لنا عنها تجربته معاها

شكرا

**gade2** · 29-10-2008 02:42 PM

انا معنديش راى فى الموضوع ده بس حبيت اشكرك على الفكره الجميله

**hishamnasr** · 30-10-2008 10:06 AM

انا معايا نيو اكسنت زيرو موديل 2007 بتكنولوجيا الدريكسويون الكهرباء والعيوب كالاتي :

1. العافشه نشفة جدا بطريقة غريبة .
2. الدريكسيون الكهرباء بعد فترة بتحس بتعويمة لو دست علي ارض غير مستوية او رملية

ده اكبر العيوب .

بالاضافة الي التوكيل فيه عيوب عدم الاهتمام بالعميل وعدم خبرة الصنايعية وتأخير السيارة بشكل رهيب لوكنت رايح تصلح عيب كانه عقاب

**limo** · 30-10-2008 11:29 AM

بسم الله الرحمن الرحيم
اولا رينو كليو 2003
1-الكنبه الخلفيه ضيقه لو الى اعد فى ادام طويل ومرجع الكرسى للخلف
2-صيانه مكلفه لو قارنت بصيانه الانوس او الفرنا
3-رفارف فبر ممكن تكسر لو الحادث جامد لو مش جامد هتاخد وتدى مع الخبطه
4-الكاتوش الى نازل مش اد كده
5-السلكه الى بتمسك درج التابلوه سريعه القطع
ثانيا دايو لانوس 99 اوتوماتيك
1-استهلاك بنزين عالى جدا داخل المدينه
2-فرامل وحشه جدا +انا كان معايا اوتوماتيك فكانت الفرامل ضايعه ولو مركب التيل الى مش اصلى لو التيل اصلى اداء الفرامل بيتحسن كتير
3-الانوس معروفه فى الاتوماتيك انه كثير المشاكل بس بعت العربيه وهيه عامله 95 الف كم مكانش الفتيس فيه مشاكل نهائى بس طبعا كاداء ضعف عن الاول
والمشترى الجديد للعربيه العربيه عامله معاه حوالى 103 الف حس بخشونه وهبده فى الغيارات وغير زيت وفلتر والعربيه مشيت تمام بعد كده
4-الثبات مكانش حلو على 130 كم بس تقريبا ده مش مقياس لان الكاوتش عندى مكانش اد كده وكان المفروض يتغير
العربيه واطيه جدا على الارض
غير كده العربيه كانت ممتازه
ثاثا :زاز سلافوتا 2005
من اسواء العربيات الى ركبتها فى حياتى
خامات تقفيل صفر
عفشه اتغيرت كلها على 20 الف
ثبات منيل بستين نيله على 120
احسن حاجه فيها الماتور والصاج فقط
قطع غيار نادره جدا موجوده عند محلات معينه وطبعا بتأمر عليك
وبعتها الحمد لله من سنه
رابعا متسوبيشى لانسر 1600 اوتوماتيك هاف سبورت 2008
-عفشه ناشفه شويه
-فرمل ضعبفه فى الاتوماتيك المانوال احسن كتير بس فى كل الاحوال احسن من الانوس مليون مره
-الفوانيس الخلفيه واطيه ولو حد ريح عليك ممكن تكسر بسهوله
-استهلاك بنزين انا مش عارف حلو ولا لأ
هوه من 160 فى اسواء الظروف وفى احسن الاحوال 200 كم فى الصفيحه
المتوسط بتاع كل مره تقريبا 180 فى الصفيحه جوه المدينه
بره 265 فى ال20 لتر بالتكيف ووالشنطه مليانه و6 ركاب
الاستهلاك بين مثيلاتها معقول مش كتير
بس انا محتاج عربيه هتكون استهلاكها احسن من كده ,عايز حاجه زى الكليو تعمل 400 فى ال30 جوه البلد (علشان كده بفكر ابيعها او اجيب عربيه صغيره للمشاوير الى جوه البلد )
صوت الكاوتس مسموع وانت داخل الكابينه بس مش مزعج نهائى حتى على السرعات العاليه
-الانشار الرهيب (الموضوع ده بيتهم بيه جدا راغبى التميز بما انى مش منهم اوى فالموضوع مش فارق معايا لان الانتشار برضو ليه مميزات زى سهوله الصيانه وكثره عرض المشاكل بتخلى الميكانيكى عنده عنده جامده (بيكون عارف اقصر الطرق لحل المشكله )+طبها توافر قطع الغيار
-تصميم قديم شويه مع سعر مبالغ فيه
خامسا :هيونداى اكسنت 2001 1300
ده عربيك واحد صاحبى و تقريبا عارف فيها كل حاجه
تقفيل وحش جدا بس قول وقتها عربيه كانت ب28 الف فاضيه كان سعر خيالى
التابلوه بيبوظ من الشمس
السحب ضعيف الى حد ما
العفشه اخرها 70 الف كم
سادسا : كيا سيفيا 1999 اوتوماتيك بتاعت واحد صاحبى
نفس عيوب الانوس
استهلاك بنزين عالى
فرمل ضعيفه
بالنسبه للاتوماتيك معروف انه كثير المشاكل بالنسبه للعربيه ديه عامله 131 الف كم
الفتيس مفهوش مشاكل بس مش زى الاول نهائى ابتدى يتعب
التابوله ضعيف جدا والشمس بتبوظه
ا

