الموضوع: عقد عمل فى الكويت اتمنى استشارتكم

المشاركة الأصلية كتبت بواسطة moustafa_kamel

معلش و الله اصل انا ما اقدرش افتي في العقد بس المهم هو السكن و المواصلات و التامين الصحي(هايبقي شامل الاسره ولا انت لوحدك) و التعليم (لما ربنا يرزقك باطفال)و فيه مكافاه لو هاتسيب الشغل و لا ايه و الاجازه السنويه و هكذا
و يا ريت اللي شغالين هناك يفيدوك اكتر مني

و حكايه ال ٣ شهور مش قصدي مده معينه انا قصدي اول المده علشان احساس الغربه و اهلك وحشينك بس الوضع بيبقي عادي بعد فتره تختلف من شخص لاخر بالذات لما تكون صداقات و يبقي ليك معارف.

انا مش بخوفك انا بس عايزك تبقي مستعد و اذا استعديت نفسيا للفتره دي ان شاء الله مش هاتمر بيها اصلا

ربنا يخليك يا فندم و انا فهمت اركز على ايه و ربنايكرم و شكرا على تعبك

المشاركة الأصلية كتبت بواسطة ahmed a.maksoud

معظم الكلام اللى قالوه الأخوة زى الفل

أنا بس عاوز أضيف حاجة أو أتنين.........مش علشان أخوفك بيهم و لا حاجة..........بس علشان تبقى فاهم.

أى شغل فى الخليج مش فى الكويت بس.........لو حكومة.....بيبقى أضمن شوية من الخاص لأن الحكومة مش بتمشى موظفين لو حصل أزمة أقتصادية زى ما الخاص بيعمل.........بس المشكلة اللى ممكن تحصل هى أن لو حصل مشاكل بين الحكومتين المصرية و الكويتية فى المثال بتاعك............هتلاقى الحكومة الكويتية بتفنش أو بتمشى المصريين اللى شغالين فى الحكومة أو جزء كبير منهم.
نفس القصة دى حصلت فى قطر من فترة كبيرة شوية.........مشاكل بين مصر و قطر و الحكومة القطرية أبتدت تمشى مصريين كتير شغالين فيها..........من ضمن الناس دول كانو أساتذة جامعة......و قطر مش هتقدر تمشيهم كلهم........علشان كده فنشو عدد كبير منهم من اللى يقدروا يستغنوا عنهم أو ليهم بدائل من دول تانية.
بس بصراحة فى الموقف ده أساتذة الجامعة المصريين كلهم هناك طلعو رجالة و وقفوا وقفة جامدة مع بعض.
اللى الحكومة القطرية مش عاوزة تمشيهم راحوا قدمو أستقالة تضامناً مع الناس اللى ماشيين.........و يا نمشى كلنا و يا نقعد كلنا...........و بالفعل نظراً لإعتماد الجامعات على أساتذة مصريين بشكل كبير معرفوش يمشوا الناس اللى قدموا أستقالة و مكنش قدام الحكومة القطرية غير القبول بشروطهم.

حالياً على سبيل المثال............فيه مشاكل بين الإمارات و مصر
مفيش فيز عمل بتطلع للمصرين ولا السوريين فى الإمارات إلا من دبى بس......و مش على طول مفتوحة كمان.
يعنى لو الشغل اللى عاوز يجيبك فى الإمارات و فى أبوظبى مش هيقدر يطلعلك فيزا :)

الكلام ده أنا بقوله بس علشان تبقى فاهم الدنيا بتمشى أزاى هنا.

ربنا يخليك يافندم و ربنا يسهل و الحكومتين يفضلو حلوين مع بعض هههههههههههه
شكرا يا احمد بيه

المشاركة الأصلية كتبت بواسطة horas3000

بص يا زعيم

*مبدايا و من متابعتي ليك فانت شاب صغير و في الاغلب حديث التخرج او خبرتك مش كبيره و ده للاسف مش هيبقي في صالحك في المرتب قوي و غالبا هيبقي في رينج من 350-500 بالكتير قوي و لو اقل من كده كبر دماغك لانها للاسف مش هتجيب همها

