الموضوع: تجربة تغيير طرمبة البنزين

السلام عليكم ورحمة الله وبركاته

النهاردة بفضل من الله غيرت طرمبة البنزين

وزي مانتوا عارفين
النهاردة يوافق سبوع الطرمبة بتاعتي الشهيرة

الحمد لله تم الدفن في مدافن الحرفيين وقرينا عليها المعوذتين ومشينا
حضر الدفن والمراسم الملكية
المهندس ايهاب منصور (حضر كمان الغسل)
الأستاذ أحمد مبارك
الأستاذ مصطفي ماتريكس

طبعا كفنتها الأول بكيس بلاستيك وبعد كدة حطيتها في التابوت الفل الي بيجي مع الطرمبة الجديدة

المهم
الحي أقبي من الميت

خلينا ولاد النهاردة

الطرمبة الجديدة
عديمة الهوية
الكرتونة سااااادة (مش مظبوط حتي)
مش مكتوب علي الكرتونة ولا كلمة غير اسم المستورد
واساسا اشك انها تكون كرتونتها
كبيرة موت علي الطرمبة (تقريبا بتاعة اختها الكبيرة وشاحتاها منها)

ونفس الطرمبة مش مكتوب عليها ولا كلمة غير شوية ارقام كدة

جبتها من فتح الباب في الحرفيين
بصراحة الناس ذوق أوي اوي اوي
وعمل معايا الصح
مارضيش ينزل معايا ولا مليم غير 20 جنيه اساسا كانوا حق غطاء زيت موتور بتاع المهندس ايهاب وطلع بايظ
اتحايل عليه - مفيش
أقولوا دحنا جيران من 30 سنة لفرع وسط البلد (بتمحك في واحد صاحبي فاتح محل قطع غيار جمب محلهم في سليمان الحلبي) - بردو مفيش
أقولوا نايل موتورز والخصم والتظبيط - مفيش

قفش ياخد ال270 بعد خصم ال20 جنيه بتوع المهندس ايهاب من اصل 290 جنيه

المهم

طبعا خدتها من عنده
وكنت راكن في الشارع الي قبله
فكيت طرمبتي العزيزة (الله يرحمها)
وركبت الجديدة بمساعدة من المهندس ايهاب

وجربتها
الحمد لله طلعت كويسة
وتقريبا مفيش ادني فرق يذكر بينها وبين طرمبتي القديمة الغالية
نفس السحب ونفس التجميع ماحستش بفرق انها جديدة

الحمد لله
يارب تنطوي صفحة الطرمبة دي للأبد وماتتفتحش تاني

شكرا لكل من ساهم في تطوير طرمبة بنزين عربيتي
ايهاب منصور
احمد مبارك
ايهاب اسماعيل
فادي محمد عيد
مصطفي ماتريكس
هاني عبدالهادي
والأخراج لمحمد سيد

ولنا لقاء أخر في تجربة جديدة من تجاربي مع سيارتي العزيزة

والله المستعان
،
،