كنت هتاخد مخالفة سير عكس أونطه (مع اني ماشي سليم).
السلام عليكم ورحمة الله
النهارده وانا ماشي في طريق الشروق 1 اتجاه من الاسماعيليه للسويس بعد اللفه بتاعة الجامعه الفرنسيه لقيت ناس بتلف من يوتيرن وناس جايه عكس وبيقولوا الطريق مقفول ومفيش امكانية اني اشوف لقدام عشان كلهم نقل ونص نقل وبعض العربيات الملاكي.
قلت الحق نفسي واخد اليوتيرن انا كمان قبل الدنيا ماتزحم (كنت لسه قبل اليوتيرن وماعدتهاش ودي اهم نقطه في الموضوع).
كنت ساعتها ماشي في اتجاهي مظبوط واديت اشاره شمال عشان الف ولسه ماطلعتش على الطريق الناحيه التانيه لقيت عربيه بوكس شرطه وقف قدامي و وقف كل الي في اليوتيرن ونزل مخبر بيخبطلي على الازاز بيقولي انت ماشي عكس ليه والطريق ماشي قدام مش واقف؟ انا استغربت جدا يعني سايب ال100 عربيه الي ماشيه عكس وبتقولي انا ماشي عكس ليه ؟ هههههههههههه
المهم قالي هات الرخص اديتهاله و لقى كل حاجه سليمه ورجعلي الرخص ماخدهاش لأتي قولتله اني ماشي مظبوط مش عكس واني اصلا كنت هاخد اليوتيرن. سابني وراح هو والظابط على الي بعدي والعساكر متحفزين وماسكين الرشاشات.
شوية ولقيت مخبر تاني بيقولي اتحرك بس قالها بطريقه محترمه جدا وشكله زي مايكون خايف مني مش عارف ليه هههههههههه. قولتله مش فاهم ! اقف على جنب يعني ولا امشي ؟
قالي لأ امشي. قولتله متأكد ؟؟؟ هههههههه
المهم مشيت وانا عمال اسب والعن في البهايم الي وقفت الطريق وطبعا مابعتبش على الشرطه عشان هما اتصرفوا صح وكان نفسي يضربوهم بالنار عشان نخلص من العقليات دي.
الموضوع ده فكرني بالفيديو الي كان في المنتدى من اسبوع تقريبا بتاع العربيه النقل الي ماشيه عكس بسرعه على المحور. ياريت اللجان تزيد شوية وتركز على الرخص المنتهيه والناس الي ماشيه من غير رخص والناس الي ماشيه عكس بدل ما يدققوا على الفاميه والحاجات الهايفه.