الموضوع: تقرير صيانة ال 40.000 للياريس خارج التوكيل

السلام عليكم ورحمة الله وبركاته

بصراحة الياريس من اكتر العربيات الاعتمادية واللى الواحد يشتريها وينساها

العربية الحمد لله بقالها معايا من 2007 وحتى الان عاملة 40.000 كيلو ! وبفضل من عند ربنا ماكنتش محتاج اني اغيرلها اي حاجة وابسط الصيانات ماكنتش بعملها

يدوبك تغيير زيت وفلتر زيت كل 10.000 كيلو فقط لا غير !

لكن كل حاجة برضوا ليها عمرها الافتراضي ولو جيت على العربية بزيادة هتتعبك وتبدأ تظهر مشاكل

هو عموما انا بالنسبة ليا في الفترة الاخيرة بدات تحصل شوية مشاكل بسيطة خلتني استعجلت في موضوع الصيانة

اهمها ان العربية بقت مكتومة جامد جدا على ال Rpm العالي ! خاصا بعد ازمة البنزين الاخيرة

بتتاخر في الدوارة ! فيوز طرمبة البنزين ضرب ! لوحده !

دي طبعا كلها كانت من اعراض نهاية فلتر البنزين !

كذلك كان سعات بحس بسخونة جاية من نحية الدواسات الى غير ان الفرامل كان ادائها ضعيف للغاية ! !

سعات كنت بسمع صوت السير بيصفر اول لما باجي ادور العربية ! ! فواضح انه كان محتاج يتغير

فقلت اعمل الصيانة بتاعتها وبالمرة اغير طقم تيل امامي وخلفي ! ولو ان التيل الخلفي كان لسه فيه ولكن انا قلت بالمرة

لان الميزانية حاليا ماتسمحش اني اودي العربية التوكيل فقررت اني اعمل الصيانة برة التوكيل ولكن اصريت على اني اشتري قطع الغيار الاصلية من موزعين تويوتا ايجيبت

وهنا اصبت بإحباط شديد ! ان قطع الغيار سعرها مرتفع جدا جدا !

المفروض ان اللى هيتم تغييره في صيانة ال 40.000 للياريس هو التالي

فلتر هوا << انا ماغيره من مدة بفلتر رياضي K&N لكن اتذكر اني سالت عليه من مدة وكان في حدود 120 جنيه تقريبا

فلتر بنزين << ب 450 جنيه ! !

سير المجموعة << 195 جنيه ! !

بوجيهات << ب 65 جنيه شمعة واحدة او 80 جنيه 2 شمعة ! !

تيل امامي << 400 جنيه "خارج الصيانة بس انا غيرتهم لان اداء الفرامل ضعف جدا"

تيل خلفي << 170 جنيه "خارج الصيانة بس انا غيرتهم لان اداء الفرامل ضعف جدا"

زيت فرامل << اشتريت زيت الماني ب 35 جنيه

زيت الفتيس

تغيير نظام التبريد <<< اشتريت ماية حمرا الجركن ب 30 جنيه

وطبعا فيه فحص ضغط الاطارات والتشييك على العفشة

---------------------

تقرير عمل الصيانة



عملت الصيانة بالتحديد والعربية عاملة حوالي 40.375 كم

اولا بدات في شراء قطع الغيار واللى اكتشفته انه موزعين تويوتا اجيبت كل واحد بيبيع بسعر على مزاجه !

سالت على التيل الامامي عند تويوتا البرجسي في شارع مراد قالي ب 380 جنيه بس مش موجود حاليا تعالى كمان يومين ! قلت اجيبه من موزع تويوتا اللى في ضهر نادي الترسانة رحت هناك لقيته بيقولي ب 430 جنيه تقريبا !

