عاوز أشتكى مستشفى..ومش عارف إزاى؟!!!!!

الموضوع بإختصار انى عملت فحص طبى فى مركز طبى فى الدقى..وهو مركز فاشل بكل المقاييس..ومن ساعه ما دخلت برجللى المكان وهما بيشتغلونى....وعاوز أعمل شكوى ومش عارف أقدمها فين؟؟

التفاصيل...

يوم 9 / 4 تقدمت للفحص الطبى الشامل (زى قومسيون كده) بمركز طبى فى المهندسين....

عملت أشعه على الصدر والبطن ورمد وباطنه ورمد وصوره دم كامله وتحليل بول....

المفترض النتيجه تطلع بعدها بيومين او تلاته.....

يوم 14/4 إتصلت أسأل على نتيجه الفحص....كان الرد أن الإستشارى طالب رسم قلب...!!!!!

توجهت فى نفس اليوم للمركز لأخذ جواب تحويل لمستشفى تانى أعمل فيه رسم قلب....وفوجئت بأنهم إشتروا جهاز جديد وممكن أعمله عندهم بس بعد ما أدفع 200 جنيه بخلاف ال 350 اللى إتدفعوا رسوم الفحص....وطبعا وافقت زى ال...بتاع..!!!

وبقدره قادر إتحول رسم القلب ل إيكو على القلب......طب إيكو ..من غير رسم قلب؟!!!....يمكن ....!!!

الدكتوره اللى بتعمل الإيكو مش فاهمه حاجه فى الجهاز ومش عارفه تظبطه...فى نسبه تشويش عاليه جدا وهيا أول يوم شغل ليها فى المركز وحتى العياده مؤقته ..مش بتاعت الجهاز ده....!!!

سألتها ..هو الإستشارى ليه طلب إيكو على القلب؟!!!خير...فى حاجه؟

قالتللى اصل انت عندك ضغط...وعامللك تضخم فى القلب!!

طب إزاى عرف إن عندى ضغط وانا أساسا محدش قاسلى الضغط؟!!كمان أنا مقابلتش سعاده الدكتور الإستشارى اللى مبيظهرش على رجاله...!!!!

مردتش لكن قالتللى انا هكتب فى التقرير إنك سليم لأنى مش شايفه حاجه تستاهل....!!

طب يا ستى ..شكرا.........!

النتيجه إمتى يا جدعان؟ يوم الثلاثاء.....يعنى على يوم 18/4

يوم 18 /4 إتصلت بيهم.....فى أيه يا إخوانا ..فين النتيجه؟؟؟؟!!!!!!!

اسمك ايه؟

أشرف فتحى..

تعالى يوم الأحد عشان تعييد الإيكو.......

نعم؟؟!!!!!!!!يا تيييييييييييييييييييييييي ييييييييييييييييييييييييي يييييييييت......

المهم قللى ما معناه اخبط رأسك فى الحيط....كفايه ان انت هتعيد من غير ما تدفع 200 جنيه تانى...

جبت إسم مدير المركز واتصلت تانى يوم 19/4 ......شرحتلله اللى حصل ..الراجل كان محترم ورد عليا فى كلمتين....

إتفضل النهارده......!!!زى ما أكون بشحت منه مش دافع 500 جنيه..وبقالى 20 يوم

خدت ديلى فى سنانى وجرى على الدقى عشان البهوات بيقفلوا الساعه 4

عملت إعاده على الإيكو والمره دى كان دكتور مش دكتوره وحسيت من طريقته فى الكشف انه فاهم مش زى الكتوره التانيه...!!

النتيجه امتى يا ولاد ال تيييييييييييييييييييييييي ييييييييييت.

يوم الأحد إن شاء الله لما الإستشارى يشرف....

يعنى يوم 22/4!!!!!!

من يوم 9 ليوم 22؟؟؟؟!!!!!!

معلش!!

يوم الأحد 22 كان رد البهوات ان الإستشارى مجاش وهييجى يوم الثلاثاء....

لغايه كده ومرارتى اتفقعت...وبحاول من امبارح الاقى جهه أشتكيهم فيها....

ملاقيتش غير حمايه المستهللك اللى فهمونى كده بالذوق..حاول تحلها ودى ولو منفعش هات فاتوره عشان ينظر فى الشكوى...وانا ما اخدتش فاتوره...وحسبى الله ونعم الوكيل!!

طب فى شكاوى لوزاره الصحه؟؟

مفيش....
طب حاجه الواحد يخوفهم بيها؟

...مفيش!!!

..ومحدش اعرفه أفادنى فى الموضوع ده.....!!!

لو حد عنده طريقه يبلغنى بيها....!!!

انا في البداية لمن جيت اقرى موضوعك قلت ياه هقرى كل ده بس لمن رجعت قريتو لقيتو موضوع جميل وفعلاً يستحق النقاش. واسلوبك رائع كمان


فعلاً احنا عندنا مشكلة في مصر. في الطب ، كان زمان بيجولنا الناس من كل العالم علشان يتعالجو. ، وتعتبر سياحة علاجية النهاردة مع الاسف الناس اغلبها اجمعت اننا عندنا دكترة حميررر بما فيهم المواطنون المصريين ذات انفسهم ، مع احترامي. للدكترة المحترمين الاجلاء انا بتكلم عن فئة خدو الشهادة لمجرد انهم زكرو فقط وجابو مجموع

وبقو الناس يتجهو للعلاج في الخارج لانهم عارفين ان الدكترة في مصر عليهم العوض ومنو العوض ، بما فيهم. دكاترة التجميل في ابسط من عمليات التجميل تيجي الواحده تعمل عملية تجميل تلاقي الدكتور بوظلها حاجة تانيه وشوها خالص

مش عاوز اقلك دكتور غرمني ٢٦.٠٠٠ جنيه ودكتور مشهور جداً في اكتوبر لعلاج السرطان ومشهور قاعد بيعالج الحج انو عندو السرطان في الكبد وطلع السرطان من حته تانيه خالص والدوى الغالي ده الي هدني وهد صحة الحج مش بيعالج ده بيضر وكان منعنا اننا نعملو تحليل انسجة

والكشف بتاعو ب خمسمية جنيه وخمس مية جنية تحاليل ويقعدنا ويزنبنا من الصبح لغايت بالليل في المستشفى بتاعتو. وفي النهايه هما كلمتين يقلهوملك وممنوع تفتح بقك معاه والمشكلة راجل عجوووووووووووز. ده بره المفروض يطلعوه على المعاش ويسحبو رخصة الطب منو واحنا عندنا هنا عملينو قيمة على الفاضي

والي صعب عليا ان ناس بتجيلو من الارياف والاقاليم ومن اخر الدنيا ، علشان يمص دمهم وبقيت اسئل نفسي ياعيني والناس الغلابة دي بيدفعو تمن الكشف ازاي !!!!


فعلاً الطب في مصر مستواه قل جداً والدكتور بقى يغلط عادي مفيش لاحسيب ولا رقيب ليه. ، وحتى لو وجد حسيب او رقيب مش هتقدر تثبت حاجة عليه لانهم مش هيدوووك فاتورة يعني انتا اساساً مدخلتش العياده ولا المستشفى بتاعتو ولا هو شافك او يعرفك قبل كده
وعليه العوض ومنو العوض في الناس الي بتلعب بصحة البشر

أشكرك لإهتمامك وردك.....!

ربنا يشفيك ويعافيك ويعافى الحاج...!!

يعنى خلاص كده...مقداميش غير إنى أخبط دماغى فى الحيط....؟!!

شوف ... ابسط شىْ انك تقولنا اسم المركز دة علشان محدش يلجاء لة.

حسك بتكلم على بدراوى الى فى شارع دمشق و ربنا يخلف ظنى

مفتكرش إن ممكن حد يدخله او ياخد باله منه وانا لولا ان كشفى هناك كان بتحويل...يعنى رغما عنى ...عمرى ما كنت هدخله برضو...عموما المركز أسمه ستار ميديكال للفحص الطبى الشامل...شارع عبد الله الكاتب..الدقى.....بجوار مستشفى الشبراويشى...