* موضوع العقد المفتوح متقلقش منه اهم حاجه تتاكد ان موضوع ال notice period موجود يعني يبقي في فتره انذار في حاله لو عايزين يمشوك عشان تامن نفسك و يستحسن تبقي 3 شهور و طبعا ده هيبقي شغال في حاله ان انت اللي عايز تمشي (هتكون ملزم تنبهم قبلها بنفس المده و تشتغلهم كمان)
و المهم انك تكون شغال بعقد ثابت مش تحت التثبيت و الكلام ده و خلي بالك غالبه هيبقي فيه فنره اختبار 3 شهور علي الاقل و ده بيحق فيها ليك و ليهم انك تمشي او يمشوك بدون اي التزامات علي الطرفين

* عموما الشغل في الهيئات الحكوميه في الكويت و الخليج اريح بكتييير من القطاع الخاص (سواء اوقات عمل او ضغط شغل) بس برضه المرتبات مش زي الخاص و العيب الوحيد انك ممكن تكون مضطر تشيل شغل غيرك او يترمي عليك شغلهم خصوصا لو كوايته

*مش فاهم يعني ايه الاكل و الشرب عليهم (صعبه و مفيش الكلام ده) الاكل و الشرب عليك و من ضمن مصاريفك اكيد و ده طبعا يرجع ليك هتاكل من فنادق 7 نجوم و لا هتعيش علي العيش و الصلصه

* موضوع السكن و المواصلات دي اوبشن كويس بس يكون في علمك الاماكن اللي هيسكنوك فيها تعتبر اماكن شعبيه شويه او بمعني اصح في اماكن احسن منها و هو طبعا الاحسن انك تتفق معاهم انهم يسكنوك او 3-6 شهور مثلا و بعد كده تاخد بدل السكن و المواصلات فلوس و انت تقعد في الحته اللي انت عايزها بس يكون في علمك الاماكن الاحسن الايجارات فيها هتكون في الاغلب اكتر من البدل فاحتمال تتضطر تزود عليه من المرتب و طبعا في خيارات تانيه ممكن توفر لك زي انك تاخد شقه مع حد و تقسموا الايجار و هكذا بس ده طبعا يرجع ليك

* من حيث الخبره فانت اكيد هتتعلم حاجه بس للاسف مش بنفس القدر اللي كنت هتتعلمه في القطاع الخاص لان ال exposure في القطاع الخاص اكبر طبعا بس عموما هي بدايه كويسه جدا

*طبعا اعضاء كتير قاموا بالواجب في الموضوع و من اهم النقط موضوع التامين الصحي ده انا اعرف الحكومه مبتعملش تامين بس حاول تتفاوض عليه و شدد عليه (طبعا في حاله انه مش موجود)

* بالنسبه لرخصه السواقه فهما للاسف مصعبنها شويه علي الوافدين قال ايه عشان يخفوا الزحمه و عموما طالما معاك شهاده جامعيه و مرتبك فوق ال 250 دينار تقدر تطلع رخصه عادي بس غالبا هتحتاج واسطه بس يا بوب انت شغال في الداخليه يعني ان شاء الله هتلاقي حد يظبطك بسهوله و تبقي انت الواسطه ههههه

ده كده رد بسيط علي اسالتك و ده اللي فاكره
لو افتكرت اي حاجه تاني هقولك و انت لو عايز تسال عن اي حاجه تاني انا تحت امرك

و انا بعت رساله لصديقي محمد كمال عشان يشوف موضوعك و هو هيفيدك اكتر مني كمان لانه شغال في وزاره العدل و خبرته في القطاع ده اكبر

ربنا يخليك يا فندم
و الله يعبتك معيا انتا و الرجاله
و ربنا يكرم و شكرا على اهتمامك

طب سؤال برة الموضوع
شغل الصيادلة فى الكويت ظروفه ايه؟

المشاركة الأصلية كتبت بواسطة adel_2346

طب سؤال برة الموضوع
شغل الصيادلة فى الكويت ظروفه ايه؟

والله يا باشا لو اقدر افيدك كنت فيدتك

المشاركة الأصلية كتبت بواسطة m_kamal

السلام عليكم يا باشا
اولا اسف على التأخير فى الرد .. لسة شايف رسالة اخويا شريف منسى حالا....

