احكليكو ذكرياتي مع الكمائن ايام الشباب بقى
اولا السوبارو امبريزا:
ودي كانت معايا من 2006 والصراحة كان شكلها غريب وكتير بيوقفوني ويقولولي العربيه دي نوعها ايه ودي صيني وكده وصباح الفل
المهم مره وقفت في كمين (برضه مكنش في كمين غير لما يوقفني تقريبا عشان يعرفو نوع العربيه) والظابط شاب محترم بيقولي بس اللي انت عامل ده مخالف وممنوع قولته ايه ده قالي مغير الاكصدام والعتب وشغل الحرفيين ده بصتله باستغراب اوي وقولتله على فكره هي نازله كده من بلدها والله ملمست حاجه فيها خالص قالي ماشي (اتكسف) اتفضل
مره تانية كنت مركب زينون في كل لمبة فيها (فوجات وعالي وواطي) المهم داخل على الكمين قمت قافل كله وسايب الواطي بس قالي ايه ده زينون قولتله عيب عليك ده جاية من بره كده حتي بص على الفانوس العدسات دي بيركب عليها زينون بره عادي (لينسات يعني) مش زي الفوانيس اللي في مصر ههههههه
مره تانية وقفت في كمين الحمام على الساحل نقيب روش اوي ولابس نضارة شمس وبيبص على الرخص وبيقولي بس الفاميه ده ممنوع قولتله بس ده مش فاميه قالي اممال ايه ده قولتله ده في كول (v-kool) قالي ايه قولتله في كوووول قام قالع النضارة الشمس وبص اوي وبيضحك يعني وانت سايق الناس تكلمك فيديو عادي (علي اساس انه فيديو كول) ضحكتله ضحكة صفرا كده ومشيت مش ناقصة قلش يفقع انا لسه عايز اصيف
مره بقى ودي كانت حدوته مدتها ربع ساعه
ماشي على طريق العين السخنة ومعايا 3 اصحابي ماشي ومثبت 200 مش بقى وممكن 215 المهم وقفت في لجنة رادار وقالي انت كنت ماشي 187 كم قولتله نعم ازاي فين الظابط ركنت وروحت للظابط لقيته عقيد كبير كده بقوله الامين موقفني وبيقولي اني كنت ماشي 187 ازاي يعني انا والله ماكنت ماشي 187 (انا في بالي قصدي 200) واصحابي خدو بالهم وضحكو قام العقيد استغرب قالي انت متاكد الامين بيقولك كده راح نده له واكد عليه قالو يافندم الاشارة جاية في اللاسلكي كده قالو طب اكد مع الاشارة تاني وشوف العربيه الهونداي دي كانت ماشية كام (هنا بقى كلنا متنا من الضحك انا واصحابي) والراجل مش فاهم بنضحك ليه المهم الاشارة اكد انها عربيه سوده رقمها كذا وكانت 187 قولتله ابدا حرام عليكو اكيد قصدو على هيونداي تانية ولا حاجه المهم الناس كلها تقف وتاخد الوصل وتمشي وانا واصحابي واقفين نجادل مع الراجل ان مش انا واحلفلة اني مكنتش ماشي على السرعه دي قام مأكد مع الاشاره تاني وقالي يابني طب انا اعمل ايه اهو واديك سمعت بنفسك ساعتها قولتله طيب خلاص وربنا يعوض عليا بقى
ومشيت وانا داخل العين السخنة في كمين في اولها الامين بيقولي الرخص قولتله لسة مسحوبة حالا قالي طب هات الوصل اديتهوله بص فيه وبصلي وقالي بالحرف : ياابن الاية يا جامد 187 امشي ربنا يستر عليك
وطبعا وانا خارج من العين السخنة بليل وقفت في كمين (الوقفة في اي كمين دي حاجه اساسي معايا ساعتها) وطلع الظابط معرفة واحد من اصحابي وفضلنها نحكيلة ونضحك على اليوم كله
ثانيا: فيات برافو
برضه العربيه دي اول ماجبتها والله كتيريقولي دي صيني ولا ايه دي ابص للعلامة الاقي مكتوب عليها بالبونت العريض فيات ابص للي بيسألني دي فيات الاقيه بعد ما كان معجب بشكلها اوي يقولي فيات طب معلش ربنا معاك
