زحلقة العربيه فى الرمله أنيل مليون مرة من السيراميك و أنت لابس شبشب مبلول

**MaNoLa** · 28-04-2012 02:09 PM

عملت حوادث كتيرة جدا فى تاريخ حياتى رغم أنى محترفة والله فى السواقة
لكن الحادثة دى تعتبر غريبة أوى لأنها جت فى الصميم زى مابيقولوا و حوالى خمس ثوانى رعب

أولا أنا بقالى فتره طويلة باخد برشام بينيم أساسا حتى لو أنت لسه صاحى
ثانيا أنا كنت فى الطريق لوحدى و مفيش عربيات تانيه خااااالص و كنت قافلة الأزاز و مشغلة التكييف و أغانى حمزة نمرة و طايرة فى نص الشارع

و فجأة و بدون مقدمات دماغى صدعت قفلت عينى و فتحتها و ببص أدامى لقيت مطب شكله فى منتهى التخلف تحس أنه معمول عشان يقطع الكاوتش مثلا
حطيت رجلى على الفرامل و فجأة و بدون مقدمات لقيت العربيه بتتزحلق لأدام و بتنحرف على الجمب اليمين و أنا عماله ألف الدريكسيون على الشمال عشان أعدل وش العربيه للطريق لكن العربيه أتخبطت فى رصيف و أتعدلت تانى لوحدها مع كمية تراب حوليا كأنى فى عاصفة الصحراء كل دة حصل فى حوالى خمس ثوانى بالظبط
نزلت شوفت أية النظام و الخساير ملقتش حاجات كتيرة يعنى بس الخساير كلها كانت فيا أنا و الحمد لله
على العموم أنا حبيت أتكلم فى الموضوع بالذات عشان أنا مكنتش فاكرة أن الرمله أنيل فعلا من السيراميك و أنت لابس شبشب مبلول

**osama.m** · 28-04-2012 03:31 PM

الحمد لله انها جات سليمة
هيا الرملة بتعمل اكتر من كدا لو مفيش abs

**mohammedabdallh** · 28-04-2012 03:36 PM

اولا الف سلامه عليكى وكويس انها جت على قد كدا
ثانيا اكيد العربيه مفيهاش abs
لما يكون قدام ا ى مطب او اى شىء ومسكتى فرامل جامد وبيكون فى انحراف فى الدركسيون لازم تسيبى فرامل وتمسكى تسيبى وتمسكى علشان تساعدى فى توجيه العربيه وهو ده الى حصل معاكى
وكتيير كمان بيحصل نفس الموضوع من غير ما بيكون فىه رمل او تراب
علشان استحاله تتحكمى فى الدركسيون وانتتى ضاغطه فرامل
ثالثا مينفعشى تاخدى برشام او اى دوا فىه منوم اثناء القياده خوفا عليكى وعلى الاخرين

**Screenplays** · 28-04-2012 04:37 PM

عملت حوادث كتيرة جدا فى تاريخ حياتى رغم أنى محترفة والله فى السواقة

طب ده اللي هو ازاي ؟ يعني ازاي محترفه سواقه و عملتي حوادث كتير ؟ يمكن الحوادث اتعملت قبل احترافك للسواقه ؟ الله اعلم

أنا بقالى فتره طويلة باخد برشام بينيم أساسا حتى لو أنت لسه صاحى

انا اباخد اليربان و اكتيفيد بيعملوا احلي دماغ و خصوصا عشان عندي حساسيه ... انت بتاخدي ايه ؟ عشان الادويه دي بدأت تفقد تأثيرها معايا

حطيت رجلى على الفرامل و فجأة و بدون مقدمات لقيت العربيه بتتزحلق لأدام و بتنحرف على الجمب اليمين

خرطوم الفرامل بتاع الجنب اليمين فيه تسريب ... بتابعي زيت الفرامل ؟

**ahmad--ezzat** · 28-04-2012 05:04 PM

المشاركة الأصلية كتبت بواسطة osama.m

الحمد لله انها جات سليمة
هيا الرملة بتعمل اكتر من كدا لو مفيش abs

وحياتك ما بتفرق حصلي موقف ب عربيه نيسان ليفينا لو تعرفها ....ولا بتفرق ولبسنا لبسا صح

**medododo** · 28-04-2012 05:13 PM

إحترااااااااااااف + منوم = الحمد لله على السلامة ؟؟؟؟؟؟؟؟؟؟؟؟
ربنا يسترها معانا

**Ghosts** · 28-04-2012 05:14 PM

المشاركة الأصلية كتبت بواسطة ahmed_nubira

وحياتك ما بتفرق حصلي موقف ب عربيه نيسان ليفينا لو تعرفها ....ولا بتفرق ولبسنا لبسا صح

++++ 1

**SHNORY** · 28-04-2012 06:29 PM

مينغعش تلبس شبشب مبلول وتطلع تجري علي السيراميك وترجع تعيط
يا ريت الناس تركز وهي سايقه ومتسرحش
ويسوقوا في كل مكان علي حسب طبيعه الارض مش علي حسب طبيعه العربيه