**ashraflotfy1** · 01-11-2008 10:02 AM

المشاركة الأصلية كتبت بواسطة tutankhamoun

السيارة بروتون جيــــــــن 2
ظهر في بعض السيارات عيوب تقفيل مثل
-- زجاج كهربائي معلق ( يتم حل المشكلة في التوكيل )
-- زر التحكم في اضاءة الصالون يعلق ( يتم حلها في التوكيل )
-- كاوتش الباب مش ملصوق و ساعات بيخرج ( الأبواب الخلفية ) و هذه ليست مشكلة و يتم إلصاقه في التوكيل
و هذه كانت العيوب العامة للسيارة

لا يوجد بها أي عيوب ميكانيكة أو خطيرة توقف عملها على الاطلاق و معظم من أشتكى منها أشتكى من عيوب تقفيل

الغالبية العظمى لم يظهر معهم هذه العيوب
و أنا شخصيا لم يظهر معي أي عيوب إطلاقا
و شكرا لكم
و شكرا يا أستاذ عمرو على هذا الموضوع المفيد
جزاك الله خيرا

ملحوظة
التوكيل مش ممتاز ............. و يعتبر بين الجيد و السئ أو جيد فقط و بالعافية

السلام عليكم
أنا عندى البروتون الجين 2 هى جميلة لكن:
1- عندى مشكلة فى الريموت بتاع الانذار و السنتر بيعلق كتير و رحت التوكيل مرتين يقوم مغير البطارية بتاعة الريموت و خلاص و هى 3 أيام و يعود كل شئ كما كان و الحقيقة زهقت منه لكن مش عيب جطير.
2- أيضا تصميم الكلاكس غبى لأن لازم تضغط على جامد لكى يعمل و هذا غير عملى فى الطوارئ و لما ذهبت للتوكيل قالوا ان التصميم كدة.
3- الحقيقة أسعار التوكيل عالية بعض الشئ لأن مش معقول أدفع 118 جنيه مصاريف صيانة ال 5000 كيلو لتغيير الزيت و الفلتر و تربيط العفشة طبعا ده غير سعر الزيت و الفلتر و حاسبونى على عبوة مياه المساحات ب 25 جنيه.
4-صوت الموتور عالى شويتين و العفشة ناشفة شوية لكن يمكن علشان رياضية أو هذا ما يقال.
5- استهلاك البنزين عالى عالى يعنى من غير التكييف داخل البلد من غير قرص على الموتور نهائيا مش أكتر من 190 الى 210 كيلومتر فى الصفيحة. فى الاجمال هى سيارة جميلة لكن هى دى العيوب التى لاحظتها

**kloda** · 12-04-2009 02:06 AM

انا معايا بروتون جين 2 2009 اوتوماتيك عاملة 2000 كيلو العيوب هي عيوب تقفيل بس و صوت تزييق جاي من قدام و قالولي في الصيانة ان الفبر لازم يتفك من قدام و يتربط فقلتلهم بلاش لان الصوت دة اصلا مش بسمعة الا و انا قافل الزجاج و مش مشغل كاسيت و ماشي براحة و رامي ودن كمان العافشة ناشفة و دة عشان العفشة ابور و دة بيدي ثبات اكبر و لما حطيت نيتروجين في الكاوتش العفشة فعلا بقت ناعمة اكثر من الاول بكثير غير كدة عربية تحفة بجد شكل و اداء التوكيل زي ماقال الاستاذ توت جيد بالعافية و صوت الماتور قل اويييييييييييي في موديل 2009 معرفش الاخ اشرف عندة موديل كام
نوبيرا 2008 اوتوماتيك عربية ناعمة اوي و بتسحب حلو بس الدركسيون كبير و لفتو واسعة شوية و الهاند بريك مالهاش لازمة من ساعة ما جبتها و قالولي كدة انها ضعيفة
تجميعا رغم دة مع ان صوت موتورها عالي فلما بدوس بنزين بتعمل صوت اكنها طايرة و هي لسة اصلا بتتحرك
اخويا معاة لانسر سوبر اكشن 2008 اوتوماتيك و دي بجد تحفة موووت صاجها مش ناشف بس اجمد صاج و ثبات فيهم الجين
اة صحيح نسيت الجين دهانها بيلمع اوي و دي ميزة لكن عيبة انة خفيف اوي
و بجد الموضوع جامد اويييييييييييييييييييي
الف الف شكر لصاحب الموضوع SEATLOVER