ناويين تشغلوا ولادكوا بإيه في الصيف؟

بس يا أحمد..

بطل يا علي..

بلاش ترخمي على أختك يا بسنت..

كفاية بأه جيمز ع الكمبيوتر يا ولاد..

خلاص بأه space toon اشتكت و MBC3 قفلت خلاص.. عينيكوا ياولاد..

مافيش لعب كورة في الشقة..

مش فاضي النهاردة أوديكوا النادي.

طبعا دي الحوارات اللي بتدور في كتير من البيوت.. أجازة و أطفال لازم تنشغل و زهق في زهق.. طيب ايه الحل؟ :g:

تعالوا يا آباء و يا أمهات تستفيدوا من تجارب بعض في شغل ولادكوا في أنشطة في الصيف.. انا عن نفسي هاشوف أصحابي بيشغلوا ولادهم في ايه و أقول لكوا على المنطقة اللي همه فيها و الأسعار و اللي شايف انه ده مناسب ولاده يشترك لهم فيه.. سواء نادي بسعر معقول.. مكتبة مفيدة فيها أنشطة.. مراكز تعليم كمبيوتر للأطفال.. رسم.. تلوين.. إبداع.. و القائمة طويلة بأنشطة كتير :)

عندكوا مثلا زدني زي كل سنة عاملة نشاط صيفي للأطفال من سن 6 لسن 16.. مع ان 16 دول ما بقوش أطفال خلاص :)

همه مقسمينهم تبع المراحل العمرية و كل مرحلة ليها برنامج.. طبعا معروف ان برنامج زدني للأطفال بينمي عند الأولاد مهارات الإبداع و القيادة - بس طبعا مش القيادة بتاعتنا اللي بنقود بيها العربيات - و ازاي يشغل مخه في كل حاجة و ازاي يقدر يقود فريق و يحسن التصرف في الأمور اللي ممكن تواجهه فجأة و روح المثابرة و الإصرار.. الخ.

عموما ده الويب سايت اللي فيه التفاصيل http://zedny.org/ar/Z4K_Summer08.asp و اللي عايز تفاصيل اكتر ممكن يتصل على 0114435111 او يوصل لحد مركز التعليم الملحق بمسجد رابعة العدوية في مدينة نصر الدور التالت و يسأل عن زدني، وهناك هيلاقي شباب صاعد واعد جامد بيرد على كل أسئلته.. و على فكرة الحجز بدأ بالفعل.

فيه كمان مكتبة في فيصل تقريبا أو الهرم، غير الكتب فيها أنشطة تانية زي الرسم و التلوين و اللعب و بتقبل سن صغير زي 5 سنين.. هاسأل على التفاصيل و أقول لكوا ان شاء الله.

الاشتراك فى جامع لتعليم وحفظ القرآن الكريم وكذلك أنشطة رياضية مثل السباحة

اعتقد ان الامر بهذا الشكل اعلان عن زدنى مش موضوع عام 000 وكنت افضل ان نقرأ ونسمع من الاخوة الامر بشكل عام ولايقتصر على موقع عمل واحد

مكتبة مبارك في الجيزة مكان جميل برده
و اللذيذ ان اولياء الامور هيلاقوا اللي يعجبهم هما كمان هناك
و امان اوي و فيها جنينة كمان جوا
و فيه اشتراك عائلي
بجد مكان جميل اوي

اقتباس:

---

المشاركة الأصلية كتبت بواسطة hn_kamal

الاشتراك فى جامع لتعليم وحفظ القرآن الكريم وكذلك أنشطة رياضية مثل السباحة

---

جزاك الله خيرا على الإفادة :)

يا ريت لو فيه حاجة جنبك بتقدم الأنشطة دي أو مسجد كبير تقول لنا هو فين و نظامه ايه.

اقتباس:

---

المشاركة الأصلية كتبت بواسطة محمد المشد

اعتقد ان الامر بهذا الشكل اعلان عن زدنى مش موضوع عام 000 وكنت افضل ان نقرأ ونسمع من الاخوة الامر بشكل عام ولايقتصر على موقع عمل واحد

---

الأخ محمد.. الصراحة انا احترت أرد عليك أقول لك ايه.. انما عموما إدارة المنتدى هي المعنية بإذا كان ده إعلان ام لا و ليهم مطلق الحرية انهم يلغوا المشاركة بتاعتي لو شافوا فيها أي مخالفة و لهم علي تقبل القرار أيا كان :)

