الموضوع: طربق القاهرة - الغردقة

انا كنت هناك قريب والمشاركه دي فيها المفيد

1 - الطريق : احسن طريق هو طريق القطامية - العين السخنه و مدخله من الطريق الدائرى بعد كارفور بحوالى 5 كيلو و تقسيمة الطريق من القاهرة للغردقة كالأتى (القطامية - العين السخنه المسافة حوالى 120 كم و السرعة القصوى 120 و توجد بنزينة وطنية فى أول و منتصف و أخر الطريق) ثم (العين السخنه - الزعفرانة المسافة حوالى 70 كم و السرعة القصوى 90 و توجد بنزينة مصر للبترول فى أول الطريق و بنزينة التعاون فى الزعفرانة) ثم (الزعفرانة - رأس غارب المسافة حوالى 120 كم و السرعة القصوى 90 و توجد بنزينة موبيل فى رأس غارب) و أخيرا (رأس غارب - الغردقة المسافة حوالى 100 كم و السرعة القصوى 90) و مدخل الجونة قبل الغردقة بحوالى 23 كيلو، كل الطريق حلو و اتجاه واحد و العجل مش كتير ما عدا المسافة من العين السخنه - الزعفرانة اتجاهين و ياريت محدش يستعجل فيها لأنها خطر.

احب بس أأكد عليك في كذا حاجه

اولا ركز جدا في المنطقه بين العين السخنه والزعفرانه لانها كلها ملفات خطيره جدا، اتجاهين يعني وشك في وش الي جاى ومش بعيد تلاقي عربيه نقل بتفادى عربيه نقل تانيه في ملف وجايه فوشك، طبعا وانت معدى على بورتو سخنه لو من هواة انك تتفرج يبقي تركن احسن بدل ما تلاقي حد راكبلك في الشنطه ورا

تاني حاجه البنزين يفضل كل اما تلاقي بنزينه تفول عربيتك منها - محدش ضامن الظروف واحسن بنزينه هي موبيل في رست صحاري

الطريق ممتاز ويفضل تمشي عليه بالنهار وفي رادار قبل الغردقه وقبل راس غارب ب 10 كيلو تقريبا