الموضوع: اشتغالات و حوارت في عالم بيع المستعمل من العربيات

عايز تشتري عربيه مستعمله فتخش علي كونتاكت كارز مثلا و تبص علي الاعلانات ... هناك بقي تلاقي حاجات غريبه ... يعني مثلا

واحد كاتبلك " السياره استخدام سيده " و الله الجمله دي تعيب العربيه مش تزود في تمنها لان استخدام سيده يعني مطلوب شغل سمكره و دوكو للصبح و يعني الفتيس و الدبرياج رايحين في داهيه و الموتور لسه ملينش اصلا و الجنوط محكوكه و العربيه اكله كميه مطبات يعني العفشه رايحه في داهيه هي كمان

تلاقي واحد تاني كاتبلك " العربيه استعمال طبيب " يعني ايه مش فاهم ؟ يعني بيعقمها قبل ما يدورها و لا بيدهلنها مرهم ضد الشمس عشان الدهان مبيبهتش ؟ حاجه عجيبه و الله

تلاقي واحد تالت كاتبلك " السياره حالتها كالزيرو " و نفس الوقت يكتبلك " العربيه راشه رفرف شمال " طب ازاي حالتها زيرو و هي راشه رفرف شمال ؟ لا تعليق

تلاقي واحد رابع كاتبلك " السياره استعمال انسه " يعني هتاخدها بدباديبها و تفتحلك بيهم مول و ترزق ... ابسط يا عم

تلاقي واحد خامس كاتبلك " العربيه كسر زيرو " و في نفس الوقت تلاقيها ماشيه 50 الف كيلو طب ازاي كسر زيرو ؟ استغفر الله العظيم عالصبح

تلاقي واحد سادس كاتبلك " الاسبتن لم ينزل الارض " يعني لو نزل هيتوسخ و لا هو فايدته ايه اصلا ؟ مش فاهم انا ايه ده

تلاقي واحد سابع كاتبلك " العربيه بجواب المرور و لم تستخدم " طب اشتريتها ليه في اهلك من الاول ؟ و يخسر ليه كام الف جنيه كده ؟ عالم مبذره

تلاقي واحد تامن كاتبلك " العربيه مرفوعه 20 سنه " يعني بتتملح 50 سنه في الجراج ؟ ما طبعا هتكون اتبهدلت من الركنه يعني الجمله دي تعيب العربيه مش تزود تمنها

تلاقي واحد تاسع كاتبلك " العربيه استعمال شاب جامعي " يعني لو شاب مش جامعي هتبقي ملوثه ؟ ايه فايده كلمه جامعي يعني ؟ ما تقول شاب و خلاص و اكيد هاري ابوها شد و فرك ... عالم تقرف

اللي يفتكر حاجه تانيه يقولها