ما قلتلناش.. بتشغل ولادك بإيه في الأجازة؟ :)

موضوعك جميل قوى يا علا بارك الله فيكى

أحسن نشاط يفيد الأولاد مع العلم إنى مش متجوز أساسا

أى جامع قريب من البيت يتعلموا فى قرآة وترتيل والإدغام والتفخيم فى القرآن والحفظ

أيضا وحضور دروس دينيه فى المساجد .أو الإشتراك فى نوادى رياضيه .أو الإشتراك

فى مركز تعليم الكمبيوتر والكتابه والصيانه .الإشتراك فى مركز تعليم لغات إنجليزى أو

لغه أخرى علشان يبقى ليهم مستقبل لو حبوا يشتغلوا والشغل طالب عده لغات .فى أنشطه كتيره جدا وأنا كتبت على أحسن الأنشطه اللى أقدر أفيدكم بيها .وشكرا تانى مره ليكى على الموضوع .

احسن مكان هوالمكتبات العامه

لو 12 ولا 13 سنة هخلية ينزل يشتغل ويحتك بالدنيا

ان شا لله يشتغل بياع في سوبر ماركت قريب من البيت

او يعمل مشروع من مصروفي يشتري سمك ويربية ويخلية

يتكاثر ويبيعة "الولدة" بعد كدة، نفس الفكرة عن العصافير

بس بتاخد وقت اطول. مش علشان هو ابن مش عارف مين

وساكن في حتة مش عارف مين فاربية ويطلع لي في الاخر

سوسو ولا توتو ويتفرم تحت عجلات قطر الحياة الغاشم.

الولاد لازم يتعلموا الاعتماد على النفس من الصغر والله هينفعهم جداً

الكلام دة لما يكبروا، هيبقى عندهم خبرة من احتكاكهم بالحياة.


اما الكمبيوتر والانترنت فكل الاطفال من سن 4 سنين بيبقوا عفاريت

في الكمبيوتر خلاص معادش الكمبيوتر من العلوم المبهمة.




مفيش مانع في فترات وقت الفراغ ان الولاد يتعلموا لغة اخرى غير الانجليزية

الماني ايطالي روسي الاطفال اللي اعمارهم صغيرة بيلقطوا اللغات بسرعة.

وطبعاً مش هنغفل الجانب الديني بس يكون عن طريق احد الوالدين -إن امكن-

وميكونش بصورة علوم بحتة يكون بطريقة غير مباشرة.

منذ أكثر من 18 عاما وأنا أعمل متطوعا بالأنشطة الصيفية للأطفال فى أحد المكتبات العامة وأحد الأندية الإجتماعية فى مدينتى المنيا واكتسبت العديد من الخبرات من خلال التعامل مع الأطفال وبمناسبة فتح موضوعك الشيق اسمحوا لى بتذكيركم ببعض خبراتى فى هذا المجال من خلال مشاركتى هذه
:hat::hat:

فعلا زدني فيها ناس كويسين جدا وأنا أعرف دكتور محمد عمر وهو راجل محترم جداً واللي هايتكلم معاه هايستفاد منه جدا جدا. بالاضافة لإنهم عندهم توجه ديني كويس وعندهم رسالة عايزين يوصلوها للمجتع يعني مش الفلوس هي الهدف
وده مش اعلان عن المركز أكتر ما هو نصيحة لاخوانا في المنتدى.

وقبل ما انسى شكرا لصاحب الموضوع لأن فعلاً الموضوع ده مهم جداً ومعظم الأباء بيفرحوا لما ولادهم يفضلوا قاعدين أمام الكارتون أو في النادي أو في الشارع مادام ما فيش مشاكل وبينسوا لإنهم واجب عليهم إنهم يربوا ولادهم صح
وللعلم التربية شئ صعب جداً بس ممتع خاصة لو الواحد احتسب ده عند ربنا


نسأل الله العلي العظيم بأسمائه الحسنى وصفاته العلى أن يربي لنا أبنائنا على رضاه وأن يجعلهم لنا قرة أعين

اقتباس:

---

المشاركة الأصلية كتبت بواسطة محمد المشد

اعتقد ان الامر بهذا الشكل اعلان عن زدنى مش موضوع عام 000 وكنت افضل ان نقرأ ونسمع من الاخوة الامر بشكل عام ولايقتصر على موقع عمل واحد