وبعد ماجبته من تويوتا البرجسي ب 390 جنيه ! لقيته عند موزع تويوتا اللى في شارع دمشق ب 310 جنيه ! ! فاللى عايز يشتري قطع غيار يسال كويس وعند اكتر من موزع وتقريبا ارخصهم اللى موجود في شارع دمشق

اشتريت التالي : فلتر بنزين - سير مجموعة - طقم تيل امامي وخلفي - بوجيهات - زيت فرامل - ماية حمرا - وجبت منظف ليكوى مولي عشان استخدمه بعد ماغير فلتر البنزين

ودي صورة قطع الغيار بعد ماشتريتها مباشرة



ودي صور فردية لكل حاجة

فلتر البنزين ,, السعر : 450 جنيه





-----

البوجيهات ,, جبت بوجيهات Denzo 2 شمعة ! مع ان اللى كان راكب في العربية Ngk ولما سالت في الموزع المعتمد اكدلي ان بوجيهات التويوتا وكهرباء التويوتا كلها عموما denzo ! !

السعر : 80 جنيه



----

سير المجموعة : ده السير الوحيد اللى موجود في الياريس لان سير الكاتيبة جنزير ومش بيتغير

السعر : 195 جنيه



----

التيل الخلفي

السعر : 170 جنيه



---

اشتريت جركن ماية حمرا

السعر : 30 جنيه

زيت فرامل الماني

السعر : 35 جنيه

---

منظف Injection لتنظيف نظام الحقن ! ليكوي مولي

السعر : 35 جنيه



=======================

تركيب قطع الغيار

بعد ماشتريت قطع الغيار توجهت لميكانيكي اعرفه واتعاملت معاه قبل كدة

قلتله انا اشتريت الحجات دي وعايزك تغيرها

بكام ياعم ؟ مش هنختلف يا كبير نخلص بس الاول وهعمل معاك واجب ! طبعا قلت بسيطة

خاصا اني كنت لسه مغير عنده التيل الامامي من قبلها بمدة وخد 20 جنيه مصنعية فقلت مافيش مشكلة

بسم الله اول حاجة غير البوجيهات ! البوجيهات طبعا طالعة متفحمة شوية والصورة مش عارف ليه طلعت مش واضحة !





بعدها سير المجموعة ! السير القديم كان طالع كويس اعتقد كان ممكن لسه يمشي كمان لان ماكنش فيه اختلاف كبير بينه وبين القديم



ثم التيل الخلفي ! برضوا التيل الخلفي كان لسه فيه شوية



وبالمرة دي صورة فلتر الهوا القديم



وجينا عند فلتر البنزين ! المعلم معرفش يفك الفلتر القديم قالي تعالى بكرة عشان نفكه على راحتنا

رحتله بكرة راح موديني عند واحد هو كمان معرفش وقالي تعالى بليل ! وهنا قلتله متشكر يا كبير لحد كدة انت عملت اللى عليك وقلت هروح انا اتصرف في موضوع فلتر البنزين

كام حسابك يا معلم ! 80 جنيه ! ؟ نعم ؟ ؟ 80 جنيه عشان غيرت "بوجيهات وتيل خلفي وسير ؟ ؟ " قالي اانا عامل معاك واجب ومرضتش اقولك 100 جنيه ومش عارف ايه

المهم يمين شمال حسيت اني بجادل في الهوا قلت ادفعله الفلوس ووالله ماهيشوف وشي تاني

-----

بعد كدة توجهت لمركز صيانة قريب من البيت

قلتله عايز اغير فلتر البنزين

بالفعل فك الفلتر القديم وماشاء الله كان مطلع سواد من جوة ! اكنك كنت بتمون ماية سودا مش بنزين نهائيا ! ! يمكن الصورة مش موضحة لان الماية اللى فيه كانت نشفت لكن وقت ماكنت بطلعه من العربية فعلا كانت حالته صعبة جدا جدا !



بعد كدة قلت للراجل ان عندي مشكلة رجة بسيطة بتحصل في السلانسيه ! ودي كانت بسبب فلتر الهوا الاسبور

فكلي فلتر الهوا ونضفهولي بالمرة اشتريت منظف البوابة ورحت خليته يفكلي البوابة والحساسات ! ومش عايز اقول انها كانت مطلعه هباب اسود من جوة ! مش عارف الهوا كان بيدخل ازاي

