وكيل غبور بيصلح العربيات ولا بيبوظها
معايا فيرنا 2008 .. روحت اعمل صيانه الألف في توكيل غبور (ابو رواش) وكان عندي الملاحظات التاليه :
1- فيه صوت تزييق بلاستيك جاي من ناحيه القايم
2- الموتور بيسقف كتير
3- حزام الأمان حاسس انه سايب
المهم المشكله الأولي عملوها ومشكله التسقيف .. دار الحوار التالي بيني وبين مهندس الصيانه
انا: من لحظه ما استلمت العربيه والموتور بيسقف كتير
المهندس : معارض السيارات بيحطوا اسوء انواع البنزين وده اللي بيخليها تسقف
انا : بس انا شاريها من غبور نفسه
المهندس : ما احنا برضه نفس الوضع ؟؟؟!!! لا تعليق
مشكله حزام الأمان موصلتش فيها الي حل .. حاولوا يقنعوني انه كده تمام .. بس مش مقتنع
المهم انا خرجت من البيت الساعه 8 صباحا ورجعت البيت تاني الساعه 9 مساء
يعني 13 ساعه علشان اعمل صيانه الألف واصلح المشاكل اللي ماليش ذنب فيها ..
نيجي للمهم .. لاحظت ان امر الشغل مكتوب فيه "فرامل اليد"
مفهمتش هما قصدهم ايه .. انا ما اشتكيتش من الفرامل..
بعد الصيانه بعده ايام .. فوجئت ان لمبه الهاند بريك منوره علي طول .. بالبحث اكتشفت ان زيت الفرامل ناقص .. زودته واللمبه طفت .. بعد عده ايام اخري نورت تاني بصيت علي زيت الفرامل وجدته ناقص جدا .. معني الكلام ده ان زيت الفرامل بيسرب .. علما باني استخدمت السياره لمده شهر قبل ما اعمل صيانه الألف كيلو ولم يحدث نقص في زيت الفرامل
وبكده انا فهمت هما قصدهم ايه لما كتبوا فرامل اليد في امر الشغل....
قصدهم انهم بوظوها
مش كده ولا ايه ؟؟..
تحذير : كل واحد يروح يعمل الصيانه في التوكيل يبقي يخرج من هناك يروح لميكانيكي يشيكله علي العربيه :oops::oops: