الموضوع: وزير البترول يناقش اليوم صرف البنزين بكوبونات لرفع الدعم عن البنزين

الرد على الأستاذ l0new0lf

(البلدان اللى مبتدعمش المحروقات اقل دخل للفرد فيها يمكنه من العيش حياه كريمه

ده مين اللي قال لحضرتك كدا ؟؟؟
الأول نحدد البلدان ....... يبقى هانقول أوروبا و أمريكا و كندا و أستراليا

أقل دخل للفرد هناك ......... بيشحت في الشارع و مفيش حد هناك يقدر يفتح بيت لوحده
بمعنى أن لازم الأب و الأم بيكونوا شغالين ............ و الأبناء أول ما يتم 16 سنة ......... بيطلع يشتغل علشان يقدر يكفي .
و شراء كل حاجه عشان كده الدعم متشال, و بالرغم من ان الاسعار بتتغير حسب السوق بس برضه لما اسعار البنزين بتزيد عليهم الناس بتهيج و تعمل مشاكل).

أنا بصراحة عمري ما شوفت مشاكل حصلت و أنا عايش مع غلاء أسعار البنزين . (عشت فترة زمنية في أوروبا )
أول ما البنزين كان بيغلى ....... الناس كانت بتروح الشغل بالعجل خصوصا اللي شغله قريب . و محدش كان بيعمل لا اعتصامات و لا مظاهرات ....... مع أن بريطانيا على سبيل المثال من الدول المنتجة للبترول من بحر الشمال

بُص يا سيدي
الأول موضوع الدعم ده .......... تخريب للأقتصاد خصوصا دعم البترول ......
الدعم لازم يكون للفقراء في الأكل و الشرب ............. و دعم التعليم واجب و ضروري و أنا ضد المدارس اللي بفلوس أصلا لأنها بقت هي الأساس دلوقتي .
المهم ما علينا خليني أشرح لحضرتك الناس هناك عايشة ازاي .

لو بتملك بيت
بتدفع عليه ضرائب شهرية أسمها ضريبة الحي ........... و دي بتكون في حدود 150 جنيه أسترليني و تزيد لو بيتك قيمته أعلى و هكذا و كل لما المكان يكون قيمة البيوت فيه أعلى كل لما الضريبة دي تزيد .

ثانيا هناك الطرق كلها بفلوس ........ و الركن بفلوس خصوصا في المدن الكبيرة زي لندن مثلا أو مانشيستر أو مثلا باريس في فرنسا . و بالتالي تكلفة أستخدام السيارة هي تكلفة عالية .

ثالثا تعالى نيجي للسيارة نفسها .
أنت لو أشتريت عربية جديدة ........ سعرها زي هنا بالظبط مفيش فرق .......... ضرائب و مصاريف بتوصل ثمن العربية زي الجمارك (ما هي الجمارك ضرائب برضه - بس هي أختلاف مسميات )
يعني مثلا
لو أشتريت جين 2 ......... ب 10 الاف أشترليني ....... تدفع ضرائب سنوية عليها حوالي 300 أو 350 جنيه مش عارف دلوقتي بقت كام بالظبط .........
و بعدين تدفع تأمين اجباري (مش بمزاجك ) ........ و التأمين ده مش زي هناك خالص
ده بيتم تحديده على عدة عوامل - عُمر السائق - أنثى أم ذكر - تاريخ حوادثه و مطالباته التأمينية - قيمة السيارة و عمرها و نوعها يعني كل لما العربية تكون غالية و هي جديدة حتى لو أنت شاريها ب 100 جنيه استرليني ....... تكون تأمينها عالي علشان قطع غيارها غاليه .
و ده طبعا بالاضافة أن البنزين غالي - قطع الغيار غالية - التصليح غالي جدا -