دي بقي كانت نازلة فامية فابريقة واخيرا جاتلي الفرصه اني اتلذذ في الانتقام من كل ما هو حاطط نجوم ولا شرط علي كتفه واخش على كل الكماين انزل طرف الازاز اديله الرخصة الاقية اول حاجه يبص على ضهر الرخصة يلاقي مكتوب فامية فابريكة ميكملش ويديني الرخصة تاني وانا ساعتها في عنيا نظرة النصر والتلذذ اني بحس اني بكسفهم كده
مره راجع من الشغل بليل وعديت على كمين في اشارة اديتة الرخصة كالعاده لقيته بيقولي بس انت مركب فامية قدام والفامية الفابريكة بيبقي ورا بس قمت رادد علية وانت مالك انت ليك بالمكتوب في الرخصة ومش محدد الفاميه فين بالظبط (كنت طالع وقرفان من الشغل ساعتها) لقيتة بيحط ضفرة على الازاز بتاعي وبيحاول يفك طرف الفامية قمت مزعق وقولتله بتعمل ايه شيل ايدك من على العربيه قالي طب ماشي قام رايح لعميد او عقيد وتقريبا قاله اسلوبي قام لقيت العقيد ده بيقولي كلام كده اهبل مش فاكر قمت شديت معاه وعليت صوتي قام قايلي طب انا حاحبسك قولتله انت عبيط ايه اللي بتقوله ده انت راجل قانون انت ده كلام ملوش اي اساس من الصحة (نظام اقلعلكو ملط هنا) المهم شدينا مع بعض في الاخر قالي حاسحب الرخصة واكتب فيك تقرير قولتله طيب احسن برضه (كنت جبت اخري الصراحة)
رحت المرور بعد اسبوع سألت على الرخصة قالي موجوده بس العربيه لازم تتفحص عشان الفامية كنت حاسب تاني قمت داخل على رئيس الوحده وحكيتلو الموضوع (انا ولا اعرفه ولا في اي واسطه) قالي انت متأكد ان عربيتك فامية فابريكة مش ضاربها قولتلو لا هي كده قالي انا حبعت اجيب الملف ولو لقيت مش مكتوب فيه انها فامية حاعملك قضية تزوير قولتله ماشي ابعت (وفي بالي بقوله طب ما الرخصه طالعه من المرور بتاعك يعني حتي لو كده يبقى العيب من عندك) المهم جاب الملف ولقي فعلا مكتوب بالعرض زجاج فامية فابريقة قام استغرب قوي وقالي اممال سحبها منك ليه قولتله معرفش يظهر ان كان مزاجو مش حلو ساعتها (مرضتش اغلط في امه ساعتها قدامة) واداني الرخصة ومشيت
ثالثا: الالفا 147 ودي كان برضه لازم اي كمين اقف فيه على نظام الفضول ويعرفو ايه العربيه دي بالظبط زي ماتقولو ده اجراء عندهم اسمة من باب العلم بالشي وبمشي عادي ومره وقفت (قبل الثوره) وكنت مفيم وقالي ده فامية وكده وفضلت اجادل ان ده حاجه بسيطة جدا وميعتبرش حاجب للرؤية لانك شايفني عادي وانا جوه العربيه واحنا بلد حر ولازم نسمح بنسبة والعربيات كتير بتنزل فابريكة كدة وكلام كتير كده وفي الاخر الظابط قالي اتفضل بس انا بنفذ قانون موجود دلوقتي وادينا مستنين لما قانون يطلع بالنسبة دي ومشيت عادي
رابعا : الالفا 146 ودي شكلها عادي جدا جدا (شبة الريجاتا او رينو رينبو كده) موديل 97 ودي ماشاء الله من ساعة ماجبتها موقفتش في ولا كمين ومره دخلت كمين بليل اوي وافتكرت اني نسيت المحفظه كلها وكنت داخل مقلق بس الحمد لله ولا حد عبرني اصلا زي ماتقولو كده مش دي العربيات اللي بيوقفوها ومره ادخل الكمين وانا ببص اوي عليهم ومره ادخل وانا عامل من بنها ومعدي ولا بقف وفي كل الاحوال محدش بيوقفني خالص (عكس ما سبق تماما)
وسبحان مغير الاحوال
طبعا محدش يستغرب من العربيات الكتير اللي شوفتوها من التسلسل الغريب ده اقولكو الحمد لله علي كل حال ودي من نتائج الثورة الجميله والجواز اخيرا :):):):) عشان كده قولت ايام الشباب في الاول قصدي ايام العزوبية
المفضلات