المشاركة الأصلية كتبت بواسطة manola
خدوا النصيحه من أختكم بقى رغم أنى مش بحب أرد على المواضيع إلى بتهاجم البنات
لكن الأعتراف بالحق فضيلة
أولا مش هنتكلم عن الشكل لأن زى ما 90 % من الرجاله مش عاجبهم شكل البنات تقريبا النسبه دى من البنات مش عاجبها شكل الرجاله مع العلم أن أصغر تفاصيل فى الراجل البنت بتركز فيها فممكن يكون شكله حلو بس فيه حاجة بسيطة جدا تخلى البنت تضحك عليه لحد ماتفطس (و أنا من وجهه نظرى شايفة أن الشكل دة بتاع ربنا و محدش بيقدر يتحكم فيه)
ثانيا بقى للبنت الصايعة نظرة خاصه فى الأفراح
هتقولولى أزاى هقولكم دلوقتى , البنت الصايعة دايما بتعتبر الفرح دة مصيده
بمعنى أصح أنها تحاول تشقط شاب حلو كدة و معاه عربيته و شقتة و يكون مستواة حلو
طبعا مع العلم أن أول سؤال بيتسأل انت صاحب العريس ولا قريبه , طبعا السؤال دة مهم جدا لأن لو مستوى العريس كويس يبقى قرايبة جدا أكيد مستواهم قريب منه و لو صاحبه يبقى مستواة قريب منه , لكن لو قريبه من بعيد مش شرط يكون مستواة زيه (المعادله صعبه لكن لو ركزت فيها هتفهم)
و أى نعم فيه كتير جدا من البنات بتعمل كدة لكن البنات دى كلمة زبالة بتكون صغيره عليها و برضة فيه شباب بتعمل أنيل من كدة فى الأفراح برضة أو بمعنى أصح بتكون رايحه عشان تظبط بنات
ثالثا الطيور على أشكالها تقع , يعنى بمعنى أصح لو أنت هتدوم مع البنت دى يبقى أنت زيها و لو هتدوم مع بنت كويسة يبقى أنت كويس و العكس صحيح