نضفت البوابة والحساسات وبعدها وصلت العربية على الكومبيوتر

قالي زيت الفتيس لسه فيه شوية ماتغيرهوش دلوقتي ! كذلك زيت الفرامل

كان فيه رجة بسيطة على السلانسيه برضوا ظبطهالي والدنيا بقت زي الفل الحمد لله

كام الحساب ياعم ! ! ؟ 100 جنيه وانا عامل معاك واجب ومش عارف ايه نفس الكلمتين اللى بسمعهم كل مرة

المهم قلتله ماشي مش خسارة فيك

بعدها تاني يوم الصبح لما العربية كانت بردة رحت مزودلها ماية حمرا من الجركن اللى جبته

بعدين طلعت فولت ورحت حاطط المنظف اللكوي مولي اللى جبته

بصراحة اداء العربية اتغير 180 درجة ! العربية بقت اهدى وانعم والسحب اتحسن

الفرامل في الاول كان ادائها ضعيف بعد كدة الحمد لله اتظبطت المشاكل اللى كنت بحسها قبل الصيانة راحت الحمد لله

مافضلش غير حاجة واحدة بس ! ان العربية قطعت مني مرة على الغيار الاول لما حرقت عليه ! ؟ واعتقد دي ممكن تكون بسبب زيت الفتيس وهغيره ان شاء الله في اقرب وقت

كذلك سعات لما بدور برضوا بسمع صوت السير فواضح ان اللى ركبه ماركبهوش كويس ومحتاج يتشد

يعني الحمد لله العربية اتحسنت كتير ولو ان فيه حجات كان ممكن تمشي وماكنتش محتاجة انها تتغير زي السير والتيل الخلفي !

وكدة نحسب بقى اجمالي الفلوس اللى ادفعت

فلتر بنزين 450 جنيه
تيل امامي 400 جنيه
تيل خلفي 170 جنيه
سير المجموعة 195 جنيه
بوجيهات 80 جنيه
جركن ماية حمرا 30 جنيه
منظف ليكوي مولي 35 جنيه
زيت فرامل 30 جنيه
مصنعية الميكانيكي الاول 80 جنيه
مصنعية المركز 100 جنيه

الاجمالي = 1570 جنيه ! !

لو هنخصم تمن طقم التيل لانهم خارج الصيانة ! يبقى الصيانة بدون تغيير فلتر الهوا / زيت الفتيس / زيت الفرامل

كلفت 1000 جنيه بالمصانعيات وكل حاجة ! او حوالي 850 جنيه بدون المصنعيات !

وده طبعا يعتبر كتييير ! خاصا ان العربية مافيهاش فلتر تكييف / وكمان انا مغيرتش فلتر الهوا ولا زيت الفتيس ! يعني لو تم تغييرهم كان ممكن الصيانة تبقى مكلفة عن كدة !

الصيانة في التوكيل بتكلف 1600 جنيه لصيانة ال 40.000 ! بس بيكون معاها تغيير زيت الماتور

عموما الصيانة برة التوكيل لو هتشتري القطع الغيار الاصلية بتبقى اقل من التوكيل بحجات بسيطة ! يعني ممكن توفر في الاخر في حدود 300/400 جنيه تقريبا

والله واعلم لو كنت غيرت طقم تيل في التوكيل كان هياخد مصنعية قد ايه ! ! ؟

وبصراحة لما شفت موضوع كريم فوزي وتقرير صيانة ال 40 الف للالنترا ! وكلفت حوالي 500 جنيه فقط ! بالمصنعيات وتغيير كل مايلزم ! جالي صدمة واحباط شديد ربنا يباركله فيها بس ياريت بقى ماحدش يحبطنا باسعار قطع غيار هيونداي تاني

مش عارف مين اللى قال ان التويوتا قطع غيارها رخيصة !

ده كان تقرير بسيط للصيانة وفي النهاية اللى مانصحش اي حد انه يكسل على صيانة ال 40 او ال 80 الف لانها مهمة جدا !

فيه حجات ممكن يستنى عليها زي السير والتيل الخلفي كذلك البوجيهات لو السواقة عادية ومش بتحرق كتير ممكن تمشي اكتر من كدة

وبشكر اخويا وحبيبي ابوحميد lanos2004 اللى تعبته معايا ولفيت انا هوا لما دخنا لحد ماجبنا قطع الغيار وبالاخص الماية الحمرا

تحت امركم في اي استفسار