شوية حاجات ظبطها في الاكسنت
طبعا زي ما الناس عارفة (او مش عارفة) انا معايا اكسنت 99 ال 1300 خليجي
روحت الاجازة اللي فاتت استغليت ان في اجازة 4 ايام و قلت اروق العربية...
اولا ظبطت الزوايا و رصصت العجل و العربية بقت حلوة جدا جدا جدا .. اتكلف 60 جنية
ثانيا نضفت دورة المية لانها كان فيها صدا مش طبيعي .. و غيرتها بميه خضرا الموضوع كله اتكلف 30 جنية
ثالثا جبت طقم فوجات صيني عشان مش لاقي غيرة في السوق ... بس انصح اي حد يجيب فوج صيني انة يغير القاعدة اللي جوا الفانوس قبل ما يركبة عشان كان هيسيح لما حطيتلة لمبة قوية شوية.. جبتلة قاعدة لامعة كدة بدل الفبر اللي فيها والحمد لله زي الفل .. الفوجات ب 50 و 20 قواعد غير اللي راكبة و 20 مصنعية تركيب
رابعا عرفت اخيرا ازاي افك الكونسول بتاع التكييف عشان اغير اللمبه عشان كانت محروقة و الكنسول كان مضلم خالص.. ب 10 جنية (فك و تركيب + تمن اللمبه)
خامسا جيبت كاسيت فلاشة و ميموري كارد هايل و ريموت و شكله تحفه ب 200 جنية بتركيبة .. عشان الكاسيت الاصلي بتاع العربية كان بيتكتك كدة مع الشريط وكمان شكلة كان سخيف .. سألت وعرفت انو يتصلح ب 70 جنية فقلت اغيرة احسن.
سادسا شحنت التكييف في جسر السويس عشان الحر اللي بقينا فية دة ب 120 جنية
سابعا ضربت فيمية تاني درجة في دمشق و اتكلفت 170 جنية فيمية و فوانيس سموكي ب 50 جنية
ثامنا جبت طقم كبالن الماني ب 250 من الشارع اللي قدام مزلقان كوفرتينا
تاسعا غيرت المارش عشان كان بيعتل و البندكس كان باظ خالص .. بعتة هو و مارش كان بتاع العربية القديمة وبايظ برضة ب 100 جنية الاتنين و خدت واحد ب 250 يعني دفعت 150 و خدت مارش زي الفل.
وكدة دي الحاجات اللي عملتها طبعا كنت مرهق جدا بس بصراحة حاسس بكل مليم دفعتة و مبسوط ان العربية بقت تمام وحاسس بمجهودي.. انا مصور الكلام دة بس مش عارف ارفعلكو الصور مع الاسف. و عندي سؤال بس يعني الدركسيون عندي تقيل شوية واللي فهمتة من خلال البحث ان علبة دريكسيون الاكسنت بيحصل فيها مشكلة فبتحتاج تغير حاجة مثلا عشان الدريكسيون يبقى اخف و كدة واللي اعرفة ان العربية هاف باور مع اني برضو عارف ان دة مصطلح مصري و مفيش حاجة اسمها كدة بس انا سوقت شاهين مثلا وكان دركسيونها تقيل جدا و لادا و كدة .. بس انا حاسس ان دة مش الطبيعي لاني سوقت 128 وكان دريكسيونها اخف بكتير قوي من دركسيوني... هل دي حاجة ليها حل ولا اية .. ولو عايز اركب باور اصلا يتكلف اد اية و اسئل عند عفشجي ولا ميكانيكي ولا مين؟؟؟
طولت عليكو معلش بس قولت اهو اللي عايز يسأل على حاجة ممكن يستفيد من اللي انا جبتة و اي استفسار انا تحت امركوا.