مساعدة شباب الاوبترا ضروري قبل الصبح... مهمة مستحيله؟؟!

صباح الخيرات ياجماعه
انا زائر سريع لقسم الشفرولية وتحديدا بخصوص الاوبترا
انا بره مصر حاليا والعربية اللي تحت ايدي حاليا الاوبترا

العربية اللي معايا مش بتاعتي لكن بتاعة حبيبي جدا
هي خليجي موديل 2005 فتيس اوتوماتيك
ماشيه 90 ألف

المهم
عايز أسألكم على كذا حاجه لاني المفروض هاخدها اعملها صيانة بكره باذن الله..

العربية حاسس ان مساعدينها الخلفيين مش مظبوطين
العربية بتتنطط كتير
نزلت من شويه وهيا راكنه دوست على الشنطه ورا وهيا واقفه الاقي العربية بتتنطط
مش عارف ده الطبيعي بتاعه؟؟ معتقدش بس محتاجكم تطمنوني
وهل بيكلفو كتير لو هغيرهم؟؟؟

العربية بقا في المطبات بتدبدب من قدام مش عارف نشوفية كاوتش ولا هوا عجل زياده ولا برضو له دعوة بالعفشه ولا حاجه؟؟

عايز اعرف مقاس البوجيهات المظبوطه بتاعتها ونوعهم؟؟؟
اللمض نوعهم ايه عشان في لمبه في الفانوس القداماني شمال محروقه..

دي حاجات ياريت اللي سهران يرد عليا بأي حاجه... تعاطفك لوحده مش كفايه...


تحياتي

المساعديين اللى وراء عاوزين يتغيروا فى اسرع و قت

كده المساعدين بايظين طبعا
هنا في مصر بيعملوا من 500 الي 600
الدبه دي ليها كذا سبب واهم شيء تراجع ضغط الكاوتش
البوجيهات انا بركب ngk اللي هما المقاس الصغير
اللمبات انهي واحدة محروقه النور الواطي ولا العالي عموما خد القديمة هات زيها احسنلك

اقتباس:

---

المشاركة الأصلية كتبت بواسطة ahmedcar

المساعديين اللى وراء عاوزين يتغيروا فى اسرع و قت

---

اقتباس:

---

المشاركة الأصلية كتبت بواسطة hema_lancer

كده المساعدين بايظين طبعا
هنا في مصر بيعملوا من 500 الي 600
الدبه دي ليها كذا سبب واهم شيء تراجع ضغط الكاوتش
البوجيهات انا بركب ngk اللي هما المقاس الصغير
اللمبات انهي واحدة محروقه النور الواطي ولا العالي عموما خد القديمة هات زيها احسنلك

---

جزاكم الله خيرا على الرد السريع

هوا انا اول اما ركبت العربية حسيت اني في الملاهي وقلت ايه ده معقول هيا كده فبكلم صاحبها لقيته بيشتكي من الموضوع فاتاكدت من انها غالبا بالسلامه كده وربنا يستر على سعرهم ومش عارف اغيرهم بره التوكيل ولا في التوكيل هشوف السعر وربنا يكتب اللي فيه الخير
انا في الاردن والاسعار هنا بتبقى وهميية جدا جدا وربنا يسترها
انا هنزل المنطقة الصناعيه بيها واسأل بره التوكيل الاول وبعدين اشوف الموضوع
اللمبات المحروقه هي النور مش السهاري انما العادي انا بس عايز اعرف هي اتش كام؟؟

شكرا جزيلا مره تانيه لسرعه ردكم وهبقى اقولكم عملت ايه بكره ان شاء الله

بالنسبه للتكييف حد عارف شحن الفريون بيبقى على ضغط كام ولا بالفكاكه زي اي حد لان التكييف مش شغال رغم ان الكباس بيلقط وبيشتغل واعتقد فلتر هوا التكييف مردوم بس معرفتش افكه من ورا الدرج...


تحياتي

البوجيهات bkr6e-11 / 1.0 ~ 1.1

النور الواطى h7 العالى h1

طبعا رحت التوكيل النهارده والحمد لله على كل حال

طبعا معملتش حاجه في العربية لان اسعارهم مجنونه ومتخلفه ولا ترتقي لخدمة السياره!!
على سبيل المثال لا الحصر
المساعدين الخلفييين في التوكيل بالضريبه والمصنعيات تمنهم 232 دينار
بينما بره الاصليين وبالتركيب بكله ب90 دينار
(الدينار 8 جنيه وفكه)

الناس دي فاكرانا بنسرق الفلوس ولا بنلاقيها في الشارع.؟؟؟


بكره هكمل الموضوع بره التوكيل باذن الله وابعتلكم تقرير لذيذ ان شاء الله

الحاجه اللي عايز ألفت انتباهكم ليها...
التوكيل كتوكيل
قمة في الاحترام
وضوح وشفافيه
اسعار موضحه من قبل ما تفحص العربية اصلا
بروشور العربية يتضمن اسعار الصيانه ومتحدث لاسعار 2012
التوكيل فيه واي فاي مجانا
في شاي وقهوة مجانا
في قعدات مريحه مكيفه
دورة مياه نظيفه جدا
في شواحن لجميع الموبايلات
مهندسينه قمة في الاحترام والتوضيح

