الموضوع: ما هو اكثر موقف مضحك وهو سايق او له علاقه بالسيارات

أولا بشكر صاحب الموضوع وكل من شارك بموقف ضحكنا من قلبنا
نخش في المفيد
من حوالي 7 سنين كان ابن خالتي معاه عربية هيونداي اكسل هاتش باك عجيبة كان لسة شاريه خضراء من برة وكرسيها حمراء (تقولش بطيخة) المهم طقت في دماغه نطلع بورسعيد نقضي يوم ونرجع اتصل بيا وبـ2 صحابنا يجوا معانا
المهم ظأكد عليا كذا مرة أجيب معايا كماشة ؟؟؟؟؟؟؟؟؟؟؟؟ خير يابني قالي هنحتاجها
توكلنا علي الله صلينا الفجر وخدنا الصحراوي وكله تمام لحد ما عدينا البوابات بتاعة الاسماعلية ودفعنا الرسوم وهوب الكاوتش ضرب وده فطس من الضحك
في ايه يابني
أصلي ماعييش كوريك قولناله مش مشكله هنستلف من أي عربية معدية كمل ضحك خير تاني قال أصل الاستبن نايم إنفجرنا من الضحك قولتله وعمال تنبه عليا هات كماشة هات كماشة أنا افتكرت دي اللي نقصاك في العدة هو انت كنت عايز الكماشة في ايه قالي عشان أدور العربية لأن مفتاح الكونتاكت مكسور في الكونتاكت وبيمسك طرفه بالكماشة ويدور (أسهل )لأن صوابعه بتوحعه هههههههههههه
المهم هنعمل ايه وقفنا شورنا لعربية خدنا الكوريك رفعنا العربية على حجر وخدنا الكاوتش وادينا الكوريك لصاحبه وركب معاه وخد واحد من صاحبنا معاه لأقرب واحد بتاع كاوتش ونستني شوية شويتين ساعة ساعة وربع لأيناه جاي من ناحيتنا عكس ما راح
خير يابني قال قعدت ماشي مع الراجل مفيش بتاع كاوتش قابلنا عديت الناحية التانية رجعت قبل البوابات لقيت واحد نفخ الكاوتش في 5 دقايق وشاورت لعربية بعدها علي طول أمال أتأخرت ليه قال أصل الراجل اللي ركبت معاه قالي انه مبيدفعش الرسوم وإنه عارف مدق في الصحراء بيخرم منه وده بياخد وقت
طب مدفعتلوش انت ليه فلوس الرسوم رد وقال يعني افوت على نفسي فرصة أعرف المدق هههههههههههههههههههههههه

انا مرة ايام ما كنت فى الاسكندرية فى اخر سنة 2007 ومروح من الشغل بالعربية المهم الاشارة قفلت ووقفنا وكان جمبى تويوتا ياريس زيرو بالورق الابيض ملزوق عليها والنمر التجارية المهم جت عربية كارو بحمار وعاوز يعدى بين الياريس والرصيف وهووووووووووووب قام جايب الجمب كله بتاع الياريس طبعا انا كنت هعيط امال صاحب العربية اللى لسه ماركبتش نمر يعمل ايه نزل متعصب وبيقوله ايه اللى انت عملته ده ياتيتتتتتتتتتتتتتت قاله والله ما انا ده الحمار ..طيب اعمل ايه دلوقتى يرد بتاع الكار نفس الرد والله ما انا ده الحمار والراجل هيتجنن مش عارف ياخد لا حق ولا باطل قام رايح فاكك الحمار من الكار وشده بالحبل وربطه فى الياريس وبتاع الكار قاله بتعمل ايه قاله مالكش دعوة انت ماعملتش حاجة انا هروح القسم اخد حقى من الحمار وقام واخد الحمار وماشى وساب الراجل بالكار فى الشارع.
وفى مرة تانية بعديها بشهر فى الاسكندرية برضك وخارج من الشغل ولسه بطلع بالعربية المنطقة بتبقى مقفولة عربيات ركنه علشان منطقة بنوك فى طلعت حرب المهم بتبقى عربيات راكنة صف يمين وصف شمال والصف الوسطانى يعدى العربية بالعافية وفى اخر الصف الوسطانى عربية كار بالعرض واقف يبيع فاكهة المهم روحت لحد عنده وبكلكس علشان اطلع قام طالع فتح الطريق وانا جاى اطلع قام راجع بظهره على الكبوت مضى عليه انا نزلت اقوله ايه اللى انت عملته ده قالى والله ياباشا ده الحمار اللى رجع ويقوم رايح يضرب الحمار بالقلم ويقوله كده ياغبى اقوله ياعم كلمنى انا انت بتكلم الحمار يروح يضربه تانى ويقوله كده ياغبى افتكرت بقى الراجل بتاع الياريس وعرفت ان بتوع الكارو بيستعبطوا وخلاص قمت ماشى وامرى لله ولحد النهاردة كل ما حد يسالنى ايه الخط اللى فى الكبوت ده قاقولهم ده الحمار مضالى.

انا هاحكيلكم موقف مضحك تانى ... مره كنا فى فرح اخت واحد صاحبنا فى الجامعه .... الفرح كان فى بلد ارياف قوى .... طبعا كلنا رايحين من الصبح عشا نوجب مع زميلنا .... وشربنا شاى وبيبسى لما اتهرينا ... طبعا كلنا عايزين ندخل الحمام ... طب داحنا فى بيت اهل العريس ... هوبا ده حمام بلدى ومافيش ميه والله لا يوريك الوضع عامل ازاى ... قولتلهم اصبروا يا جدعان احنا 5 دقايق ونمشى ونبقى نقف فى الطريق نفك زنقتنا ... المهم استأذنا ومشينا فعلا ... طبعا طريق طينى وغيطان وزراعات ... والدنيا كحل ... واحد اقترح نقف فى الحته الضلمه دى نفك زنقتنا عشان مانتفضحش لو طلعنا على الاسفلت ... وقد كان ... نزلنا كلنا واترصينا جمب بعض فى مواجهة سور بيت على يمين الطريق ... وفجأه واحنا مندمجين ونلاقى السور بيتفتح ... وطالع منه راجل بمقشه بيقولنا انتوا بتعملوا ايه ياولاد .... طبعا هو ماكملش شتيمه لانه اول مافتح الباب اتغرق ميه ... ماهو اتضحلنا فى الاخر انه مش سور ... داحنا كنا واقفين قدام باب بيت الراجل

احنا طلعنا نجرى وقولنا يافكيك وواحد مننا كان بيجرى ويقع يجرى ويقع ... اصله كان فاتح البنطلون زياده حبتين والبنطلون عمال بيقع منه هههههههههههههههههه