انا اخوك محمد كمال عايش فى الكويت من 10 سنين و باشتغل فى وزارة العدل

شوف يا باشا ... اولا اللى فهمته انهم بيتحايلو عليك تيجى ...و ده هايل طبعا ... طيب اللى بيتحيلو عليك دول الوزارة نفسها ولا شركة خاصة عاملة عقود توظيف مع الوزارة ؟؟؟؟؟؟؟؟ (يعنى اقامتك هتبقى على الشركة ولا الوزارة)

لأن اللى اعرفه ان الوزارة مابتسكنش حد ولا بتوفر مواصلات ولا كدة

فا لو شركة خاصة واخدة عقود مع الوزارة و ده اغلب الظن امسك على مرتب زى ما قالو لك الشباب اقل حاجة خالص 350 او 400 مع ذكر انه فى العقد ليك بدل سكن و بدل مواصلات و تذكرة سنوية و 30 يوم فى السنة اجازة و طبعا 3 شهور فترة تنبيه فى حالة فسخ العقد و طبعا ده خاضع لقانون العمل الكويتى .. و الاقامة نفسها هتتعمل خلال وقت قد ايه من دخولك البلد

دى اهم نقطة فى الموضوع

أما لو كان العقد على الوزارة نفسها (يعنى اقامتك هتكون على الوزارة) ده طبعا هيكون احسن بكتير على الاقل فى ضمان حقوقك و سهولة اى اجراء بعد كدة و العقد ده مش هتقدر تغير فيه حاجة ولا شروط معينة لأنه ثابت على كل الموظفين ....

بالنسبة للرخصة شروطها راتب على الاقل 400 دينار و الاقامة لمدة سنتين فى الكويت
مع استثناء بعض الوظائف من هذه الشروط و هى سائق و مندوب و طبيب و مهندس و محاسب و مدرس و مستشار و..... بعض الوظائف الاخرى ... يقدروا يقدمو على الرخصة اول ما ياخدو الاقامة

اما عن التأمين الصحى فهو اجبارى على جميع الوزارات و الشركات الخاصة لازم تعمله لكل اللى شغالين عندها و لكن التأمين الاجبارى ده هتتعالج فيه فى مستشفيات القطاع العام و هى على فكرة كويسة جدا و نظيفة جدا بس يعيبها الزحمة بس برده مش زى مصر خالص ... اما التأمين للعلاج فى القطاع الخاص غالبا ما توفه الشركات الخاصة الكبيرة لموظفيها و غير متوفر عند العمل فى الحكومة


الراتب اللى قلنا عليه هيعيشك كويس لو انت شاب عازب و مابتدفعش سكن ولا مواصلات و هتقدر توفر منه

مش عارف يا باشا انت عاوز تسأل عن ايه تانى بس اى حاجة عاوز تعرفها انا تحت امرك فى اى وقت
و اتمنى لك التوفيق و السداد

مبدايا فرصه سعيده جدا يا باشا كفيا تشريفك للموضوع
تانى حاجه العقد من الوزاره نفسها مشوفتش فى الموضوع اى شركه و عمى فى الوزاره بقالو 20 سنه فا هو الجيبلى العقد
بالنسبه للعقد فا هو شكل واحد على كل المواظفين اعتقد مفهوش تفاوض يعنى
بالنسبه للسكن و الاكل و الشرب فا هو قالى انو عليهم و ده موجود فى العقد
بالنسبه للجازه فهى 30 يوم فى السنه مدفوعه الاجر و تذاكر الطيران
و الاقامه و تذاكر الذهاب عليهم
و التامين الصحى فا هو موجود و مكتوب فى العقد
بند ال 3 شهور ده انا مشفتوش او مخدتش بالى منو لاكن المقلقنى حوار العقد المفتوح
ملوش مده
تانى حاجه انا مش عارف اشكرك ازاى على تعبك ربنا يخليك بجد و استاذنك
اسالككام سوال على الخاص لو وقتك يسمح

المشاركة الأصلية كتبت بواسطة raul_7

موضوع حلو ومعلومات مفيدة.

بالتوفيق يا كووبر.

تسلم يا راول بيه ربنا يخليك