مشكلة في كتيب الضمان بتاع القشقاي
السلام عليكم و رحمة الله و بركاته
اخواني الصقور
انا طبعا مازلت بجهز تقرير عن القشقاي الاوتوماتيك حتي استطيع ان يحوز اعجابكم و يكون جدير بالقسم الذي افتخر بالانضمام له و لاني لم اصل لل الف بعد و حابب اكتشف اكثر السيارة حتي اكون محايد في حكمي عليها
المهم انا لما شاهدت المجهود الرائع بتاع الاخ الاستاذ احمد مصطفي في موضوع الفهرسه و الاخوة الافاضل و مواضيعهم المختلفة عن كل كبيرة و صغيرة و كيف هي بتفيد باقي الاعضاء
هذا المجهود الرائع لهم دفعني لان انقل لكم مشكلة بسيطة امر بها الان من 20 يوم حتي لا يقع فيها احد الاخوة مستقبلا
......................
الموضوع كالاتي:-
انا اشتريت العربية من معرض عندي في المعاي اسمه (( س ))
و المعرض ده طبعا مش وكيل معتمد لنيسان
و اضطررت للشراء منه لانه كان عنده اللون الابيض اللي انا اخترته
المهم انا صممت اني لن ادفع باقي فلوس العربية الا مع استلامها و مع استلام اوراقها للذهاب بها الي الترخيص و كنت طالب منه توفير فاتورة ضريبية و حكيت علي الموضوع ده في موضوع سابق و لما مسكت الاوراق بيدي اكتشفت ان المعرض ( س ) لا دخل له بأي شئ في اوراق العربية و الورق تسلسله كالاتي:-
شركة نيسان ( مستوردة السيارة ) و باعتها لوكيل معتمد اسمه ( ص )
و ( ص ) الذي لا اعرفه و لا كنت اعرف انه موزع معتمد لنيسان باع للعبد لله السيارة و عمل لي شهادة بيانات في المرور التابع له سكني بمعلومية صورة البطاقة اللي سبتها للمعرض ( س ) يوم ما دفعت لهم العربون ال 20000 اللي حجزت بهم السيارة و اخذت ايصال منهم بذلك
قوم بقي
لما فاجأت صاحب المعرض و انا بدفع باقي فلوس العربية اني لن استلم الا بفاتورة ضريبية قام اضطر يحرر لي ( ايصال ) من معرضه بأنه استلام مني ال 186 الف جنية و اخذ ايصال ال 20000 الف و اعطاني الايصال الاخر و طبعا خليتهم يختموه
و قال لي انه لما يجيب لي الفاتورة الضريبية يبقي هياخد الايصال
و ابتديت استلم العربية و وجدت الكتالوج و لم اري كتيب الضمان
فين يا عم كتيب الضمان فقال لي اني لما ارخص اصور له الرخصة علشان بصورتها يحضر لي كتيب الضمان بتاعي من الشركة بصورة الرخصة
و لان السيارة الزيرو اللي كانت معي من قبل كنت شاريها من ( وكيل ديهاتسو ) طلبت بالتليفون واحد كان شاري من سمير ريان فقال لي ده الطبيعي
المهم قبلت اني استلم بدون كتيب ضمان و مشيت و رخصت تاني يوم بعد ما استلمت منه ( الفاتورة الضريبية التي بدونها ما كنت رخصت ) و عملت موضوع بخصوصها
قوم بقي من يوم 5 ابريل لحد النهاردة 1 مايو فين يا عم الكتيب يقولي بكره بس ما تنساش تجيب معاك الايصال و بكره يجيب بعده و مفيش كتيب ظهر
المهم كنت بكلم الاخ العزيز المهندس ( اسامة قشقاي ) ههههههه و حكيت له علي الموضوع و اتصل بأحد الاخوة الافاضل في مكان معين و اخبرني انني يمكن ان اعمل محضر بضياع الكتيب و بصورة المحضر اشتري كتيب جديد من الموزع المعتمد
و نصحني بالاتصال بنيسان نفسهم
و اتصلت بالفعل بنيسان و حكيت الحكاية لكن الاخ الفاضل رأسه و الف سيف اني ارجع لصاحب المعرض فقلت له بعد عذاب اني لو ذهبت لهم تاني هرتكب هناك جريمة فقال لي انه يجب ان ارجع لصاحب المعرض هههههههههههههه
شكله عاوز يخلص مني وش
المهم اخبرته بمكالمة المهندس اسامة بخصوص حكاية المحضر دي
فسبحان الله كآني ذكرته بشئ كان ناسيه
فسألني عن عنواني و لما عرف اني من سكان المعادي قال لي اذهب للسبع و اشتري منهم كتيب
:fun_10_9_134[1]::fun_10_9_134[1]::fun_10_9_134[1]:
يا عم طيب ما كان من الاول الله يرضي عليك
و ذهبت بسرعة للسبع و قابلت اخ فاضل هناك اول امس و شرحت له المشكلة سريعا فقال لي مفيش مشكلة
و اتصل بالادارة بأخت فاضلة و اعطاني السماعة لكي اعطيها بياناتي و هي وعدتني انها ستوفر لي كتيب في حدود 150 جنية للقشقاي في اقرب وقت ممكن بعد كام يوم
طيب ايه بقي الموضوع بعد الرغي ده كله
الموضوع انه لولا ان الله ستر معي و اني حين استلمت الفاتورة الضريبية اللي طلعت بالطبع صادرة من الموزع المعتمد ( ص ) بقيمة السيارة نسيت اعطي صاحب المعرض ( س ) الايصال بتاعه اللي كان معي بقيمة النقود اللي استلمها مني و اتوقع لانه عاوز الايصال ده مني فهو مازال مهتم بالرد علي مكالماتي ( اظن هذا و الله اعلم )
و اتوقع و الله اعلم ان هناك خلاف حاد حادث الان بين (( س )) و (( ص )) و بسببه كتيب الضمان مفقود من 25 يوم بينهم
و لذلك احذر الاخوة الافاضل المقدمين علي شراء الزيرو
الله يكرمكم ابتدي بالبحث لدي الموزع المعتمد اولا عند نية الشراء
ثم اذا اضطررت للشراء من المعارض اكد علي استلام كتيب الضمان و اذا اضطررت للاستلام قبل احضاره اليك اشترط عليهم ان يحررو لك ايصال او اي شئ يجبرهم علي توفيره لك مستقبلا
انا يا جماعة بعتذر عن طول الموضوع الهايف ده بس انا حابب اشارك ولو بأي معلومة في هذا القسم الذي استفدت منه كثيرا
و حتي يستفيد غيري و لو بكلمة مما ذكرت
تحياتي اليكم جميعا
م.حاتم السباعي