وفي الاخير الاسعار الهلاميه واضح تفسيرها ايه
هههههههههههههههههههههه


وابقى عيش عالواي فاي يامعلم


تحياتي

اومال يا زوم هيعملولك كل القصة ديه فور فري هههههههه عيش يا باشا ربنا يعينك ماله يعني عصام و لا علاء هههههههههههه
السوست كده فيستك و قدام زي مقولت يا ضغط يا كاوتش يا عفشة العربية نفسها

بعد يوم طوييييييييييييييييييل جدا قضيته في حي الصناعه في عمّان

الحمد لله عملت اغلب الحاجات اللي وردت في تقرير التوكيل هنا
التوكيل كان طالب اجمالي مايعادل ال 11 ألف جنيه
عملنا بعض الصيانات داخل التوكيل والباقي عملته بره
تكلفة الصيانه ككل بما فيها الجزء اللي اتعمل في التوكيل كان 3500 جنيه ولله الحمد انها جت على قد كده
طبعا واضح الفرق بين التوكيل وبراه على الاقل انا شايف بعيني الصيانه كلها وبمد ايدي مع الصنايعية حتى واشوف واركز على كل تنتوفه
انما جوه التوكيل محدش شايف حاجه لكن هنا هما ثقه...

تم تغيير الآتي
مساعدين خلفيين (وكانو في حالة دمار شامل)
طنابير اماميه وتيل امامي ودول انا مستغرب شويه
انا جبت نوع طنابير كوري اسمه كي في سي والتيل هاي كيو كوري برضو
الطنابير الاصليه كانت فيها ريجه كتير وكمان التيل متاكل ولقيت سمك الطنبوره اليمين اقل من الشمال ب 1 ملم في النقاط الاقل سمكا...

تم تغيير الخزان العلوي للراديتير لانه كان مشروخ وبيهرب ميه وتم تسييخ الراديتير وتنظيف القربه والعجيب ان حتى مع استخدام الماء الاخضر وتغييره في التوكيل الا ان الراديتير مصدي مصدي مصدري والقربه مردومه صدا وزباله والراجل نصحني اني اعمل تنظيف للدورة كامله لكن للاسف الكاشات مكنتش هتكفي فاكتفيت بالراديتير والقربه...
تغيير جازكيت غطا الصبابات (الجلده اللي بتبقى تحت غطا الصبابات علطول
تغيير اورينجات من خراطيم التكييف (اعتقد دي عندنا اويل سيلات اسمها) لانها كانت بتنفس
وكبسنا تاني راح بلف الضغط الواطي كان بيصرف والحل اما نغير الماسوره او نحط غطا للبلف بجلده وتمنع التسريب وتم وضع الغطا والحمد لله اتمنع التسريب
وبالمناسبه هنا
لا شحننا فريون الراجل لقا ضغط الكباس عالي ومبينزلش فقالي الكومبريسور ده تعب خلاص وان في حل بيعملوه ممكن ينفع بنسبه 80 % و20% مبينفعش
(انا اول مره اسمع الكلام ده)
فكو البلف اللي بيبقى في الكباس من تحت ولغو بلف الضغط العالي حسب كلامهم الضغط فعلا نزل
قلتله طيب كده الكباس بنص عمره يعني ولا ايه قالي لا كده ولا تقلق منه ان شاء الله مش هيحصله حاجه باذن الله
تم تغيير زيت الجير الاوتوماتيك والزيت مع انه متغير من 20 ألف كيلو الا انه نزل وحش جدا جدا جدا ويقرف
الراجل اتحايل عليا اغير معاه فلتر الجير والجسكيت بتوعه مرضتش التغييره دي لانه مكملوش 20 ألف وفنفس الوقت الفلوس كانت خلاص فاكتفيت بتغيير الزيت المره دي على امل كمان 20 -30 ألف يتعملغيار كامل
وهما حطو زيت نوعه غريب بس المركز ده اشهر مركز هنا للجير الاوتو وقالولي ان ده احسن من الايه سي ديلكو كزيت جير

وتم تغيير لمبة اماميه واطي شمال الاتش 7

كل ده تم بره ودي اول صيانه بره التوكيل
اللي تم في التوكيل
تغيير زيت الماتور والفلتر
تغيير زيت الباور
تنظيف الماتور والثروتل
عمل تقرير كامل عن العربية بكل اعطالها ومافيها


كان يفترض تغيير فلتر هوا الماتور لكن استغليته فطنشته واكتفيت بطلب تنظيفه وكذلك فلتر المكيف
كان يفترض تغيير البوجيهات لكن طنشتهم لان لسا يقعدو 10 آلاف كمان ومش هيقولو لأ


اتمنى اكون وضحت كل اللي اتعمل...


تحياتي لكل اسود شفروليه اللي ردو عليا وافادوني بخصوص العربية