يعني لو تلاحظ أن الناس هناك مش عايشة العيشة الكريمة اللي حضرتك متخيلها نهائيا علشان أنا شوفت بعيني و لمست الموضوع و عيشت فيه .
الناس هناك بتعاني العمل الدائم و كل الأسرة بتعمل و تقريبا التحويش هناك قليل جدا يعني نادرا لما تلاقي واحد محوش حاجة لأن الحكومات في أوروبا فارضة ضرائب تقريبا على كل شئ مقابل أنها بتوفرلك حياة نظيفة (و لاحظ نظيفة و منظمة و ليست سهلة و لا على الأطلاق )

نيجي لأمريكا
امريكا المرتبات فيها ضعيفة و بالتالي الناس هناك بتشتغل شغلتين
شغلة دائمة .......... و الأخرى متقطعة أو اللي بيقولوا عليها بدوام جزئي و بالأنجليزي part time job

كل ده علشان يقدر يسد على الأسعار و يدفع الضرائب .

ناهيك بقى عن الفواتير (الكهرباء و الغاز )

يعني لو نحسبها حسبة بسيطة
واحد بيقبض مرتب 2000 جنيه استرليني (و ده مرتب فوق المتوسط )
و فاتح بيت و نفترض أنه بيملكه
يبقى أخد 150 جنيه ضرائب للحي
و 300 جنيه ضرائب العربية في السنة يعني شهريا 25
و تامين اجباري على السيارة نقول في المتوسط 500 جنيه سنوي يعني حوالي 40 جنيه شهري
و نقول فاتورة غاز حوالي 100 جنيه .......... و فاتورة كهرباء حوالي 100 جنيه
و فاتورة تليفون و أنترنت و التليفزيون و الكابل حوالي 50 جنيه
و نقول بيصرف حوالي 400 جنيه بنزين في الشهر في المتوسط
و نقول أكل و شرب حوالي 500 جنيه
و قسط البيت (أغلبهم مش بيملك البيت بتاعه ) نقول مثلا 1000 جنيه مثلا (ممكن يقل و ممكن يزيد حسب القيمة )

ناهيك بقى عن تصليح العربية و صيانتها الدورية و أي مصروفات نثرية تانية - أدوية - خروجات - سفرية في السنة .... الخ


هاتلاقي أن الباشا أللي بيقبض 2000 جنيه و ده مش كتير لأن فيه ناس أقل من كدا و دول نسبته مش قليلة
مش مكفيين
لأن هاتلاقي أن المصاريف عدت مرتبه و بالتالي مراته لازم تشتغل علشان يقدروا يفتحوا البيت .

هي بس حياتهم نظيفة و مُنظمة .... فبيوهيألنا أن أقل مرتب هناك هايعيشك .

لو حضرتك متباع الأخبار
أيام الركود في 2008 ........ في فرنسا الناس اللي دخلها أقل من 1500 يورو ...... كانوا بيدورا على أكل في صفائح الزبالة

ياريت مش كل حاجة تعملها الحكومة نبقى ناقمين عليها
ده أصلا كويس أنهم هايعملوا كوبونات بدل ازالة الدعم نهائيا .


حاجة كمان على بتوع أوروبا
بيشجعوا الناس تركب المترو و الأوتوبيس ........... و شراء السيارات الصغيرة ما دون 1300 سي سي .
كفاية أن أغنى دولة في اوروبا و هي سويسرا ......... هي أقل دولة في أستخدام السيارات .... مع أنهم أغنياء جدا و معندهومش مشكلة يشتروا بترول من أي مكان .
بس بيفكروا في البدائل و عمالين شغالين أبحاث على الطاقة البديلة ........ و بيستخدموا العجل و المواصلات العامة .
أنا عارف أن طريقة تفكيرنا مختلفة و متخلفة شوية و كمان عندنا طرق طويلة تقلل فرص ركوب العجل و لكن في شريحة كبيرة ممكن تستغني عن السيارة و لكن لا يفعلون .
أنا جاري بيروح يصلي معايا الجمعة على مقربة 250 متر - قستها بالجي بي أس - و بيركب عربيته علشان يروح الجامع (مش جار واحد و الله العظيم ) أنا الوحيد تقريبا اللي بروح الجامع مشي