طلعنا الكروس فوكس من النافورة امبارح !!
امبارح بليل الساعة ٢ تقريباً حصلت الحادثة العجيبة في تقاطع يوسف عباس مع طريق النصر قدام بنزينية موبيل ما بين هيونداي سوناتا و-VW كروس فوكس
صاحب الكروس فوكس بعد ما إشترى الجرنال من الراجل من على الرصيف إلي في النص في شارع النصر كمل طريقه في إتجاه رابعة العدوية وعلى كلامه لسة ملحقش يجيب النقلة التانية لقى صاحب السوناتا داخل عمودي_ وطبعاً كان شاب صغير _ على شارع الناصر بيعدي التقاطع في إتجاه يوسف عباس وكان بسرعة رهيبة أنا مش عارف دة جنون واللا إستبياع واللا شجاعة زيادة عن اللزوم نفسي أحلل شخصية واحد يعدي تقاطع مهم وحيوي زي دة بدون ما يهدي أو يقف !!
طبعاً مكانش قدامه اللا إنه يدخل في الكروس فوكس والعجيب إن الكروس فوكس طارت أيوا طارت من على الارض ونزلت في النافورة مقلوبة على السقف بعد ما نطت على الرصيف الاول وبعدين كملت للنافورة . كإن واحد شاط كورة بالظبط !!
طبعاً دمار كامل للكروس فوكس وأعتقد إن الشاسيه إتعوج معرفش صور الموبيل هتوضحها كويس واللا لا
دمار شامل في السوناتا من الامام لكن الكارثة الكبرى إن مع قوة الخبطة الاير باجز مفتحتش ودي في رأي مصيبة .
صاحب السوناتا كان مصمم إنه ينقل العربية من موقع الحادث لكن على مين إتمنع الونش إنه يتحرك من مكانه لحين قدوم الدورية إلي جت بعد أكتر من ٤٥ دقيقة
لكن الحق الدفاع المدني وصل مع المطافي والاسعاف في دقائق تحسباً إن النافورة على بعد ٤ أمتار من بنزينية موبيل والكروس فوكس كان منظرها بيقول انها أكيد هتنفجر بعد التنطيط إلي والدمار إلي حصل فيها دة .
صاحب الكروس فوكس إتعور و الحمد لله كان لابس حزام الأمان وأخدته الاسعاف لكن كان واعي وبيتكلم وأعتقد مفيش كسور
صاحب السوناتا سليم تماماً وإن كنت اتمنى إنه يطلع بدرس ولو صغير من الحادثة دي علشان يحترم الطريق بعد كدة حتى لو كانت الساعة ٢ بليل لإن بعد كل دة وكل إلي شهدوا عليه إنه غلطان كان مصمم إنه مش غلطان وإن دة طريقه !! وحجته إنه دكتور وأكيد عمره ما هيكدب وشكله والله أعلم طالب في الطب لإن سنه صغير جداً .
Thanks
Eng.Sherif Shaker