بص هو المستشفيات والعيدات في بلدنا بقت بيزنيس ، ومن ساعت مالدكاترة جربو المية بتاعت مارينا وداقو حلاوة شالهيات الساحل الشمالي ... والطب حلتوات اتبهدلت في بلدنا والاسعار ولعت بتاعت الكشف والروزيتا ... يا أخي كان زمان الدكتور ده كان اسمو حكيم ... شايف الجمال في الاسم حكيم .

وكان يفهم في كل حاجة تقلو وسطي تقلو رجلي تقلو بطني هو فاهم ودارس النهردة بقت تخصصات وفتفتوو الطب كده لدرجة مبقاش حد فاهم حاجة ...

مره حسيت بالم في بطني حسيت انو فتء :
رحت المستشفى طوارء ... دفعوني 35 جنيه كشف (حار ونار في جتتهم)
دخلت عند دكتور الطوارء بيسئلني عندك ايه ؟ يعني دكتور وبتسئل العيان عندي ايه فين دكاترة زمان يا اخي من نظرة وحده يعرف المريض عندو ايه قمت قلتلو ... فقام كشف عليا وقالي اه صحيح شكلك عندك فتء قلتلو شكلي حلوة شكلي دي .

المهم قالي انتا لازم تروح عند دكتور جراح قلتلوا امال انتا ايه ؟ هو حضرتك مش دكتور يا دكتور ههههههههههههههههههه

المهم ررحت دفعت 50 جنيه في الخزنة ورحت لدكتور جراح ... بص عليا وكشف وقالي اه انتا عندك فتء قلتلوا طيب اعمل ايه ؟ محتاجة عملية ولا علاج ؟ قالي معرفش لازم تروح عند دكتور جراح ههههههههه قلتلوا امال حضرتك ايه ؟؟؟؟؟؟ ومن جوايه بقول لنفسي يادي النيلة هو ده دكتور ولا بتاع كباب وكوفته ... ولا تمرجي وملبسينو بلطو وحاطط سماعه على ودنو كده عياقة ؟؟؟؟

قالي لا سعتك انا دكتور جراحة استشاري بس انتا لازم تروح لدكتور جراحة أخصائي ... وانا من جوايا هوووولع . وعاوز اصرخ كده من جوايا ، وعوز انط في كرشوو واخنقوا واقلوا طالما انتا مبتفهمش حاجة خدت خمسين جنيه بناءً على أأأأأأأأأأأأأأأأيه أستخسار ولا شايفني فلوسي كتيرة ... قلتلو طيب والكشف حضرتك ؟ لقيت مراتي بتسحبنيي كده من أيديا علشان عارفاني أني بكره الدكاترة وهيا دكتورة وهحرجها وسط زمايلها ... المهم طلعت وامري لله تاني بره عند الاستقبال بكام الكشف عند دكتور جراح استشاري قالي ب 60 جنيه ... رحت حاجز وبعد ما دخلتلو لقيتو راجل كبير كده وعترة وابن بلد وباين عليه خبيررر ... بص على بطني وكشف وقعد يخبط كده كده على بطني وقالي قوم البس انتا معندكش حاجة ههههههههههههههههههههههههه ه .

طيب وال 145 جنيه الي دفعتهم دول راحو فين ؟؟؟؟
طيب مدام انا معنديش حاجة مترجعولي تمن الكشف أعملو معروف ؟
بجد كان هيجيلي شلل ... بس الحمد الله بعد التأمين الصحي كمان ، الواحد بقى يطمن نوعاً ما أهو على الاقل (هبيش بيهبش من هبيش )

مع اني والله العظيم بحب اتعالج في مستشفيات طيبة او تبارك ، أو مستشفى القبطي ... على الاقل الدكترة فيها بيعالجو المريض بزمة وضميرررررررررررررررررر وبيحط ربنا قدام عينيه مش يحط تمن الكشف والروزيتا والعيادة عمله كام النهردة .