---

اسمحلى اختلف معاك لانى شايف ان علا فتحت الموضوع لكثير من الأفكار ،و فى نفس الوقت هى من طرفها قدمت احدى الأفكار التى قد تفيد تاركة مساحة لكل من يرغب فى تقديم فكرة أخرى،خاصة وان المركز المشار اليه مركز خيرى غير هادف للربح يقوم بتقديم خدمات اجتماعية لكل الفئات الاجتماعية والعمرية باسعار رمزية

اقتباس:

---

المشاركة الأصلية كتبت بواسطة OlaOsman

فيه كمان مكتبة في فيصل تقريبا أو الهرم، غير الكتب فيها أنشطة تانية زي الرسم و التلوين و اللعب و بتقبل سن صغير زي 5 سنين.. هاسأل على التفاصيل و أقول لكوا ان شاء الله.

---

المكتبة لا في فيصل و لا الهرم.. دي طلعت في شارع البحر الأعظم في الجيزة و اسمها مكتبة البحر الأعظم :)

طبعا احييكي علي علا علي اختيارك للموضوع الهام في هذا التوقيت المناسب
انا باهتم بموضوع حفظ القرآن طوال العام لان للاسف مدارس اللغات لا تهتم بموضوع الدين بالشكل اللازم فانا متفق مع سيدة فاضلة حافظة لكتاب الله تعالي مواظبة علي تحفيظ مازن ابني و ماما مازن كمان فوق البيعة و الحمدلله عاملة نتائج ممتازة مش بس في الحفظ لأ ده في السلوكيات كمان

بالنسبة للنشاط الصيفي فبالرغم من ان النادي متوفر فيه كافة المدارس الرياضية و كان ابني مواظب منذ سنتين علي التدريب علي السباحة الا انه زهق السنة دي من السباحة
و انا قررت اني افكر بعملية اكتر فالنادي بعيد عن البيت و بضطر أجر تاكسي يوديه و يجيبه و صداع بقي من سواق التاكسي زي مثلا عنده ظروف النهارده و ما قدرش ييجي او ييجي متأخر فالولد يتأخر عن التمرين
فانا ساكن في فيكتوريا و جنب مني فيكتوريا كولدج اللي الناس بتجيلها من كل حته و انا سايبها و رايح بعيد فرحت اسأل لقيت مدربين في السلة و الكاراتيه علي اعلي مستوي و ارخص من النادي و مراتي ممكن تاخد الولاد و تروح في 5 دقايق مشي و لقيت اهتمام كبير مش موجود زيه في النادي اللي همه الفلوس و بس زي مثلا اجراء كشف طبي و هل حالة الطفل الصحية مناسبة للعلبة اللي حيلعبها و لا لأ و كمان فيه انمشطة تانية كتير زي حفظ القرآن و كورسات اللغات و تعليم الموسيقي و فن الرسم

محمد فهمي

تحفيظ القرآن أهم شيء لجميع الأعمار
ويفضل أن يكون بجدية ومتابعة

اقتباس:

---

المشاركة الأصلية كتبت بواسطة Nader

او يعمل مشروع من مصروفي يشتري سمك ويربية ويخلية

يتكاثر ويبيعة "الولدة" بعد كدة، .

---

ياسلام عليك يانادر يانجم
هوه ده المشروع
وعلي فكره مش ل 12 13
ممكن ل 22 كمان :oops:

السلام عليكم ورحمة الله وبركاته
اولا : احب اشكر اختنا فى الله علا على فتح مثل هذا الموضوع فى هذا التوقيت .
ثانيا : يوجد مكتبة سوزان مبارك بالمعادى و بها الاتى ( تعليم رسم وتلوين وكمبيوترو لغات بالاضافة الى القراءة والمطالعة و التمثيل المسرحى لجميع الاعمار من سن 4 سنوات فيما فوق )و الاشتراك رمزى و هى امنة تماما و بها جنينة واسعة و عليها امن لرعاية المكتبة و بها ايضا نظام للاستعارة . :arghh::embarrassed2:
ثالثا : حفظ القران الكريم فى السن الصغيرة يمثل النقش على الحجر و الدليل على ذلك معظم المشايخ الكبار حفظوا القران وهم فى سن صغير و الله اعلم و لذلك انصح نفسى والاخوة جميعا بعدم اهمال هذا الشق التربوى و الذى سيعود علينا جميعا فى اصلاح انفسنا و امتنا الاسلامية و الذى يعود علينا فى الاخرة برضاء الله سبحانه وتعالى علينا اجمعين .
و ارجو الا اكون قد اطلت عليكم
و السلام عليكم ورحمه الله وبركاته